Ez 23 - Kaqchiquel Bible

K'ambel-tzij chikij ri e ka'i' ixoqi' kach'alal-ki'

¹ Ri Jehová xch'on chik jun bey wik'in y xubij chuwe:

² Rat Ezequiel, tatzijoj k'a jun k'ambel-tzij chikij ri e ka'i' ixoqi' ri junan kite'.

³ Ri e ka'i' ixoqi' re' kan k'a toq e xtani' na xkichop itzel k'aslen ri chiri' pan Egipto. Rije' xkiya' k'a q'ij richin xmal ri ruwa-kik'u'x y chiri' xqasex kiq'ij y xban chike chi man e xtani' ta chik.

⁴ Ri nimalaxel rubini'an Oholá,*f6* y re' nuk'exewachuj ri tinamit Samaria. Y ri chaq'laxel rubini'an Oholibá,*f7* y re' nuk'exewachuj ri tinamit Jerusalem. Rije' e achi'el xa ta e wixjayil y xekalaj numi'al-nuk'ajol.

⁵ Stape' ri Oholá kan wichin yin, xa xbe ruk'u'x kik'in ri aj-labal aj-Asiria ri xe'ajowan richin.

⁶ Konojel rije' kikusalon k'a kaqkoj tzieq. Y konojel ri e aj-raqen y ri e q'atoy-tzij pa kiwi' alaboni' ri kan e jebel ok y yech'oke' chirij kiej.

⁷ Ri Oholá xmakun y xuchop k'a itzel k'aslen kik'in ri achi'a' ri' y xbe ruk'u'x kik'in ri wachibel y kan xuya' kiq'ij. Y keri' xuben chi xok man ch'ajch'oj ta.

⁸ Man rik'in ri', kan man ruya'on ta kan ri itzel taq rubanobal kik'in ri aj-Egipto. Man xuya' ta kan ri itzel ruk'aslen y ri itzel banobel. Kan k'a pa ruq'opojil k'a toq janila e k'iy xek'oje' rik'in.

⁹ Roma ri' kan xinjech pa kiq'a' ri winaqi' aj-Asiria, ri ye'ajowan richin, ri kan janila niken chikij.

¹⁰ Y rije' kan xkik'uaj-el ronojel chuwech, kan jumul xkich'anaba' kan. Y man xaxe ta ri', xa kan xekik'uaj chuqa-el ri ral chi alaboni' chi xtani' y rija' xkikamisaj kan chi espada. Y ri xuk'uluwachij re ixoq re' kan xok k'a jun k'ambel-na'oj chikiwech ri ch'aqa' ixoqi'.

¹¹ Jak'a stape' ri Oholibá, ri chaq'laxel, xutz'et ronojel re', rija' chuqa' kan más itzel k'aslen xuben chuwech ri runimal.

¹² Rija' chuqa' kan janila k'a xerajo' ri aj-Asiria y kan xken chikij ri e aj-raqen y ri e q'atoy taq tzij, roma rije' e jebel ok, kan jebel taq tzieq e kikusalon y kan yech'oke' chirij kiej.

¹³ Y xintz'et k'a chi chuqa' rija' xok man ch'ajch'oj ta, achi'el ri runimal.

¹⁴ Jak'a re chaq'laxel re' xa kan xik'o chik ruwi' ri itzel ruk'aslen chuwech ri Samaria. Xerutz'et kiwachibel achi'a' aj-Babilonia ri e banon chuwech tz'aq, ri keq yetzu'un.

¹⁵ K'o ximibel-kipan, kuchubel-kijolon retal ri kisamaj, konojel rije' yetzu'un achi'el xa ta e q'atbel taq tzij richin Babilonia.

¹⁶ Ri Oholibá kan xaxe xerutz'et re wachibel re', kan xbe ránima chikij y roma ri' xeruteq taqonela' kik'in ri winaqi' aj-Babilonia richin xeroyoj ri achi'a' aj chiri'.

¹⁷ Ri achi'a' ri' kan chi'anin k'a xe'apon rik'in ri Oholibá richin xemakun rik'in. Jak'a toq rija' janila xmakun yan kik'in, kan itzel xerutz'et y kan xerixowaj.

¹⁸ Y keri' xuk'ayij ri' chubanik ri itzel k'aslen y xuk'utula' ri ruch'akul. Roma ri' yin Jehová kan rik'in ronojel wánima itzel k'a xintz'et achi'el xinben chuqa' rik'in ri rach'alal.

¹⁹ Ri Oholibá kan más xuk'ayij ri' chubanik itzel k'aslen, xoqaqa k'a chuk'u'x ri xuben toq k'a xten na toq xk'oje' chiri' pan Egipto toq xuchop itzel k'aslen.

