Ez 19 - Kaqchiquel Bible

Bix richin bis pa kiwi' ri rey richin ri Judá

¹ Ri Jehová xch'on chik wik'in yin Ezequiel y xubij chi tinbixaj jun bix richin bis pa kiwi' ri rey richin ri tinamit Israel y kere' k'a nubij:

² Ri tinamit Israel kan janila k'a'el achi'el jun ixoq koj, jari' ri más k'a'el chikikojol ri ch'aqa' chik koj. Y jupul chikikojol ri taq ral, richin xeruk'iytisaj.

³ Ri ixoq koj ri' xucha' jun chike ri taq ral, y xuk'iytisaj jebel richin xok rey. Kan xretamaj yeruchop chikopi' y yerutej winaqi'.

⁴ Kan xkak'axaj k'a ri winaqi' richin ch'aqa' chik ruwach'ulew, xkiya' k'a jun pikbel pa rubey richin xkichop. Rik'in jun chapbel xkiqirirej-el richin xkik'uaj-el pa ruwach'ulew Egipto.

⁵ Toq xutz'et ri ixoq koj chi ri ruch'obonik xa man nik'uluwachitej ta, jari' xuna' chi man jun chik oyobenri'il rik'in. Roma ri' xuchop chik jun ti ral, xuk'iytisaj jebel achi'el xuben rik'in ri nabey.

⁶ Y ri ral nibe y nipe nuben chikikojol ri ch'aqa' chik koj. Xretamaj yeruchop chikopi', y yerutej winaqi'.

⁷ Kan xeruwulaj k'a ri tz'aq richin ri tinamit, y xerutoloba' k'a kan ronojel ri tinamit. Y konojel k'a winaqi' richin ri ruwach'ulew, kan kixibin k'a ki' roma ri ruch'abel ri koj ri'.

⁸ K'ari' xebeyakatej k'a pe ri winaqi' richin chijun ri ruwach'ulew, y rije' xkirik' k'a jun ya'l richin xkichop. Y rija' xqaqa k'a chupan ri pikbel ri'.

⁹ Rik'in k'a chapbel xkichop-wi ri rey y xkixim-el. K'ari' xkik'uaj-el pa Babilonia richin xkiya' pa cárcel. Richin man xak'axatej ta chik ruch'abel ri pa taq juyu' richin ri ruwach'ulew Judá.

¹⁰ Ri Judá achi'el xa ta juwi-uva ri tikil chunaqaj ya' kan jebel niwachin y jebel nijotayin roma kan nibiyin ya' chuxe'.

¹¹ Ri ruq'a' kan xk'oje' k'a ruchuq'a', y re' nuk'exewachuj ri ki-rey. Y ri juwi-uva ri' kan janila k'a xk'iy, y kan janila k'a nim chikiwech ri ch'aqa' chik.

¹² Jak'a k'o jun q'ij rik'in oyowalen xk'uq y xtorix pan ulew. K'ari' xpe ri meq'en kaq'iq' pa relebel-q'ij y xuchaqirisaj. Ri ruwech ri jebel kibanon xewux-el, Y ri ruq'a' xa xeya'ox pa q'aq'.

¹³ Ri che' ri' wakami xa pa tz'iran ruwach'ulew tikil-wi. pa jun ruwach'ulew chaqi'j-chaqi'j.

¹⁴ Y keri' k'a xk'uluwachitej, chi ri juwi-uva xk'at, y xk'is k'a ri ruwech y ri ruq'a'. Kan man jun chik ri xk'oje' ta kan ri nik'atzin ta richin nok rey. Re bix re' nik'atzin k'a richin toq yemuq ri kaminaqi' y k'o chi nibixex rik'in bis.