Ez 16 - Kaqchiquel Bible

Ri Jerusalem achi'el xa ta jun itzel ixjayilonel

¹ Ri Jehová xch'on chik wik'in y xubij chuwe:

² Rat Ezequiel, kach'on kik'in ri awinaq ri ek'o pa Jerusalem pa ruwi' ri itzel taq kibanobal ri kan man yeqa' ta chinuwech.

³ Y jare' k'a ri rutzijol ri ninya' yin Jehová chike: Pa nabey rat Jerusalem, xa pa ruwach'ulew Canaán xatz'ukutej-pe. Y ri atata' jun amorreo y ri ate' jun hitita.

⁴ Toq xatalex man xqupix ta k'a ri amuxu'x, ni man jun xatinsan awichin, ni man xkimel ta juba' ruya'al atz'an chawij, ni man xatkibolqotij ta pa jun tzieq.

⁵ Kan man jun k'a xjoyowan ta awech y roma ri' man jun xbanon awik'in ronojel re'. Chupan ri q'ij toq xatalex, xa xabek'aq kan pa juyu', roma kan xmulun kik'u'x chawij.

⁶ Y yin Jehová xiq'ax k'a chiri' y jari' toq xintz'et chi nabolqotila-awi' chupan ri akik'el. Jari' toq yin xinch'ob richin xatinto' richin xak'ase-q'anej.

⁷ Y xinben chawe chi xawinaqir achi'el ri q'ayis toq kan pa ruk'iyal nibek'iy-pe. Y toq xanimer-q'anej xatok achi'el jun xten, xebenimer-pe ri ruwa taq ak'u'x y xek'iy-qa ri rusumal taq awi'. Kan xatok k'a el jun xten, xaxe k'a man jani k'o atziaq.

⁸ Chirij ri' xiq'ax chik jun bey chi'anaqaj y xintz'et chi k'o chik ajuna' richin nawajo' achin. Y xinrik' ri nuq'a' chawij richin xatinkuch y xinxim nutzij awik'in, richin xatok wichin.

⁹ K'ari' xatinwatinsaj y xatinch'ajch'ojirisaj chire ri kik' ri k'o chawij. Chuqa' xinya' jubulej aq'om chawij,

¹⁰ xinya' atziaq ri banon jebel retz'aba'l, xinya' axajab ri banon rik'in jebelej taq tz'um, jun ximibel-apan ri banon rik'in lino y chuqa' xinya' jun atziaq ri banon rik'in seda.

¹¹ Xatinwiq k'a rik'in jalajoj ruwech wiqobel ri e banon rik'in q'anapueq, xinya' retz'aba'l-aq'a' y awichinaj,

¹² chuqa' retz'aba'l-atza'n, ruwi-axikin y jun tz'ajtz'ik ch'ich' pan ajolon richin retz'aba'l rusumal-awi'.

¹³ Keri' xatinwiq rik'in q'anapueq y saqipueq y ri atziaq kan e banon rik'in jebelej lino ri kan jebel e tz'ison y kan jebejoj ok ri yetzu'un. Y keri' jebel ok xaben. Xatinwilij rik'in jebelej kaxlan-wey, rik'in kab ri nikiya' ri taq chikopi' y ri aceite banon rik'in olivo. Kan janila jebel ok xaben-q'anej y kan janila xk'oje' awejqalen, achi'el jun reina.

¹⁴ Roma ri' xtalutej ri utzilej atzijol k'a pa taq ruwach'ulew, roma ja yin xiwiqon*f3* awichin. Yin Jehová ri yibin.

¹⁵ Jak'a roma kan at jebejoj ok y eleneq atzijol, kan xakuquba' ak'u'x rik'in ri' y xachop rubanik itzel k'aslen y kan xajech-awi' chike konojel ri xeq'ax-el chi'anaqaj.

¹⁶ Ri atziaq ri xinya', rik'in ri' xe'abanala' taq jay pa taq ruwi-q'anej juyu' y chiri' xe'abanala' itzel taq banobel, achi'el nuben jun ixoq itzel ruk'aslen.

