Ez 13 - Kaqchiquel Bible

Ri xtipe pa kiwi' ri man qitzij ta e q'alajirisanela'

¹ Ri Jehová xch'on chik wik'in y xubij chuwe:

² Rat Ezequiel, kach'on k'a pa nubi' yin kik'in ri nikibananej chi nikiq'alajirisaj ri nuch'abel ri ek'o chiri' pa ruwach'ulew Israel y tabij chike chi tikak'axaj k'a ri nuch'abel, roma xa kiyon k'a rije' nikitz'uk-q'anej ri nikibij.

³ Yin Jehová ninbij chi toq'ex k'a kiwech ri e q'alajirisanela' ri xa kiyon rije' nikinojij y xa e nakaneq, roma ri yekibij xa man k'utumajineq ta chikiwech.

⁴ Rije' xa xech'abalin xaxe richin xkiq'axbej-ki' achi'el nikiben ri taq utiwa' ri nikikanoj kiway pa taq tinamit ri wulatejineq chik kan.

⁵ Rije' kan man jun rutzijol kiya'on chike ri awinaq, ni man jun kibanon richin yekito', richin chi yetikir nikito-ki' chuwech ri ruk'ayewal toq yin xtinya-pe pa kiwi'.

⁶ Nikibij chi k'o ri nik'utumej chikiwech, jak'a xa yesach. Nikibij ri peteneq chikiwech-apo, jak'a xa man qitzij ta ri nikibij. Kan pa nubi' yin yech'on-wi, jak'a xa man ja ta yin ri in taqayon-el kichin. Y pa ruwi' ri', kan nikoyobej chi nibanatej ri nikibij.

⁷ Rije' nikibij chi ja yin xibin chike, jak'a xa man jun nubin y roma ri' ri nik'utumej chikiwech y ri nikiq'alajirisaj ri peteneq chikiwech xa man qitzij ta.

⁸ Roma ri' yin Jehová kan xkibeyakatej chikij ri xa nikibananej ri nikibila' y chikij ri nikibij chi k'o nik'utumej chikiwech y xa man qitzij ta.

⁹ Kan xtinya' rutojbalil-mak pa kiwi' rije'. Re winaqi' k'a re' kan man xtikixol ta k'a ki' kik'in ri awinaq, stape' junan kijatzul. Chuqa' man xtitz'ibex ta kibi' chupan ri wuj ri akuchi tz'ibatel kan kibi' ri e aj pa rachoch kan ri Israel y kan man xketzolej ta chik pa kiruwach'ulew. K'ari' rije' xtiketamaj k'a chi ja yin Jehová.

¹⁰ Rije' xa xkiq'ol ri nutinamit y xkibij chike ri winaqi' chi ronojel utz beneq, toq xa man keri' ta. Rije' xkikusaj ri kich'abel xaxe richin xekichop ri winaqi' y ri kich'abel xa xuben achi'el xchumex rij jun tz'aq ri xa man kow ta k'o.

¹¹ Y tabij k'a chike chi re tz'aq re' xa xtibewulatej-pe, roma xa xtipe jun nimalej kaq'iq'-job y xkeqaqa k'a pe nima'q taq saqboch y k'ari' xtipe jun nimalej surkum chikij.

¹² Y toq ri tz'aq xtibewulatej-pe jari' toq ri winaqi' xtikibij k'a chike ri xechuman, chi achike roma ri chum man xuchop ta ri tz'aq.

¹³ Rik'in janila woyowal xtinben chi xtipe jun nimalej surkum, jun nimalej kaq'iq'-job y nima'q taq saqboch, richin keri' xtik'is ronojel.

¹⁴ Kan xtinwulaj k'a ri tz'aq richin ri Jerusalem ri xkichumaj rije'. Kan xtinqasaj k'a jumul pan ulew y kan xtibeq'alajin k'a pe ri ruxe'. Y ri winaqi' ri' kan xkemuqutej k'a chuxe' ri tz'aq ri'. K'ari' xtiketamaj ri ch'aqa' chik winaqi' chi ja yin Jehová.

¹⁵ Y kan xtinwelesaj k'a woyowal chirij ri tz'aq y chuqa' chikij ri xechuman rij. K'ari' yin xtinya' rutzijol chi kan man jun k'a xk'oje' kan chike rije'.

¹⁶ Jak'a ri q'alajirisanela' ri ek'o pan Israel ri xa xkibananej ri xkibij y xkiq'alajirisaj chire ri tinamit Jerusalem chi ronojel utz beneq, toq xa man keri' ta; konojel k'a rije' xkek'is. Yin Jehová ri yibin.

¹⁷ Rat Ezequiel, kach'on k'a kik'in ri ixoqi' ri ek'o pan atinamit ri yekitz'uk banobel richin nikiq'alajirisaj.

¹⁸ Tabij chike: Toq'ex kiwech ri yekitz'is taq tzieq richin nikiya' chirij kiq'a', richin k'o utz nuk'en-pe chike; y chuqa' yekiben tzieq richin nikiya' pa kijolon xaxe richin yekiya' pa pikbel ri achi'a'. Rije' xa nikisech kik'u'x ch'aqa' chik winaqi' richin nikikol-el ki' rije'.

¹⁹ Ri ixoqi' ri' xkiben kere' xaxe richin xkich'ek jun moq' cebada o xa jun k'ap kaxlan-wey. Rik'in ri kitz'ukun taq tzij kan xekikamisaj ri winaqi' ri xa man ruk'amon ta richin xeken y xekik'asba' kan winaqi' ri xa man ruk'amon ta richin yek'ase'.

²⁰ Roma ri', yin Jehová kan ninq'alajirisaj chi kan man utz ta nintz'et ri tzieq richin q'oloj ri achoq ik'in yekiq'ol ri winaqi', y yekichop achi'el nichap jun aj-xik' chikop. Yin kan xtinwelesaj ri tzieq chirij ri kiq'a' ri winaqi' ri' richin xketotej-el.

²¹ Chuqa' xtinretz k'a el ri tzieq ri nikiya' pa kijolon richin q'oloj y kan xkenkol k'a el ri awinaq pa kiq'a' ri ixoqi' ri'. Y keri' man xketikir ta chik xkekikoch'; y xtiketamaj chi ja yin Jehová.

²² Rik'in ri tz'ukuj-tzij ri xkiben chike ri winaqi' ri choj kik'aslen richin xmayamo-qa ri kánima, stape' xa man ja ta ri' ri nurayibel yin. Y chuqa' xkiya' kuchuq'a' ri yebanon etzelal richin nikiben más etzelal y keri' man xkekolotej ta.

²³ Roma ri', man jun bey chik xtik'utumej chikiwech ri man e qitzij ta, ni man xtiq'alajirisex ta chik ch'abel ri xa man e qitzij ta. Y yin kan xtinkol k'a el ri nutinamit pa kiq'a' y k'ari' xtiketamaj rije' chi ja yin Jehová, xcha'.