²⁰ Kan janila k'a xuben kik'in ri aj-Egipto ri ye'ajowan richin y ri rayibel ri k'o kik'in ri achi'a' ri' xa kan achi'el rurayibel ri bur. Y ri achi'el ya' ri richin ye'alk'ualan kan achi'el kichin ri kiej.

²¹ Y keri' ri Oholibá xa kan noqaqa chuk'u'x ri xerubanala' ojer kan chiri' pan Egipto toq k'a xten na y nikichapala' ri ruwa-ruk'u'x.

Ri Dios xtuya' rutojbalil-mak pa ruwi' ri Oholibá

²² Rat Oholibá, ri pa nabey xe'awajo', jak'a re wakami xe'amalij kan. Jak'a yin Jehová xtinben k'a chike rije' chi xkeyakatej chawij y xtikiben oyowal awik'in.

²³ Xkepe k'a chawij ri aj-Babilonia ri ek'o pa ruwach'ulew Pecod, ri Soa y ri Coa junan kik'in ri aj-Asiria. Konojel rije' e aj-raqen, e q'atoy taq tzij, e tata'al pa kiwi' ri aj-labal, alaboni' ri e jebel ok y yech'oke' chirij kiej.

²⁴ Xkepe k'a rik'in kikamisabal, ki-carruaje y kan janila chi winaqi' rik'in kitobal ruwa-kik'u'x y rutobal-kijolon. Kan xkatinjech k'a pa kiq'a' richin xtikiq'et-tzij pan awi' achi'el nubij ri kipixa' rije'.

²⁵ Yin kan janila yatinwajo', jak'a k'o chi xtinwelesaj woyowal chawij. Roma ri' rije' kan xtik'o chik ruwi' xtikiben chawe. Kan xtikiqupij k'a el ri atza'n y chuqa' ri axikin. Y ri winaqi' ri k'a xkek'oje' na kan chiri' pa Jerusalem xa kan chi espada xkekamisex-wi. Chuqa' xkekik'uaj k'a el ri awal chi xtani', chi alaboni' y pa ruk'isibel xkenk'is rik'in q'aq'.

²⁶ Y keri' xtikik'uaj-el ronojel ri atziaq y ri abeyomel.

²⁷ Y rik'in k'a ri' yatane' chubanik ri itzel abanobal y xtamestaj ri itzel ak'aslen ri xatikeriba' rubanik chiri' pan Egipto. Richin keri' kan man jun bey chik xtarayij ri banobel ri' y man jun bey chik xke'oqaqa chi'ak'u'x.

²⁸ Kere' ninbij yin Jehová: Re wakami xkatinjech k'a pa kiq'a' ri ch'aqa' chik ruwach'ulew ri xe'amalij kan y kan ye'awixowaj.

²⁹ Y roma ri' rije' kan yatkixowaj y kan niyakatej janila koyowal chawij. Keri' xtok kan kichin ri ach'akoj ri abanon rik'in ri asamaj y kan man jun chik xtikiya' kan chawe. Xa kan xkatkich'anaba' kan jumul y xa kan man nikiya' ta chik atziaq y xtitz'etetej k'a ri itzel ak'aslen ri xaben.

³⁰ Ronojel re' xtibanatej awik'in, roma xamakun kik'in ch'aqa' chik ruwach'ulew y xatok man at ch'ajch'oj ta toq xaya' kiq'ij ri wachibel ri k'o kik'in.

³¹ Xa kan xatzeqelibej k'a ri rubey ri animal y roma ri' xtinya' ri rutojbalil-mak pan awi' achi'el ri rutojbalil-mak ri xinya' pa ruwi' rija'.

³² Yin Jehová ri ink'o pa ruwi' ronojel, ninjikiba-nutzij chi kan xtaq'axaj k'a ri ruk'ayewal achi'el xuq'axaj ri animal. Y re ruk'ayewal re' xtuben chawe achi'el xa ta xaqum vino chupan jun jomojik y nim qumbel. Y roma janila k'iy ruk'ayewal xtaqum, ri ch'aqa' chik ruwach'ulew xkatkitze'ej y xkatketzelaj.

³³ Roma ri ruk'ayewal xkak'oje' pa bis y kan maneq awuchuq'a' richin xkapa'e' achi'el jun q'abarel. Xtaqum ri k'o chupan ri qumbel ri nuya' ruk'ayewal y bis achi'el xuqum ri animal Samaria.

³⁴ Xtaqum k'a ronojel ri k'o chupan ri qumbel y kan xtaq'axaj k'a ri ruk'ayewal. K'ari' xtapaxij, y rik'in ri' xtasok ruwa-ak'u'x. Yin Jehová ri yibin.