¹⁷ Ri wiqobel ri e banon rik'in q'anapueq y saqipueq ri xensipaj chawe, xa xe'aya'erisaj pa q'aq' richin xaben kiwachibel achi'a' chire. Y xeri' xak'oje' kik'in, achi'el nuben jun ixoq itzel ruk'aslen.

¹⁸ Kan xawelesaj k'a ri atziaq ri xinya' chawe, richin rat xaya' chikij ri wachibel ri'. Chuqa' kan xak'en-el ri aceite richin olivo y ri pom ri nuya'on chawe y xasuj chikiwech ri wachibel.

¹⁹ Y keri' chuqa' xak'en-el ri kaxlan-wey ri banon rik'in jebelej k'ej, ri aceite y ri kab ri nikiya' ri taq chikopi', achoq ik'in atintzuqun-wi y xa xasuj chikiwech ri wachibel richin jun sipanik ri nijubulin chikiwech rije'. Y re' kan qitzij, yin Jehová ri yibin.

²⁰ Y man xaxe ta ri', xaben achi'el jun ixoq itzel ruk'aslen. Chuqa' xe'asuj ri alk'ualaxela', chi alaboni' chi xtani', xe'asuj chikiwech ri wachibel ri' richin chi jari' ri xok kiway.

²¹ Kan xe'akamisaj k'a ri alk'ualaxela' ri kan e wichin yin, richin xe'asuj chikiwech wachibel, richin jun sipanik ri niporox chijun.

²² Rik'in ri itzel ak'aslen kan man niqaqa ta chik chi'ak'u'x toq k'a at ti ko'ol na, toq man jani k'o atziaq y nabolqotila-awi' chupan ri akik'el.

Ri Jerusalem achi'el xa ta jun ixoq itzel ruk'aslen

²³ Roma ri', yin Jehová ninbij chi kan toq'ex k'a awech, roma ronojel itzel ri xe'abanala'.

²⁴ Kan xe'abanala' k'a porobel richin kamelabel pa taq nima'q ruwech bey.

²⁵ Y chiri' pa taq krusin-bey xaya' kiq'ij ri wachibel. Man xaya' ta rejqalen chi rat at jebel ok, xa kan xasuj k'a ri ach'akul chikiwech xabachike ri yeq'ax keri'. Y kan jantape' k'a xamakun rik'in ri banobel ri'.

²⁶ Chuqa' xasuj-awi' chikiwech ri aj-Egipto, winaqi' ri kan k'o-wi janila kuchuq'a' y kan jebel nikina' yemakun. Roma ri' xaben chuwe richin xyakatej janila woyowal.

²⁷ Roma ri', yin xiyakatej richin xinya' rutojbalil-mak pan awi' y kan xinwelesaj juba' awulew richin xinjech pa kiq'a' ri aj-Filistea, ri kan itzel chuqa' xkina' roma ri itzel taq abanobal.

²⁸ Chuqa' man xaxe ta ri', rat xa kan xasuj-awi' chikiwech ri aj-Asiria richin xamakun kik'in y man xaruben ta k'a rik'in ri'.

²⁹ Roma ri' kan xajech chik awi' chupan itzel k'aslen kik'in ri aj-Babilonia, stape' rije' xa e jun ruwach'ulew kichin k'ayinela'. Y man rik'in ri' man ak'owisan ta ak'u'x.

³⁰ Roma ronojel re', yin Jehová ninbij chi rat kan janila yawa' ri awánima, roma naben itzel taq banobel achi'el nuben jun ixoq itzel ruk'aslen, ri kan man jun k'ix chuwech.

³¹ Xe'abanala' k'a porobel kichin ri wachibel ri chiri' pa nima'q ruwech bey y pa taq krusin-bey. Jak'a man naben ta achi'el nuben jun ixoq ri itzel ruk'aslen, roma ri ixoq ri' xa kan nimakun roma ri méro.

³² Jak'a rat naben achi'el jun ixoq ri k'ulan y ye'akusaj chik apo ch'aqa' chik achi'a' pan awachoch.

³³ Konojel k'a ixoqi' ri itzel kik'aslen, rije' k'o chi yetoj kan, jak'a rat xa man keri' ta naben. Xa ja rat ri yatojon-el kichin konojel ri ye'ajowan awichin. Ye'ayala' k'a sipanik chike ri achi'a' ri yepe pa taq jalajoj ruwach'ulew richin chi yemakun awik'in.

