Ex 9 - Kaqchiquel Bible

Ri ruk'ayewal ri xqaqa pa kiwi' ri chikopi'

¹ K'ari' ri Jehová Dios xubij chik chire ri Moisés: Katapon chik jun bey rik'in ri rey y tabij chire: Ri qa-Dios roj ri oj israelita nubij chi taya' q'ij chiqe richin yojbe, richin chi roj nibeqasamajij.

² Roma wi man naya' ta q'ij richin yojbe y xa kan xaxe yojaq'et-qa,

³ ri Jehová kan xtuya' jun nimalej yabil pa kiwi' ri iwawej, ri ek'o pa taq juyu'; pa kiwi' ri kiej, ri kowilej taq kiej, ri camello, ri wákix y pa kiwi' ri karne'l.

⁴ Jak'a ri Jehová kan xtuben rukojolil rik'in ri kawej ri israelita, rik'in ri kawej ri aj-Egipto. Y roma ri' man jun chire ri kawej ri israelita ri xtiken ta, kacha' chire, xcha' ri Jehová.

⁵ Y ri Jehová kan xujikiba' k'a: Chua'q xtibanatej re' chuwech re ruwach'ulew.

⁶ Y ri pa ruka'n q'ij, ri Jehová kan xuben-wi ri xubij: Xeken k'a ronojel ri kawej ri aj-Egipto, jak'a chike ri kawej ri winaqi' israelita man jun ri xken ta.

⁷ Y jari' toq ri rey xeruteq k'a jujun achi'a' chutz'etik wi k'o xbanatej ri chiri' kik'in ri kawej ri israelita y xkitz'et chi xa man jun chire ri kawej ri israelita ri xken ta. Man rik'in ri' ri rey xukowirisaj chik ri ránima y man xuya' ta q'ij richin xel-el ri tinamit Israel.

Toq xpe ch'a'k chikij ri winaqi' y ri chikopi'

⁸ Ri Jehová xubij chire ri Moisés y chire ri Aarón: Tik'uaj-el jujun moq' aq'ab pan iq'a' y toq yixapon chuwech ri rey, rat Moisés kan tak'aqa' k'a ri aq'ab chikaj.

⁹ Y ri aq'ab ri' kan kok'-kok' k'a xtuben y xtutaluj-ri' pa ruwi' chijun ri ruwach'ulew Egipto y re' xtuben chike chi xtipe ruk'aqatil ri kich'akul y xtich'akan. Keri' chikij ri winaqi' y chikij chuqa' ri kawej, xcha'.

¹⁰ K'ari' ri Moisés y ri Aarón kan xkimoq'ej k'a el ri aq'ab pa taq kiq'a' y xebe rik'in ri rey. Y chiri' ri Moisés xujopij ri aq'ab chikaj y kan xpe k'a ch'a'k chikij ri winaqi' aj-Egipto y chikij ri kawej.

¹¹ Y chupan ri q'ij ri' ri aj-itza' kan man xetikir ta chik xe'apon toq xapon ri Moisés, roma rije' xa k'o chik k'a ch'a'k chikij. Ri ch'a'k ri' kan xqaqa k'a chikij ri aj-itza' y chikij konojel ri winaqi' aj-Egipto.

¹² Y ri Jehová xukowirisaj chik k'a jun bey ri ránima ri rey y roma ri' man xerak'axaj ta ri Moisés y ri Aarón kan achi'el ri bin chik chike.

Ri ruk'ayewal roma ri saqboch

¹³ Ri Jehová xch'on chik k'a jun bey rik'in ri Moisés y xubij: Chua'q kayakatej nimaq'a' yan y kach'on k'a rik'in ri rey y tabij chire chi yin Jehová ri i-Dios rix israelita ninbij: Taya' q'ij chire ri nutinamit richin nel-el richin yirusamajij.

¹⁴ Roma wi man keri' ta xtaben, wakami yin xtinteq-pe ronojel ruwech nima'q taq ruk'ayewal pan awi' rat, pa kiwi' ri aj-raqen y pa kiwi' konojel ri awinaq, richin chi tawetamaj chi kan man jun chik Dios k'o chuwech re chuwach'ulew, ri achi'el yin.

¹⁵ Wi ta yin wajowan, xatinkamisaj yan ta rik'in ri nima'q taq ruk'ayewal y xaken yan ta rat y konojel ri awinaq y kan xixk'is yan ta el chi'iwonojel chuwech re ruwach'ulew.

¹⁶ Jak'a yin kan qitzij ri ninbij chawe chi kan nuya'on-wi ri ak'aslen, richin chi ri nibanatej awik'in, xtuben chi niq'alajin ri wuchuq'a' yin; y keri' kan xtinimirisex k'a ri nubi', chuwech chijun re ruwach'ulew.

¹⁷ Man rik'in ri' rat kan k'a animirisan na awi' y man naya' ta q'ij chi ri nuwinaq ye'el-el.

