Ez 2 - Kaqchiquel Bible

Ri Jehová xroyoj ri Ezequiel

¹ Ri Jehová xubij k'a chuwe chi yin xa in jun choj wineq y chi kipa'e-q'anej richin nitzijon wik'in.

² Rokik k'a nich'on wik'in jari' toq ri ru-Espíritu xok wik'in richin xitikir xipa'e-q'anej. Y kan xinwak'axaj k'a ri xubij chuwe.

³ Kere' k'a xubij chuwe: Rat Ezequiel, wakami yin xkatinteq-el chikikojol ri awinaq israelita. Rije' e jun tinamit ri man e nimey ta tzij. Y ri kati't-kimama' xa xeyakatej chuwij k'a re q'ij wakami.

⁴ Rije' kan janila kikowirisan-ki'. Jak'a re wakami rat Ezequiel, xtaya' re jun rutzijol re' chike.

⁵ Rije' kan e itzel taq winaqi' y roma ri' stape' xkatkak'axaj o ni, xaxe tiketamaj chi k'o jun q'alajirisey nuch'abel chikikojol.

⁶ Rat Ezequiel, man tak'en kikiy y man taxibij-awi' roma ri kich'abel. Stape' xtana' achi'el xa ta atk'o pa k'ix o atk'o chikikojol alacrán. Man timayamo-qa ri awánima, stape' rije' kan xkeyakatej chawij.

⁷ Stape' k'a xkatkak'axaj o ni, rat xtabebij k'a chike re ch'abel re'.

⁸ Rat kan tawak'axaj k'a jebel re xtinbij-el chawe y man kayakatej chuwij achi'el nikiben rije'. Tajaqa' la achi' y tatija' re xtinbenya' chawe, xcha' ri Jehová chuwe.

⁹ Jari' toq xintz'et jun q'abaj rik'on-pe wik'in y ruk'uan k'a jun boton wuj.

¹⁰ Y xurik' k'a ri boton wuj ri' chinuwech y xintz'et k'a chi nojineq ruwech rik'in ch'abel y keri' chuqa' ri chirij. Y ri tz'ibatel chuwech nich'on chirij ri q'axo'n y ri bis.