Ex 6 - Kaqchiquel Bible

¹ Jari' toq ri Jehová Dios xubij chire ri Moisés: Wakami xtabetz'eta' ri xtinbenbana' rik'in ri rey, rik'in ri wuchuq'a' yin. Rija' xtuya-el q'ij chiwe y xkixroqotaj-el chupan ri rutinamit, xcha' ri Jehová.

Ri Jehová Dios nroyoj ri Moisés jun bey chik

² Ri Dios xch'on chik jun bey rik'in ri Moisés y xubij chire: JA YIN RI JEHOVÁ.

³ Jak'a yin ri' ri xink'ut-wi' chuwech ri Abraham, ri Isaac y ri Jacob, y xink'ut-wi' chikiwech achi'el RI DIOS RI NITIKIR NUBEN RONOJEL; y man jun bey xketamaj ta nuwech rik'in ri nubi' Jehová.

⁴ Chuqa' xinjikiba' chike chi ninya' ri ruwach'ulew richin ri Canaán chike, ri akuchi xeq'ax yan juba'.

⁵ Keri' chuqa' yin xinwak'axaj ri kijiloj ri awinaq israelita, ri e yuqul pa samaj kik'in ri aj-Egipto y roma ri' xoqaqa chinuk'u'x ri nujikiban chike ri iwati't-imama'.

⁶ Wakami k'a kabiyin y tabebij chike ri awinaq: Ja yin Jehová, y ja yin xkinelesan-el iwichin chuxe' ri kowilej taq samaj y xkixtotej k'a el chuwech ri ilinri'il, y rik'in ri nimalej wuchuq'a', yin xtinq'et-tzij pa kiwi' rik'in nima'q taq ruk'ayewal.

⁷ Y xkixok k'a nutinamit y yin xkinok i-Dios, y xtiwetamaj k'a chi ja yin Jehová ri i-Dios ri xixelesan-pe chuxe' ri kowilej taq samaj pan Egipto.

⁸ Xkixink'uaj chupan ri ruwach'ulew ri nusujun-pe chike ri Abraham, ri Isaac y ri Jacob, Y YIN RI JEHOVÁ xtinya' k'a kan chiwe rix, richin xtiwichinaj, kacha' chike, xcha' ri Jehová.

⁹ Ronojel k'a ri xubij ri Jehová, xutzijoj k'a ri Moisés chike ri ruwinaq. Jak'a rije' xa man xkak'axaj ta roma xa kimalin chik kik'u'x roma ri ilinri'il.

¹⁰ Chirij re', ri Jehová xch'on chik rik'in ri Moisés y xubij chire:

¹¹ Kabiyin chik k'a jun bey rik'in ri rey richin ri Egipto y tabij chire chi tuya' q'ij chiwe richin chi yixel-el chupan re ruwach'ulew, xcha' ri Jehová.

¹² Jak'a ri Moisés xubij chire ri Jehová: Man yinkak'axaj ta na ri nuwinaq israelita, k'atala' chik k'a ri rey, roma yin xa man nel ta ok nuch'abel, xcha'.

¹³ Y ri Jehová xch'on kik'in ri Moisés y ri Aarón y xubij chike ri achike ruk'amon richin nikiben ri winaqi' israelita y ri ruk'amon chi nuben ri rey richin ri ruwach'ulew Egipto, roma rije' k'o chi yekelesaj-pe ri winaqi' chiri'.

Ri kibi' ri kati't-kimama' ri Moisés y ri Aarón

¹⁴ Jere' k'a ri e tata'aj kichin ri tzobaj winaqi', kichin ri e rijatzul kan ri Israel. Ri e ruk'ajol ri Rubén, ri nabey ruk'ajol ri Israel: Je ri Hanoc, ri Falú, ri Hesrón y ri Carmí. Jere' ri tzobaj winaqi' ri xetz'ukutej-pe kik'in ri e rijatzul kan ri Rubén.

¹⁵ Ri e ruk'ajol kan ri Simeón: Ja ri Jemuel, ri Jamín, ri Óhad, ri Jaquín, ri Sóhar y ri jun chik ruk'ajol ja ri Saúl, ri ral kan ri jun ixoq aj-Canaán. Jere' ri tzobaj winaqi' ri xetz'ukutej-pe kik'in ri e rijatzul kan ri Simeón.

¹⁶ Y jere' ri kibi' k'a chikijujunal ri e ruk'ajol ri Leví ri nitiker-pe rik'in ri nimalaxel k'a rik'in ri chaq'laxel. Y ri' ja ri Guersón, ri Quehat y ri Merarí. Y ri Leví xk'ase' k'a 137 juna'.

¹⁷ Jare' ri ruchojmilal ri tzobaj winaqi' kichin ri e ruk'ajol ri Guersón: Ja ri Libní, y ri Simí.

¹⁸ Jere' ri kibi' chikijujunal ri e ruk'ajol ri Quehat, ri Amram, ri Ishar, ri Hebrón y ri Uziel. Y ri Quehat, xk'ase' k'a 133 juna'.

¹⁹ Y ri e ruk'ajol ri Merarí ja ri Mahli y ri Musí. Jere' ri tzobaj winaqi' ri xetz'ukutej-pe kik'in ri e riy-rumam kan ri Leví, ri nitiker-pe rik'in ri nimalaxel k'a rik'in ri chaq'laxel.

²⁰ Ri Amram xk'ule' rik'in ri ruch'utite', ri rubini'an Jocabed y jare' ri kite' ri Aarón y ri Moisés. Y ri Amram xk'ase' 137 juna'.

²¹ Y ri e ruk'ajol ri Ishar, ja ri Coré, ri Néfeg y ri Zicrí.

²² Ri e ruk'ajol ri Uziel, ja ri Misael, ri Elsafán y ri Sitrí.

²³ Y ri Aarón xk'ule' rik'in ri Eliseba rumi'al ri Aminadab, rana' ri Nahasón. Y xek'oje' k'a e kaji' kalk'ual y re' xkibini'aj: Nadab, Abihú, Eleazar y ri Itamar.

²⁴ Y ri e ruk'ajol ri Coré, ja ri Asir, ri Elcaná y ri Abiasaf. Jere' ri tzobaj winaqi' ri xetz'ukutej-pe kik'in ri e rijatzul kan ri Coré.

²⁵ Y ri Eleazar, jun chike ri ruk'ajol ri Aarón, xk'ule' rik'in jun chike ri rumi'al ri Futiel, y xk'oje' jun kalk'ual ri xubini'aj Finees. Jere' k'a ri e tata'aj kichin ri tzobaj winaqi', kichin ri e rijatzul kan ri Leví.

²⁶ Jare' k'a ri Moisés y ri Aarón ri xch'on ri Dios kik'in y xubij chike chi tikelesaj ri tinamit Israel pan Egipto, y pa taq tzobaj k'a kekinuk'u' richin yekelesaj-el.

²⁷ Kan ja rije' k'a ri xech'on rik'in ri rey richin Egipto, richin chi yekelesaj-pe ri e rijatzul kan ri Israel ri chiri'.

Ri Moisés y ri Aarón kan e rusamajela-wi ri Dios

²⁸ Ri q'ij toq ri Jehová Dios xch'on rik'in ri Moisés pan Egipto,

²⁹ xubij chire: Ja yin Jehová; tabij k'a chire ri rey richin ri Egipto ronojel ri ninbij yin chawe, xcha'.

³⁰ Jak'a ri Moisés xubij chire ri Jehová: ¿Achi'el ta k'a toq yirak'axaj ri rey, toq xa man nel ta ok nuch'abel?, xcha'.