Ex 8 - Kaqchiquel Bible

¹ Jari' toq ri Jehová xch'on chik jun bey rik'in ri Moisés y xubij chire: Katapon chik jun bey chuwech ri rey y tabij chire chi yin kere' ninbij: Taya' q'ij chire ri nutinamit richin nibe y yirusamajij.

² Roma wi man xtaya' ta q'ij richin ye'el-el, yin xtinya' ruk'ayewal pan awi' y xkenteq-pe xkalet pa ruwi' chijun ri aruwach'ulew.

³ Y chupan ri raqen-ya' xkebetz'ukutej-pe janila chi xkalet, re' xkebe'el-pe y xke'ok pan awachoch, xke'ok akuchi yawer-wi, xkejote' pa ruwi' ri ach'at, pa kachoch ri asamajela', pa kachoch konojel ri awinaq, xke'ok chupan ri akuchi nachaq'arisaj-wi ri akaxlan-way y xkejote' pa taq aq'e'n.

⁴ Ri xkalet ri' xkejoteyaj chawij rat, chikij ri asamajela' y chikij konojel ri awinaq, xkacha' chire ri rey, xcha' ri Jehová.

⁵ Jari' toq ri Jehová xubij chire ri Moisés chi ri Aarón tutzeqej ri ruch'ame'y pa kiwi' ri raqen taq ya' chi ch'uti'q chi nima'q y pa kiwi' ri ya' ri e rimil pa taq ulew, richin xkebetz'ukutej-pe xkalet y nikinojisaj ri ruwach'ulew Egipto.

⁶ Y ri Aarón xutzeqej k'a ri ruch'ame'y pa kiwi' ri ya' richin Egipto y kan chijun k'a kiruwach'ulew xnoj chi xkalet.

⁷ Jak'a ri aj-itza' kan keri' chuqa' xkiben. Rik'in ri itzel uchuq'a' ri k'o kik'in xkiben chi kan xebek'ulun-pe chuqa' xkalet chijun ruwach'ulew Egipto.

⁸ Y jari' toq ri rey xuteq koyoxik ri Moisés y ri Aarón y xubij chike: Tik'utuj chire ri Jehová chi kerelesaj-el re xkalet wawe' wik'in yin y kik'in konojel ri nuwinaq y yin xtinya' k'a q'ij chiwe richin xtibesuju' kamelabel chire ri Jehová, xcha' ri rey.

⁹ Jari' toq ri Moisés xubij chire ri rey: Xaxe tabij chuwe toq xtawajo' richin nink'utuj chire ri Jehová Dios richin kerelesaj-el re xkalet pan awachoch rat, pa kachoch ri aj-raqen y pa kachoch ri awinaq. Xke'el k'a el pa taq iwachoch y xkek'oje' kan xaxe chupan ri raqen-ya', xcha' ri Moisés.

¹⁰ Ja ri chua'q ninwajo' yin, xcha' ri rey. Y ri Moisés xubij k'a kan: Keri' xtibanatej richin nawetamaj chi kan man jun chik achi'el ri Jehová ri qa-Dios roj.

¹¹ Ri xkalet kan xkatkiya' k'a kan, xke'el-el chupan ri awachoch, pa kachoch ri aj-raqen, pa kachoch konojel ri awinaq y xkek'oje' kan xaxe chupan ri raqen-ya' Nilo, xcha'.

¹² K'ari' ri Moisés y ri Aarón xe'el-pe rik'in ri rey. Jari' toq ri Moisés kan rik'in uchuq'a' xuk'utuj chire ri Jehová Dios chi kerelesaj ri xkalet ri e rutaqon-pe chirij ri rey.

¹³ Ri Jehová xuben k'a achi'el ri xuk'utuj ri Moisés, kan xeken k'a konojel ri xkalet ri ek'o pa taq jay, ri ek'o chuwa taq jay y ri ek'o pa taq juyu',

¹⁴ y ri winaqi' xekimol k'a pa taq tzubaj y chijun ri ruwach'ulew xchuwir koma ri kaminaqi' taq xkalet.

¹⁵ Y toq ri rey xuna' chi k'o chik uxlanen, roma ri xkalet xa e maneq chik, jari' toq xukowirisaj más ri ránima y man xniman ta chike ri Moisés y ri Aarón, kan achi'el ri rubin ri Jehová.

Ri ruk'ayewal roma ri janila chi xenen

¹⁶ Xeri' ri Jehová xch'on chik jun bey rik'in ri Moisés y kere' xubij chire: Tabij chire ri Aarón: Tayaka' ri ach'ame'y y tanaqa' ruwi' la poqolaj ri k'o pa ruwi' ri ruwach'ulew, y keri' xkeyakatej janila chi xenen chupan chijun ri ruwach'ulew Egipto, xcha' ri Dios.

