Ex 7 - Kaqchiquel Bible

¹ K'ari' ri Jehová xubij chire ri Moisés: Ninya' q'ij chawe chi ja rat ri yabe pa nuk'exel chuwech ri rey y ja ri animal Aarón jari' ri xtibin-apo ri ch'abel ri nawajo' chi nrak'axaj.

² K'o chi xtabij chire ri Aarón ronojel ri xtinbij chawe yin y rija' xtubij chire ri rey ronojel ri xtabij rat chire, richin keri' tuya-el q'ij chike ri iwinaq richin chi ke'el-el chupan re ruwach'ulew re'.

³ Jak'a yin kan xtinkowirisaj k'a ri ránima ri rey, stape' kan xtinben k'a k'iy ruwech meyel taq banobel re wawe' pan Egipto.

⁴ Ri rey kan man xkixrak'axaj ta k'a. Jak'a yin kan xtink'ut k'a ri nimalej wuchuq'a' pa ruwi' ri Egipto rik'in nima'q taq ruk'ayewal. Y pa taq tzobaj k'a xkixinnuk' richin xkixinwelesaj-el rix ri ix nutinamit.

⁵ Y ri aj-Egipto kan xtiketamaj k'a in achike yin Jehová, toq xtink'ut ri nimalej wuchuq'a' chikiwech y xkenwelesaj-el ri israelita chikikojol rije', xcha' ri Dios chike.

⁶ Ri Moisés y ri Aarón kan xkiben k'a ronojel ri xubij ri Jehová chike.

⁷ Ri Moisés k'o k'a jumuch' rujuna' y ri Aarón k'o k'a jumuch' oxi' rujuna', ri q'ij toq xech'on rik'in ri rey.

Ri ruch'ame'y ri Aarón

⁸ Ri Jehová xch'on chik k'a jun bey kik'in ri Moisés y ri Aarón y kere' ri xubij chike:

⁹ Wi ta ri rey xtubij chiwe chi tik'utu' jun nimalej banobel chuwech. Rat xtabij k'a chire ri Aarón chi tuchapa' ri ch'ame'y y tuk'aqa' pan ulew, chuwech-apo ri rey y ri ch'ame'y kan xtok kumetz, xcha' ri Dios.

¹⁰ Y xebe k'a ri Moisés y ri Aarón rik'in ri rey y kan xkiben k'a ronojel ri rubin ri Jehová Dios chike. Ri Aarón xuk'eq-qa ri ruch'ame'y chuwech ri rey y chikiwech ri aj-raqen ri yesamej rik'in, y ri ch'ame'y ri' xok kumetz.

¹¹ Jari' toq ri rey xuteq koyoxik ri achi'a' aj-na'oj y ri achi'a' ri aj-itza'. Y toq rije' xe'apon kan xkiben chuqa' achi'el xuben ri Aarón.

¹² Kan chikijujunal k'a rije' xkik'eq-qa ri kich'ame'y y xe'ok kumetz, jak'a ri richin ri Aarón xerubeq' ri kichin rije'.

¹³ Y toq ri rey xutz'et re', xukowirisaj más ri ránima. Y man xerak'axaj ta, achi'el ri rubin chik ri Jehová chire ri Moisés y chire ri Aarón.

Ri ruk'ayewal toq ri ya' pan Egipto xok kik'

¹⁴ Y k'ari' ri Jehová xubij chire ri Moisés: Ri rey kan janila k'a rukowirisan-ri', roma ri' man nuya' ta q'ij richin nibe ri tinamit.

¹⁵ Ri chua'q nimaq'a' yan yabe k'a chuchi' ri raqen-ya' Nilo, roma ri rey napon chuqa' chiri' y kan tabana' k'a chi nabek'ulu-awi' rik'in. Y kan tak'uaj k'a el ri ch'ame'y ri xok kumetz.

¹⁶ Kere' tabij chire ri rey: Ri Jehová ri qa-Dios roj israelita in rutaqon-pe richin nonbij chawe rat chi taya' q'ij chiqe richin nibeqasamajij ri qa-Dios ri chiri' pa tz'iran ruwach'ulew. Jak'a rat xa man awajowan ta awak'axan ri rutzij ri Dios.

¹⁷ Roma ri', rix xtiwetamaj k'a ruwech achike ri Jehová, roma rik'in re ch'ame'y re k'o pa nuq'a' xtinneq-qa re ya' richin re raqen-ya' Nilo y xtok k'a kik'.

¹⁸ Y konojel ri ker ri ek'o chupan ri ya' xkeken y xtichuwir-pe ri ya'. Y ri aj-Egipto kan man xketikir ta xtikiqum ri ya', xkacha', xcha' ri Jehová chire ri Moisés.

¹⁹ Y jari' toq ri Jehová xubij chuqa' chire ri Moisés: Kere' tabij chire ri Aarón: Tachapa' ri ach'ame'y y tatzeqej pa kiwi' ri ya' ri ek'o pan Egipto. Y xke'ok k'a kik' ri raqen taq ya', ri taq ch'uti'n raqen taq ya', ri ya' ri e rimil pa taq ulew, ri ek'o pa yakbel taq ya'. Kan ronojel k'a ri ya' ri ek'o pan Egipto xtok kik' y chuqa' ri ya' ri ek'o pa taq yakbel-ya' ri e banon rik'in che' y ri e banon rik'in abej, xcha'.

²⁰ Ri Moisés y ri Aarón kan xkiben k'a ronojel ri rubin-el ri Jehová. Ri Aarón xutzeqej k'a ri ruch'ame'y y xuneq-qa ri raqen-ya' Nilo chuwech ri rey y chikiwech ri aj-raqen y ri raqen-ya' kan xok k'a kik'.

²¹ Y ri ker ri ek'o chupan ri raqen-ya' ri' xeken, y ri ya' xchuwir-pe chi'anin. Y roma ri' ri aj-Egipto man yetikir ta chik nikiqum. Kan ronojel k'a ri ya' richin chijun ruwach'ulew Egipto xok kik'.

²² Y ri aj-itza' kan xkiben chuqa' keri' rik'in ri itzel uchuq'a' ri k'o kik'in y roma ri' ri rey xukowirisaj más ri ránima. Y man xniman ta chike ri Moisés y ri Aarón, achi'el rubin ri Jehová.

²³ Man rik'in ri' ri rey xa xtzolej-el y xbe k'a pa rachoch ri akuchi niq'aton-wi-tzij y man xniman ta chire ri nibanatej.

²⁴ Konojel k'a ri winaqi' richin Egipto xkik'otola' k'a ruchi' ri raqen-ya' Nilo richin nikikanoj ya' ch'ajch'oj, richin chi nikiqum, roma ri ya' richin ri raqen-ya' man yetikir ta chik nikiqum.

Ri ruk'ayewal roma ek'o xkalet xabakuchi

²⁵ Y keri' xtz'aqet k'a wuqu' q'ij chi ri Jehová xuben kik' chire ri ya'.