³⁴ Ri ixoq itzel ruk'aslen kan nikanox koma achi'a' y re achi'a' re' nikitoj kan chire. Jak'a rat man yakanox ta y roma ri' ja rat yatojon-el kichin y xa man jun nak'ul.

Ri Jehová xtuya' rutojbalil-mak pa ruwi' ri Jerusalem

³⁵ Rat Jerusalem abanon achi'el jun ixoq itzel ruk'aslen y roma ri' k'o chi xtawak'axaj ri nuq'atbel-tzij ri xtinya' pan awi'.

³⁶ Yin Jehová kan ninjikiba' nutzij chi kan xtinya' ruk'ayewal pan awi'. Rat kan xaben chi xach'anaba-awi' jumul chikiwech ri ye'ajowan awichin y kan man jun k'a k'ix chawech. Chuqa' xajech-awi' chikiwech y chuqa' xajech-awi' richin xaya' kiq'ij ri wachibel ri kan yenwixowaj yin. Y pa ruwi' ri' kan xaben richin xtix kikik'el ri awal richin chi xasuj kamelabel chikiwech ri wachibel ri'.

³⁷ Roma ri', xkenmol k'a konojel ri ye'ajowan awichin, ri xaben chike richin chi xemakun awik'in. Kan xkenmol k'a pe ri akuchi e peteneq-wi, richin chi xtinwelesaj k'a ri atziaq chikiwech y keri' xtikitz'et chi at ch'anel.

³⁸ Kan xtinq'et k'a tzij pan awi', achi'el niq'at-tzij pa ruwi' jun wineq kamisanel y jun ixoq itzel ruk'aslen. Y rik'in k'a janila woyowal xkatinjech pa kamik.

³⁹ Y kan xkatinjech pa kiq'a' ri e etzelanel awichin, richin xtikiwulaj ri akuchi naya' kiq'ij ri wachibel y chuqa' ri porobel ri ek'o pa taq bey. Xtink'uaj-el ronojel atziaq y ri jalajoj ruwech wiqobel ri k'o awik'in. Y kan man jun k'a xtik'oje' kan awik'in y kan xkach'ane' kan jumul.

⁴⁰ Y xkeyakatej k'a pa ruk'iyal ri winaqi' chawij y xkatkipotz' chi abej, k'ari' xkatkikamisaj rik'in espada.

⁴¹ Xtikiporoj kan ri awachoch y xtikiq'et-tzij pan awi'. Y re' kan chikiwech ch'aqa' chik tinamit xtibanatej-wi. Y keri' xtinben chawe richin xtaya' kan ri itzel k'aslen y man chik xke'atoj ta ri ye'ajowan awichin.

⁴² Y keri' xtinwelesaj k'a ri nimalej woyowal chawij y k'ari' xtich'uch'u' ri wánima y man jun bey chik xtipe woyowal chawe.

⁴³ Xtibek'uluwachitej re' roma rat kan man noqaqa ta chi'ak'u'x achike rubanik toq yin xatinyek-q'anej y xa xaben achi'el jun ixoq itzel ruk'aslen, y roma ri' yin xyakatej janila woyowal. Y jak'a re wakami xtinben chawe chi xtiqaqa ri rutojbalil-mak pan awi',

⁴⁴ Konojel k'a ri winaqi' ri nikibij etamabel taq tzij, xtikibij k'a pan awi': Achi'el ri te'ej, keri' ri ral.

⁴⁵ Y rat at achi'el jun ixjayilonel ri nrixowaj ri rachijil y yerixowaj chuqa' ri taq ral. Rat at achi'el chuqa' jun jay winaqi' ri xaxe ixoqi' ek'o. Y konojel rije' nikixowaj ri kachijil y chuqa' ri taq kal. Ri ate' jun hitita y ri atata' jun amorreo.

⁴⁶ Ri animal pa xaman k'o-wi y ri' ja ri Samaria y ri e kokoj taq rutinamit. Y ri achaq' pa xokon k'o-wi y rija' ja ri Sodoma y ri e kokoj taq rutinamit.

⁴⁷ Y kan xatzeqelibej ri itzel kibanobal y xaben ri man niqa' ta chinuwech yin. Y pa ruwi' ri', kan más itzel xaben chikiwech rije'.

