Ez 18 - Kaqchiquel Bible

Ri wineq ri nimakun k'o chi nrejqalej ri rumak

¹ Ri Jehová xch'on chik wik'in y kere' k'a ri xubij chuwe:

² ¿Achike roma iwik'in rix israelita jantape' nibix ri jun k'ambel-tzij ri nubij: Ri te'ej-tata'aj nikitej ri uva ch'om y ja ri alk'ualaxela' ri nijuch'uch' key roma ri ruch'amil ri uva ri'?

³ Jak'a yin Jehová ninbij chi man jun bey chik xtikamulux re jun k'ambel-tzij re' chupan ri iruwach'ulew.

⁴ Roma kan konojel k'a ri winaqi' e wichin yin, chi tata'aj chi alk'ualaxela' kan e wichin yin; y roma ri' ri wineq ri nimakun, xaxe rija' k'o chi niken roma ri rumak.

⁵ Rik'in juba' k'o ta jun wineq choj ruk'aslen y kan ronojel pa ruchojmilal ri nuben.

⁶ Rija' man xtiwa' ta kik'in winaqi' ri yenimaq'ijun pa ruwi' taq juyu' richin nikiya' kiq'ij wachibel, ni man xtukuquba' ta ruk'u'x kik'in ri wachibel ri achoq ik'in nikikuquba' kik'u'x ri winaqi', ni man xtik'oje' ta rik'in rixjayil ri rachpochel, ni man xtik'oje' ta qa rik'in ri rixjayil rija' toq k'o yabil richin chi ik' chire.

⁷ Ri wineq ri man xkeruya' ta pa tijoj-poqonal ri ch'aqa' chik y toq nuya' méro pa qajik xa kan nutzolij ri retal ri xya'ox chire roma ri qajonel. Rija' man neleq' ta y kan nuya' k'a kiway ri yewayjan y nuya' kitziaq ri maneq kitziaq.

⁸ Toq nuya' méro chire jun ruwinaq pa qajik man xtuk'utuj ta ral y toq nuya' méro chire jun ri man ruwinaq ta, man nuk'utuj ta k'iy ral. Rija' man xtuben ta itzel y toq nuq'et-tzij pa kiwi' e ka'i' winaqi' kan nuben pa ruchojmilal.

⁹ Rija' nuben ri nubij chupan ronojel ri nupixa' y kan man jun bey xtuch'er-ri' chire. Re wineq re' kan choj wi y rija' kan xtik'ase' k'a chi utzil. Ja yin Jehová ri yibin.

¹⁰ Jak'a wi re wineq re' ri choj ruk'aslen k'o ta jun ruk'ajol eleq'om, kamisanel o nuben ch'aqa' chik banobel ri man e utz ta;

¹¹ ri xa man rubanobal ta ri rutata', nel chi tzij chi re k'ajolaxel re' xa nibe pa ruwi' nima'q taq juyu' ri akuchi yeya'ox kiq'ij ri wachibel. Chuqa' xa nik'oje' rik'in ri rixjayil ri rachpochel,

¹² xa kan nuben chike richin nikitej poqon ri man jun k'o kik'in. Xa kan neleq' y toq nuya' méro pa qajik man nutzolij ta chik el ri retal ri xya'ox kan chire roma ri qajonel. Kan nukuquba' ruk'u'x rik'in ri wachibel y yeruben banobel ri kan man utz ta nintz'et.

¹³ Kan nuk'ul ral ri méro ri nuya' pa qajik chike ri ruwinaq y toq nuya' pa qajik chike ri man e ruwinaq ta kan nuk'utuj k'iy ral chike. Re itzel alk'ualaxel re' kan man xtik'ase' ta k'a k'iy q'ij. Roma ronojel ri itzel taq rubanobal ri xeruben, kan xtiken k'a. Kan man jun makul chire y kan xtrejqalej ri rumak.

¹⁴ Rik'in juba' re itzel alk'ualaxel re' k'o ta jun ruk'ajol y re' nutz'et ta ronojel ri rumak ri rutata', man rik'in ri' man xtuben ta achi'el nuben ri rutata'.

¹⁵ Man xtiwa' ta kik'in winaqi' ri yenimaq'ijun pa ruwi' taq juyu' richin nikiya' kiq'ij wachibel, ni man xtukuquba' ta ruk'u'x kik'in ri wachibel ri achoq ik'in nikikuquba' kik'u'x ri winaqi', ni man xtik'oje' ta rik'in ri rixjayil ri rachpochel.

¹⁶ Man xkeruya' ta pa tijoj-poqonal ri ch'aqa' chik, toq xtuya' méro pa qajik man xtuk'utuj ta retal chire ri qajonel. Man xteleq' ta; pa ruk'exel ri' xa kan xtuya' kiway ri yewayjan y xtuya' kitziaq ri maneq kitziaq.