¹⁸ Tatz'eta' na pe, ke taq wa' chua'q, yin xtinteq-pe nimalej taq saqboch pan awi' ri janila ralal, ri kan man jun bey qajineq pa ruwi' ri Egipto jampe' tz'ukutajineq-pe.

¹⁹ Roma ri' tataqa' kik'amik konojel ri awawej y ronojel ri e awichin rat ri ek'o pa taq juyu', roma xabachike wineq o chikop ri k'a k'o na kan pa juyu', toq xtiqaqa ri saqboch, xa xkeken, xkacha' chire ri rey, xcha' ri Jehová.

²⁰ Ek'o k'a jujun chike ri aj-raqen aj-Egipto, ri xkik'en rukiy ri ruch'abel ri Jehová. Roma ri' kan xeparel k'a y xekik'ol ri kawej y ri kisamajela', richin xekik'en-pe pa jay.

²¹ Jak'a ri aj-raqen, ri aj-Egipto, ri man xeniman ta chire ri ruch'abel ri Jehová, xa xekiya' kan ri kawej y ri kisamajela' ri pa taq juyu'.

²² Y jari' toq ri Jehová xubij chire ri Moisés: Tatzeqej la ach'ame'y chikaj richin keri' kan xtibeqaqa-pe ri saqboch chikaj pa kiwi' ri winaqi' aj-Egipto, pa kiwi' ri kawej y pa ruwi' ronojel ri kitiko'n, xcha'.

²³ Ri Moisés kan xutzeqej k'a ri ruch'ame'y chikaj y jari' toq ri Jehová xuben chi xpe koqolajay, koyopa' y saqboch y xuben chi chijun Egipto xqaqa ri saqboch y q'aq' pa ruwi'.

²⁴ Ri ruq'aq'al ri koyopa' y ri saqboch xqaqa k'a pa ruwi' chijun Egipto y ri saqboch kan janila k'a kalal. Ri chiri' kan man jun bey k'a qajineq ta saqboch achi'el re', jampe' ek'o-pe winaqi'.

²⁵ Ri chiri' pan Egipto, kan ronojel k'a xk'is pa ruq'a' ri saqboch. Xek'is ri winaqi', ri chikopi', ri xek'oje' kan pa taq juyu' y chuqa' xek'is ri tiko'n, ronojel kiwech che' y chuqa' ri q'ayis.

²⁶ Y xaxe k'a chupan ri ruwach'ulew Gosen ri akuchi ek'o-wi ri winaqi' israelita, man jun saqboch xqaqa.

²⁷ K'ari' ri rey xuteq koyoxik ri Moisés y ri Aarón y xubij chike: Wakami ninna' chi ximakun, roma ri Jehová kan janila choj ri nuben, jak'a yin y ri nuwinaq xa oj itzel taq winaqi' chuwech.

²⁸ Kixch'on k'a rik'in ri Jehová pa qawi' roj, roma xa man niqajo' ta chik koqolajay ni saqboch. Yin xa man ninwajo' ta chik yixk'oje-qa wawe', xcha' ri rey chike.

²⁹ Y ri Moisés xubij: Kan xaxe k'a xkinel-el chuchi' re nima-tinamit re', xtinyek ri nuq'a' chikaj, y xtink'utuj k'a chire ri Jehová, y kan xtitane' k'a ri koqolajay y ri saqboch, richin keri' nawetamaj chi ja ri Jehová rajaw re ruwach'ulew.

³⁰ Y yin kan wetaman k'a chi chawech rat y chikiwech ri aj-raqen maneq rukiy ri Jehová Dios chiwech, xcha' ri Moisés.

³¹ Ri q'ij ri' ri cebada y ri lino xek'is pa ruq'a' ri saqboch y ri cebada xa jebel chik rubanon ri ruwi' y ri lino nisijan chik.

³² Jak'a ri trigo y ri jun chik ruwech tiko'n rubini'an centeno, roma xa k'arunaj ye'el-pe, ri saqboch man jun xuben chike.

³³ Y toq ri Moisés xel-el chupan ri tinamit toq k'a juba' tich'on kan rik'in ri rey, jari' toq xuyek ri ruq'a' chikaj y xch'on rik'in ri Jehová y jari' toq xtane-qa ri koqolajay, ri saqboch y xtane' chuqa' ri job ri najin pa ruwi' ri ruwach'ulew.

³⁴ Jak'a toq ri rey xutz'et chi ri job, ri saqboch y ri koqolajay xetane', kan xmakun chik k'a jun bey. Rija' y ri aj-raqen kan xkikowirisaj k'a ri kánima.

³⁵ Y keri', ri rey kan xukowirisaj chik k'a ri ránima y man xuya' ta q'ij chi ri e rijatzul kan ri Israel, xebe ta. Kan xbanatej k'a achi'el ri ruq'alajirisan ri Jehová chire ri Moisés.