⁴⁸ Kan ninjikiba' k'a nutzij pa nubi' yin, chi ri winaqi' aj-Sodoma y ri ek'o pa taq kokoj rutinamit kan man xkiben ta ri itzel achi'el ri xaben rat.

⁴⁹ Jare' k'a ri rumak ri xuben ri awach'alal Sodoma y ri kokoj taq rutinamit: Rije' kan xkinimirisaj k'a ki'. Chuqa' kan pa ruk'iyal ri xk'oje' kik'in, jak'a man xekito' ta ri e poqonatajineq y ri e molonel.

⁵⁰ Kan e nima'q k'a xkina-ki' y ri kibanobal kan man xqa' ta chinuwech. Y roma ri' xinya' k'a rutojbalil-mak pa kiwi'.

⁵¹ Ri rumak ri awach'alal Samaria, ni man napon ta nik'aj chire ri amak rat. Rat kan xik'o chik ruwi' ri amak ri xaben y roma ri' achi'el xa ta man jun kimak nik'ulun chinuwech ri e ka'i' awach'alal ri'.

⁵² Rat k'o chi nakoch' ri qasanri'il, roma más xamakun chikiwech ri e ka'i' awach'alal. Xaben chike rije' chi man jun kimak y roma ri' kan k'o chi xtawejqalej ri k'ix.

⁵³ Jak'a chike ri e ka'i' awach'alal kan xtinben chi xkeyakatej chik q'anej y kan xtinya' urtisanik pa kiwi'. Y chuqa' chawe rat kan xtinben chik chi kan xkabe pa jotol y xtinya' urtisanik pan awi'.

⁵⁴ Keri' xtakoch' ri k'ix roma ri xaben chike ri e ka'i' awach'alal y kan xkatok jun kuqubabel-k'u'x chike.

⁵⁵ Chupan ri q'ij ri', rat, ri Sodoma y ri Samaria kan jebel chik xtel chiwech ronojel achi'el rubanon-pe ojer.

⁵⁶ Rat xa xatze'en chirij ri Sodoma ri awach'alal toq rija' k'o pa ruk'ayewal,

⁵⁷ toq rat man jani tiqaqa-pe ri ruk'ayewal pan awi' roma ri itzel taq abanobal. Achi'el k'a rat xawixowaj ri Sodoma; re wakami ri winaqi' edomita, ri aj-Filistea y konojel ri tinamit ri ek'o chi'anaqaj xkatkixowaj chuqa' rat.

⁵⁸ Jak'a re wakami k'o chi xtatoj ri rutojbalil ri amak y ri itzel taq abanobal ri xe'abanala' ri kan man e koch'el ta y ri kan man yeqa' ta chinuwech yin.

⁵⁹ Y roma ronojel re', yin Jehová ninbij chi kan xtinya' k'a janila rutojbalil-mak pan awi' roma ri itzel abanobal y man xataqej ta ri atzij ri abin chuwe toq xqaben ri ya'on-tzij.

⁶⁰ Jak'a ri chawech-apo, yin kan xtinben jun utzil chawe, achi'el nubij ri jikibel-tzij ri nubanon awik'in toq rat k'a at xten na. Y kan xtinben k'a jun k'ak'a' jikibel-tzij awik'in richin q'asen.

⁶¹ Chupan ri q'ij ri', kan xkenyek chik q'anej ri Sodoma y ri Samaria ri e awach'alal. Jak'a rat man xkatok ta chik achi'el kach'alal. Rat xa kan xkatok achi'el jun te'ej achi'el nubij ri jikibel-tzij. Y roma ri' xtik'oje' ak'ix roma ri itzel ri xe'aben.

⁶² Yin kan xtinben k'a re jikibel-tzij re', richin tawetamaj chi ja yin Jehová ri a-Dios.

⁶³ Y chupan k'a ri q'ij ri' yin kan utz chik xkatintz'et rat Jerusalem. Y kan xtoqaqa chi'ak'u'x ri xaben y xtik'oje' ak'ix. Y kan man jun bey chik xtikijeq pa kichi' chawij. Ja yin Jehová ri yibin, xcha'.