¹⁷ Chuqa' man xtuben ta itzel. Y toq xtuya' méro pa qajik chire jun ruwinaq xa man xtuk'utuj ta ral y toq xtuya' pa qajik chire jun ri man ruwinaq ta man xtuk'utuj ta k'iy ral. Rija' kan xtuben k'a ri nubij chupan ronojel ri nupixa' y man xtuch'er ta ri' chire. Re alk'ualaxel re' kan man xtiken ta k'a roma ri rumak ri rutata', xa kan xtik'ase' k'a.

¹⁸ Jak'a ri rutata' kan xtiken roma ri rumak roma xeruya' pa tijoj-poqonal ri winaqi', xeleq' y xuben itzel chikikojol ri ruwinaq. Xa kan xaxe k'a rija' ri xtejqalen ri rumak ri xerubanala'.

¹⁹ Rik'in juba' rix xtik'utula' chiwech ri achike roma man nrejqalej ta ri alk'ualaxel ri rumak ri rutata'. Roma ri alk'ualaxel ri' kan xuben pa ruchojmilal y choj xbiyin y kan xutaqej ronojel ri nubij ri nupixa'. Roma ri' kan qitzij ninbij chi re alk'ualaxel re' kan xtik'ase' kan.

²⁰ Xa kan xaxe ri wineq ri nimakun ruk'amon richin nrejqalej ri rumak, ni ta ri alk'ualaxel man xtrejqalej ta ri rumak ri rutata', ni ta k'a ri tata'aj man xtrejqalej ta ri rumak ri alk'ualaxel. Ri choj ruk'aslen kan xtuk'ul k'a rajel ruk'exel, roma pa ruchojmilal ri xuben; jak'a ri banoy etzelal kan xtuk'ul k'a rutojbalil roma ri etzelal ri xuben.

²¹ Y wi ta ri banoy etzelal nuchojmirisaj ruk'aslen y man nuben ta chik ri achi'el rubanon-pe y nutaqej ronojel ruwech pixa' y nuben ronojel pa ruchojmilal, kan xtik'ase' k'a kan y man xtinwelesaj ta ri ruk'aslen.

²² Yin kan man xtoqaqa ta chik chinuk'u'x ronojel ri etzelal ri xeruben y rija' kan xtik'ase' k'a roma choj ruk'aslen xtuben.

²³ Yin man ninwajo' ta chi ri banoy etzelal niken, ri ninwajo' yin chi nijalatej ta ri ruk'aslen richin kan xtik'ase'; ja yin Jehová ri yibin.

²⁴ Jak'a wi ri choj ruk'aslen nuya' kan ri ruchojmilal y xa nuchop rubanik ri xa man niqa' ta chinuwech yin y xa nuben achi'el ri nikiben ri banoy taq etzelal, ¿nich'ob rix chi nik'ase' k'iy q'ij ri nibanon kere'? Yin kan xtinmestaj k'a ronojel ri utz rubanobal ri rubanon wik'in. Y roma xa man xuben ta chik pa ruchojmilal y xmakun, re wineq k'a re' kan xtiken.

²⁵ Jak'a rix nibij chi yin man pa ruchojmilal ta ri ninben. Roma ri' kan ninbij chiwe rix winaqi' israelita chi xa ja rix ri yixbanon ronojel itzel taq banobel y re' man pa ruchojmilal ta.

²⁶ Roma ri', ri wineq choj ruk'aslen wi xa nuya' kan ri utzilej k'aslen y nuchop rubanik ri itzel, kan xtiken k'a chi'anin roma ri itzel taq rubanobal.

²⁷ Y wi ta jun wineq ri banoy etzelal nuchojmirisaj ta ri ruk'aslen y kan xtik'ase' pa ruchojmilal, man xtinwelesaj ta ri ruk'aslen.

²⁸ Wi xunojij y xutz'et jebel ri itzel ri najin chubanik y chirij ri' kan man nuben ta chik y ronojel ri nuben xa pa ruchojmilal, kan qitzij wi chi rija' xtik'ase' y man xtinwelesaj ta ri ruk'aslen.

²⁹ Jak'a rix nibij chi yin xa man pa ruchojmilal ta yinajin chubanik. Jak'a yin ninbij chi xa ja rix ri tinamit Israel ri man pa ruchojmilal ta ri niben.

³⁰ Roma ri' yin kan ninq'et-tzij pan iwi' chi'ijujunal rix ri aj-Israel achi'el ri rubanik ri ibanobal. Yin Jehová ri ink'o pa ruwi' ronojel ninjikiba' nutzij. Titzolej k'a pe ik'u'x y tiya' k'a kan ri rubanik ri itzel taq banobel, richin keri' man xtiqaqa ta rutojbalil ri imak pan iwi'.

³¹ Kan tijech'ej k'a iwi' chire ronojel etzelal ri ibanon chinuwech yin, kan rik'in k'a ronojel iwánima tijala' ri ik'aslen. ¿Achike ta k'a roma niwajo' yixken rix ri ix rijatzul kan ri Israel?

³² Roma yin man ninwajo' ta chi k'o ta jun niken chiwe rix. Xa kan tiya' k'a kan ri itzel taq banobel richin xkixk'ase' k'iy juna', yin Jehová ri yibin.