¹⁷ Y rije' kan keri' xkiben. Ri Aarón xuneq rik'in ri ruch'ame'y ri ruwi' ri poqolaj y kan jari' ronojel ri poqolaj ri k'o pan Egipto xok xenen y kan xek'oje' k'a xenen chikij ri winaqi' y ri chikopi'.

¹⁸ Jak'a ri aj-itza' richin Egipto xkajo' chuqa' xkiben keri' rik'in ri itzel uchuq'a' ri k'o kik'in y xa man xetikir ta y keri' xek'oje' k'a xenen chikij ri winaqi' y chikij ri chikopi'.

¹⁹ Roma ri' ri aj-itza' xkibij chire ri rey: Re' kan rusamaj-wi ri Dios, xecha'. Jak'a ri rey xa más xukowirisaj ri ránima, y man xerak'axaj ta chik ri Moisés y ri Aarón, kan achi'el ri rubin ri Jehová.

Ri ruk'ayewal roma janila chi amolo'

²⁰ Ri Jehová xch'on chik jun bey rik'in ri Moisés y xubij chire: Ri rey nibe pa raqen-ya' ri chua'q nimaq'a'. Roma ri' rat kan kayakatej k'a nimaq'a' yan, richin yach'on rik'in y tabij chire chi yin Jehová ninbij: Taya' q'ij chire ri nutinamit richin nel-el richin yirusamajij.

²¹ Roma wi man naya' ta q'ij chike richin yebe, yin kan xtinteq-pe pa botzaj amolo' pan awi' rat, pa kiwi' ri aj-raqen, pa kiwi' ri awinaq, y pa taq iwachoch. Y kan chijun k'a ri aruwach'ulew ri akuchi ek'o-wi ri awinaq, kan xtinoj chi amolo', achi'el jun sutz' xtuben pa ruwi' ri ulew.

²² Toq xtibanatej k'a keri', ri pa ruwach'ulew Gosen ri akuchi ek'o-wi ri israelita, kan man jun k'a botzaj amolo' xtapon chiri'. Y keri' xtawetamaj k'a chi yin Jehová ink'o chikikojol rije'.

²³ Yin kan xtinya' k'a rukojol rik'in ri nutinamit yin y ri atinamit rat; y re nimalej nubanobal richin retal, ja yan ri chua'q xtibanatej, xkacha' chire ri rey, xcha' ri Dios.

²⁴ Ri Jehová kan keri' xuben y xepe ri amolo'. Kan yejopop k'a, xe'ok pa rachoch ri rey, ri pa taq kachoch ri rusamajela' y chijun ruwach'ulew richin Egipto. Xkinojisaj k'a chijun ri ruwach'ulew y xabakuchi k'a ye'okiyaj y yeqajlan-wi.

²⁵ K'ari' ri rey xuteq chik koyoxik ri Moisés y ri Aarón y xubij chike: Kixbiyin tibesuju' kamelabel chire ri i-Dios, jak'a man yixel ta el chupan ri ruk'ulba't ri Egipto, xcha'.

²⁶ Jak'a ri Moisés xubij: Man ruk'amon ta k'a chi xa wawe' pan Egipto niqasuj ri kamelabel chire ri Jehová ri qa-Dios roj, roma man xtiqa' ta chikiwech ri winaqi' aj wawe'. Roma xa ta keri' niqaben chikiwech, xqojketzelaj y xqojkikamisaj chi abej.

²⁷ Roma ri' xa kan k'atzinel xqojbiyin na oxi' q'ij pa tz'iran ruwach'ulew. Y chiri' xtiqasuj kamelabel chire ri Jehová ri qa-Dios, kan achi'el ri rubin chiqe, xcha' ri Moisés.

²⁸ Y ri rey xubij: Yin kan xtinya' k'a q'ij chiwe richin xkixbe richin xtibesuju' kamelabel chire ri Jehová ri i-Dios pa tz'iran ruwach'ulew, jak'a man yixbe ta más nej y tibana' utzil xkixch'on rik'in ri i-Dios pa nuwi' yin, xcha'.

²⁹ Jak'a ri Moisés xubij: Kan xaxe k'a toq xkinel-el wawe' xtink'utuj chire ri Jehová chi chua'q xkerelesaj re botzaj amolo' re', pan awi' rat, pa kiwi' ri aj-raqen, pa kiwi' konojel ri awinaq. Xaxe man ta chik xqojaq'ol y man ta chik xqojaq'et richin nibeqaya' ruq'ij ri Jehová, richin nibeqasuju' kamelabel chire, xcha'.

³⁰ Xeri' ri Moisés xel-pe rik'in ri rey, y xch'on rik'in ri Jehová,

³¹ y ri Jehová kan xuben k'a achi'el ri xuk'utuj ri Moisés. Xerelesaj k'a el ronojel ri amolo' rik'in ri rey, kik'in ri aj-raqen, kik'in konojel ri ruwinaq y kan man jun k'a amolo' xk'oje' ta kan.

³² Jak'a ri rey xa xukowirisaj chik jun bey ri ránima y man xuya' ta q'ij richin xebe ri israelita.