Ez 10 - Kaqchiquel Bible

Ri Jehová xuya' kan ri akuchi nuk'ut-wi-ri' pa rachoch

¹ Y xeri' yin xintz'et chik jun bey ri tz'uyubel ri k'o-q'anej pa ruwi' ri wokowik, ri k'o-q'anej pa kiwi' ri e kaji' querubín.

² Ri Jehová xch'on k'a rik'in ri tz'ibanel y xubij chire chi tibiyin-apo chikikojol ri ki-rueda ri querubín, richin napon rik'in ri q'aq' ri k'o pa nik'aj. Xeri' k'o chi nuk'en-pe jujun racheq-q'aq' pa ruq'a' richin norukiraj pa ruwi' ri tinamit. Y ri achin ri' kan xintz'et toq xok-apo.

³ Y ri querubín e pa'el k'a pa rijkiq'a' ri rachoch ri Jehová toq ri tz'ibanel xok-apo. Y chuqa' xpe k'a ri sutz' y xnojisaj ri ruwa-jay.

⁴ K'ari' ri ruk'ojlemal ri Jehová xyakatej-el pa ruwi' ri querubín y xbe pa ruchojmilal ri okibel richin ri rachoch ri Jehová. Y ri sutz' ri' xunojisaj ri jay y chuqa' kan xusaqirisaj ri ruwa-jay rik'in ri ruk'ojlemal ri Jehová.

⁵ Ri kixik' ri querubín kan niq'ajan y kan nak'axatej k'a ri jun chik ruwa-jay. Y nawak'axaj chi kan achi'el ja ta ri Jehová nich'on-pe.

⁶ Toq k'a juba' titaq-el ri tz'ibanel richin niberuk'ama-pe ri racheq-q'aq' ri k'o chikikojol ri querubín, rija' kan xbe y xbepa'e' chikinaqaj ri rueda.

^7-8 Jun chike ri querubín xuyuq-apo ri ruq'a' chuxe-qa ri ruxik' y xuya-qa pa racheq-q'aq' ri k'o chikikojol richin xuya-pe chire ri tz'ibanel. Y rija' kan xuk'en k'a pe ri racheq-q'aq' y xel-pe ri chiri' kik'in.

⁹ Chuqa' xintz'et chi chikijujunal ri querubín k'o jun ki-rueda pa'el pa taq kixikin y ri rueda ri' kan yeyok'olin k'a achi'el yeyok'olin ri jebelej jalajoj ruwech abej.

¹⁰ Y ri kibanik achi'el xa ta jun rueda pa'el chik jun rueda chupan, y keri' k'a kibanik chi e kaji'.

¹¹ Kan choj choj k'a yebe y junan yebe kik'in ri querubín. Toq rije' yetzolin-pe man yetzu'un ta kan juk'an chik chire ri kibey. Y chuqa' ri rueda man nikisq'opej ta ki' toq yetzolin-pe.

¹² Ri ruche'el-kij, ri kiq'a', ri kixik' y chijun ri kich'akul kan e nojineq chi runaq'-wachaj y keri' rubanon chikijujunal ri ki-rueda,

¹³ Chuqa' yin xinwak'axaj, chi ri rueda nibix chuqa' surkum*f2* chike.

¹⁴ Y chikijujunal k'a ri querubín k'o kaji' kipalej. Ri nabey achi'el rupalej jun wákix, ri ruka'n achi'el rupalej jun wineq, ri rox achi'el rupalej jun koj y ri rukaj achi'el rupalej jun kot.

¹⁵ Y kan ja rije' ri xentz'et yin chunaqaj ri raqen-ya' Quebar. Ri querubín ri' xeyakatej k'a el.

¹⁶ Y toq rije' yebiyin, ri rueda chuqa' yebiyin. Y toq ri querubín nikirik' ri kixik' richin yebe chikaj, ri rueda kan e kachibilan-el.

¹⁷ Toq rije' yepa'e-qa, ri rueda chuqa' yepa'e-qa. Y toq rije' yebe chikaj ri ki-rueda chuqa' yebe; roma kan ja rije' e yoyon kuchuq'a'.

¹⁸ Ri ruk'ojlemal ri Jehová ri k'o chuchi' ri rachoch xyakatej-el y xbek'oje' pa kiwi' ri e kaji' querubín.

¹⁹ Y re kaji' querubín re' xkirik' k'a el ri kixik' y kan chinuwech k'a yin xeyakatej-el. Y toq rije' xebe, chuqa' ri ki-rueda xebe. Y xebepa'e' chiri' pan okibel ri k'o pa relebel-q'ij chire ri rachoch ri Jehová. Y ri ruk'ojlemal ri Dios richin Israel xbepa'e' pa kiwi' rije'.

²⁰ Ja ri e kaji' ri k'o kik'aslen ri xintz'et ri chiri' chunaqaj ri raqen-ya' Quebar, kan ja querubín ri'.

²¹ Chikijujunal k'a k'o kajkej kipalej y kajkej kixik' y chuxe-qa ri kixik' k'o jun q'abaj achi'el ruq'a' ri wineq.

²² Y ri rubanik ri kipalej kan achi'el rubanik toq xentz'et chunaqaj ri raqen-ya' Quebar. Kan man jun kijalon ta, xa kan keri' ri kibanikil. Y chikijujunal xa kan choj nikitzeqelibej ri e beneq chikiwech.