Ez 1 - Kaqchiquel Bible

Ri Ezequiel xk'utumej ri ruk'ojlemal ri Dios chuwech

^1-3 Xk'uluwachitej k'a chi chupan ri juna' juwineq lajuj*f1* chupan ri ro' q'ij chire ri rukaj ik' chupan ri ro' juna', toq xk'amer-pe ri rey Joaquín pa ximonri'il; yin Ezequiel ri in sacerdote ruk'ajol kan ri Buzí. Ink'o k'a chunaqaj ri raqen-ya' Quebar chiri' pa ruwach'ulew Babilonia chikikojol ri nuwinaq ri e k'amon-pe pa ximonri'il. Jari' toq ri Jehová xch'on wik'in y kan jari' xoqaqa ri ruchuq'a' pa nuwi' y k'o k'a xuk'ut chinuwech.

⁴ Kan jari' xintz'et k'a chi pa xaman peteneq jun nimalej kaq'iq' ri ruk'amon-pe jun nimalej sutz' ri kan nirepelun y jun achi'el q'aq' ri nuk'aqala-el koyopa' y pa runik'ajal ri q'aq' ri' nirepelun achi'el ri q'enq'oj-pueq.

⁵ Chuqa' chiri' ek'o e kaji' ri k'o kik'aslen y ri kibanik kan e achi'el winaqi'.

⁶ Man rik'in ri' chikijujunal rije' k'o kaji' kipalej y kaji' kixik'.

⁷ Ri pakaqen kan achi'el kixk'eq wákix y ri kaqen kan e choj e choj. Kan yerepelun k'a achi'el nirepelun ri q'enq'oj-pueq toq jebel josq'in.

⁸ Y man xaxe ta k'o kajkej kipalej y kajkej kixik', xa kan k'o chuqa' kiq'a' chuxe-qa ri kixik' y ri rubanik ri kiq'a' kan achi'el ruq'a' wineq.

⁹ Chi e kaji' re' xa jun kibanon, jun nitzu'un pa xokon, jun pa xaman, jun pa relebel-q'ij y ri jun chik pa qajbel-q'ij. Y roma ri' ri ruxik' ri jun kan nutun ri' rik'in ri ruxik' ri jun chik. Y toq yesilon-el man nikisq'opej ta ki' ni man nikipiskolij ta ki', xa choj nikitzeqelibej ri e beneq chikiwech.

¹⁰ Y kere' k'a kibanik: Ri kipalej ri k'o chikiwech achi'el rupalej jun wineq. Ri kipalej ri k'o chikij achi'el rupalej jun kot. Ri kipalej ri k'o pa kijkiq'a' achi'el rupalej jun koj y ri kipalej ri k'o pa kajxokon achi'el rupalej jun wákix.

¹¹ Ri ka'i' kixik' kan rutunun ri' y ri ka'i' chik kixik' kan rukuchun-kij.

¹² Kan chikijujunal choj choj e beneq akuchi e yuqen-wi roma ri ruchuq'a' ri Dios. Y toq nikitzolij-ki' chikij man yetzu'un ta kan chikij. Y toq yebe pa kixokon o pa kijkiq'a', chuqa' man xetzu'un ta kan pa taq kixikin.

¹³ Rije' kan yesaqirisan achi'el nisaqirisan jun antorcha. Y chikikojol k'o achi'el racheq-q'aq' ri kan nik'a'on y chiri' nel-el achi'el koyopa'.

¹⁴ Y ri e kaji' ri' yebe-yepe nikiben, kan janila k'a anineq yebiyin, achi'el ri koyopa'.

¹⁵ Rokik e nutzuliben, jari' toq xentz'et chi ri pan ulew k'o jun ki-rueda pa'el pa taq kixikin.

¹⁶ Ri rueda ri' kan junan k'a kibanik chi e kaji'. Kan yeyok'olin achi'el ri jalajoj ruwech jebelej taq abej. Y chuqa' chikijujunal ri rueda ri' niq'alajin chi k'o jun chik rueda chupan,

¹⁷ re' richin chi yebe pa taq kaji' ruxikin ri ruwach'ulew, jak'a man nikipiskolij ta el ki' toq yebe pa kajxokon y pa kijkiq'a'.

¹⁸ Y xintz'et k'a chi ri rusutilen ri kaji' ki-rueda nej k'a jotol chikaj y nojineq rik'in runaq' taq kiwech y kan nak'en k'a kikiy.

¹⁹ Y toq yesilon-el o toq yebe chikaj, ri rueda ri' chuqa' e kachibilan-el.

²⁰ Ri kaji' rueda ri' kan yebe akuchi e uk'uan-wi koma ri e kaji' achi'el winaqi'.

²¹ Y toq ri e achi'el winaqi' yesilon-el, chuqa' yesilon-el ri rueda. Toq rije' yepa'e-qa, chuqa' ri rueda yepa'e-qa. Toq yeyakatej-el chuwech re ruwach'ulew, chuqa' ri rueda yeyakatej-el, roma e uk'uan-el koma rije'.

²² Pa kiwi-q'anej rije' k'o k'a jun ri achi'el chay nitzu'un, wokowik ri kan namey rubanik.

²³ Y chuxe-qa ri wokowik ri' kirik'on ka'i' kixik' y keri' nuk'ul-ri' ri rutza'n ri kixik' rik'in ri jun chik. Y chikijujunal k'a rije' kirik'on ri ka'i' chik kixik' chikij-qa rije'.

²⁴ Xinwak'axaj k'a chi ri kixik' kan janila niq'ajan toq yexik'an pa kaq'iq'. Kan yewajin achi'el niwajin jun raqen-ya'. Kan nak'axatej achi'el xa ta ri ruch'abel ri Dios ri k'o ronojel uchuq'a' pa ruq'a', y chuqa' achi'el xa ta e janila e k'iy winaqi' ek'o. Y toq man xexik'an ta chik xkiqasaj-qa ri kixik'.

²⁵ Toq xkiqasaj-qa ri kixik', jari' toq xak'axatej jun ch'abel pa ruwi-q'anej ri wokowik.

²⁶ Y pa ruwi' ri', xintz'et k'a chi k'o jun ri achi'el rubanik jun tz'uyubel, ri niyok'olin achi'el jun jebelej raxroj-abej y pa ruwi' ri' niyakatej-el jun achi'el wineq.

²⁷ Y kere' ri rubanik: Nitiker-el xerupan k'a pa jotol kan nirepelun achi'el xa ta jun ch'ich' ri nibiron pa q'aq'. Y ri xerupan pa xulan xintz'et chi achi'el xa ta q'aq' y kan rusaqirisan chijun rij,

²⁸ kan achi'el k'a ri kotoq'a' ri niq'alajin chupan ri sutz' pa ruq'ijul job. Keri' toq ri Jehová xuk'ut ri ruk'ojlemal chinuwech y xaxe k'a toq xintz'et ronojel re' kixukuk xiqaqa k'a pan ulew. Y k'ari' xinwak'axaj toq rija' xch'on-pe wik'in.