³⁵ Roma rat Jerusalem xa xinamestaj kan y xapiskolij-el-awi' chinuwech, roma ri' k'o chi xtatoj ri rutojbalil ri amak toq xachop jun itzel k'aslen, xcha' ri Jehová.

Ri Dios xtuteq-pe ruk'ayewal pa kiwi' ri Oholá y ri Oholibá

³⁶ Ri Jehová xubij chuwe: Rat Ezequiel, ¿nawajo' naq'et-tzij pa kiwi' ri Oholá y ri Oholibá?, kan tabij k'a chike ri itzel taq kibanobal ri kan man utz ta nintz'et yin.

³⁷ roma rije' xekitzeqelibej ch'aqa' chik dios achi'el nuben jun ixoq nutzeqelibej jun chik achin ri man rachijil ta. Chuqa' kan xe'ok kamisanela' roma xekisuj ri kal chikiwech ri wachibel. Re ak'uala' re' kan e wichin yin, jak'a xa xe'ok kiway ri wachibel.

³⁸ Chuqa' xkiben chire ri wachoch chi xok man ch'ajch'oj ta y man xkiya' ta rejqalen ri q'ij richin uxlanen.

³⁹ Y chupan k'a ri q'ij ri' toq xekisuj ri taq kal richin jun kamelabel richin nikiya' kiq'ij ri wachibel, jak'a chuqa' q'ij ri' xe'apon chupan ri wachoch y xkiben k'a chire chi man jun rejqalen.

⁴⁰ Y rix ix achi'el jun ixoq itzel ruk'aslen y xiteq rutzijol richin xebek'amer-pe achi'a' ri ek'o nej richin chi ye'oqaqa iwik'in. Rokik ye'oqaqa rije', rix xixatin y xiyala' aq'om chuchi' runaq' taq iwech y kan jebel xiwiq-iwi'.

⁴¹ Rix kan jebel k'a xiben-apo richin xe'iwoyobej rije'. Chuqa' k'o k'a jun mesa ri jebel ichojmirisan y pa ruwi' ri mesa ri' xya'ox pom y aceite ri xa e ch'aron chik chuwe yin.

⁴² Kan xak'axatej k'a ri raqoj-chi'ij roma e k'iy winaqi' ri yenimaq'ijun, y chuqa' e peteneq choj relik winaqi' pa tz'iran ruwach'ulew. Y rije' xixkiwiq rik'in retz'aba'l-iq'a' y jebelej taq corona ri xekiya' pan ijolon.

⁴³ Toq xixkos yan kik'in re achi'a' re', yin xixinjech pa kiq'a' richin nikiben chiwe achi'el jun ixoq itzel ruk'aslen, roma rix xa ix achi'el ixoqi' ri itzel kik'aslen.

⁴⁴ Roma ri' ri winaqi' richin ch'aqa' chik ruwach'ulew kan yepe kik'in ri Oholá y ri Oholibá, kan achi'el nikiben ri achi'a' toq ye'apon kik'in ri ixoqi' ri itzel kik'aslen.

⁴⁵ Roma ri' ri achi'a' ri choj kik'aslen, ja rije' ri xkeq'aton-tzij pan iwi' achi'el ri ruchojmilal ri ya'on pa kiwi' ri ixoqi' ri itzel kik'aslen y pa kiwi' kamisanela', roma qitzij na wi chi rix ix ixoqi' ri itzel ik'aslen y ix kamisanela'.

⁴⁶ Yin Jehová ninbij: Kan xtikimol k'a ki' chijun ruwach'ulew richin xkeyakatej chiwij. Xtinben k'a chike chi xtipe jun nimalej xibinri'il y xke'eleq' k'a iwik'in.

⁴⁷ Konojel ri winaqi' richin chijun ri ruwach'ulew xkixkikamisaj chi abej y kan xkixk'ajix chi espada. Chuqa' kan xkekikamisaj ri iwal alaboni' y xtani' y xtiporox kan ri iwachoch.

⁴⁸ Keri' k'a xtinben richin xtik'is ri itzel rutzijol ri eleneq chiwij, richin keri' ri ch'aqa' chik ruwach'ulew xtiketamaj chi man ruk'amon ta ri xiben y keri' man xtikiben ta ri mak ri achi'el ri xiben rix.

⁴⁹ Y rix kan xtik'ul k'a ri rutojbalil imak roma xe'itzeqelibej ch'aqa' chik ruwach'ulew y roma xiya' kiq'ij ri ki-dios. Y k'ari' xtiwetamaj chi ja yin Jehová ri ink'o pa ruwi' ronojel, xcha'.