Ex 39 - Kaqchiquel Bible

¹ Ri tzieq ri xe'ukusex chupan ri samaj richin ri rachoch ri Dios, xkem rik'in ri betz' raxroj, ri q'eqq'oj-keq y keq. Keri' chuqa' xban chire ri rutziaq ri Aarón richin ri rusamaj; kan xban k'a chire achi'el ri xubij ri Jehová chire ri Moisés.

² Richin chi xuben ri efod xukusaj q'anapueq y xukusaj ri betz' raxroj, ri q'eqq'oj-keq y keq, chuqa' xukusaj ri lino ri jebel batz'in.

³ Ri q'anapueq kan xax-xax k'a xuben chire rik'in jun bajibel, k'ari' k'am-k'am ruqupixik xuben chire, achi'el betz'. Y re' junan xukusaj rik'in ri betz' raxroj, ri betz' q'eqq'oj-keq y betz' keq y rik'in lino ri jebel batz'in; y kan ja ri jun ri etamanel richin ri xbanon.

⁴ Xeruben k'a ka'i' ripireq taq tzieq, ri k'o taq kiximibal ri pa taq kitza'n, richin xebe chuwi-rutele'n ri efod.

⁵ Y ri ximibel-rupan xa jun k'a rubanon rik'in ri efod. Xuben k'a rik'in q'anapueq, rik'in ri betz' raxroj, rik'in betz' q'eqq'oj-keq y betz' keq rik'in lino ri jebel batz'in. Ri rubanik kan achi'el k'a ri xubij ri Jehová chire ri Moisés.

⁶ Y chikiwech k'a ka'i' taq tz'alem abej ónike, xuben ri kibi' ri e ruk'ajol ri Israel y kan achi'el sello rubanik xuben chike.

⁷ Xeri' ri Besalel xuya' ri taq tz'alem abej ri' chuwi-rutele'n ri efod, ri banon rik'in lino. Re abej re' richin natabel kichin ri e rijatzul ri Israel, achi'el ri xubij ri Jehová chire ri Moisés.

⁸ Xuben chuqa' ri ti peqes ri nibe chuwech ri efod y re' chuqa' kan jebel rubanik xuben chire. Kan achi'el rubanik ri tzieq richin ri efod, ri banon rik'in lino y q'anapueq, betz' raxroj, q'eqq'oj-keq, keq y lino batz'in.

⁹ Ri retabal jun q'a'aj chi kaji' ruchi' y ka'i' ruwech tzieq ri ruk'uan.

¹⁰ Ri chuwech xuya' k'a jebelej taq abej y kaji' cholaj xuben chire, ri nabey cholaj xuya' jun rubí, jun topacio y jun esmeralda;

¹¹ ri ruka'n cholaj xuya' jun turqueza, jun safiro y jun jade;

¹² ri rox cholaj xuya' jun jacinto, jun ágata y jun amatista;

¹³ y ri rukaj cholaj xuya' jun berilo, jun ónike y jun jaspe. Ronojel taq abej re' xuya' q'anapueq chapbel kichin ri chi taq kichi'.

¹⁴ Xuya' k'a kablajuj taq abej chuwech, jujun koma ri e kablajuj ruk'ajol kan ri Israel. Chikiwech chikijujunal ri taq abej xya'ox jujun bi'aj, ri kichin ri kablajuj tzobaj ri kibanon ri e rijatzul kan ri Israel. Ri kibi' ri xebe chikiwech ri taq abej achi'el k'a rubanik ri sello.

¹⁵ Xuben chuqa' ri ruximibal ri ti peqes rik'in q'anapueq ri jebel ch'ajch'oj y kan achi'el e balon kibanik ri xuben chike.

¹⁶ Rija' xeruben ka'i' taq chapbel rik'in q'anapueq y ri pa taq rutza'n-q'anej chire ri ti peqes ri' xuya' ka'i' argolla ri e banon rik'in q'anapueq.

¹⁷ Y ri ka'i' ruximibal ri efod ri achi'el balon kibanik, xuxim jun kitza'n chikij chikijujunal ri argolla.

¹⁸ Y ri jun chik kitza'n re ka'i' ximibel re' xuxim chuwi-rutele'n-q'anej ri efod, richin chi ri ti peqes xtzeqe-qa chuwa-ruk'u'x.

¹⁹ Chuqa' xuben chik ka'i' argolla rik'in q'anapueq y xuya' jujun chuxe-ok ri ka'i' rutza'n, ri pa xulan-qa chire ri ti peqes.

²⁰ Chuqa' xuben chik ka'i' argolla rik'in q'anapueq y xutz'is chuwech ri efod chikixe-qa ri taq ruwi-rutele'n, jubama chunaqaj-qa ri akuchi nutun-wi-ri' ri ximibel-rupan ri efod.

²¹ Ri ka'i' argolla ri ek'o pa taq rutza'n, ri pa xulan-qa chire ri ti peqes, xuxim rik'in ri ka'i' argolla ri e tz'ison chuwech ri efod pa ruwi' juba' ri ximibel-rupan. Ri ximibel ri xukusaj jun raxroj betz' ri balon ruwech. Y keri' ri ti peqes xjitz'e' kan jebel y man nisilon ta. Kan xuben k'a chire ri achi'el xubij ri Jehová chire ri Moisés.

²² Xuben chuqa' jun raxroj tzieq, ri man kan ta janila nim raqen, ri nibe chuxe' ri efod.

²³ Xupoch' k'a ri ruqul y xutz'is jun ti tzieq ri ko'ol ruwech chuchi' chijun ri rusetelen richin man nijistej ta.

²⁴ Y ri chuqul-qa raqen ri tzieq ri', chijun ri ruchi' xban retz'aba'l rik'in kiwachibel granada y ja ri betz' raxroj, ri q'eqq'oj-keq, ri keq ri xukusaj.

²⁵ Chuqa' xeruben taq campana rik'in q'anapueq ri jebel ch'ajch'oj y xerutzeqeba' chijun ri chuchi-qa chikikojol ri kiwachibel ri granada.

²⁶ Nel chi tzij chi xtzeqe' jun ti campana y k'ari' xbe jun ruwachibel granada, xeri' xtzeqe' jun chik ti campana y xbe chik jun ruwachibel granada y keri' xuben chire chijun ri ruchi' ri tzieq. Re tzieq re' jare' ri nukusaj ri sacerdote toq nok-apo chuwech ri Jehová. Kan xuben k'a chire ronojel achi'el ri xubij ri Jehová chire ri Moisés.

²⁷ Xuben chuqa' ri nim raqen rutziaq ri Aarón y ri kitziaq ri e ruk'ajol, kan junan k'a xuben chike y xukem rik'in ri betz' lino jijoj ruwech. Re tzieq re' kan janila k'a jebel rukemik.

²⁸ Keri' chuqa' xuben ri kuchubel-rujolon ri Aarón, retal ri rusamaj y ri retz'aba'l xuben chuqa' rik'in ri lino jijoj ruwech, y ri rupan kitziaq chuqa' xuben rik'in lino batz'in jijoj ruwech.

²⁹ Ri ximibel-rupan xuben chuqa' rik'in lino ri jebel batz'in y xuben rik'in ri betz' raxroj, ri q'eqq'oj-keq y keq y kan jebel k'a rutz'isik ri ruwech xuben chire, achi'el ri xubij ri Jehová chire ri Moisés.

³⁰ Chuqa' xuben jun ti tz'ajtz'ik q'anapueq, ri kan jebel ch'ajch'oj. Y chuwech ri' xuben-wi ri tzij ri nubij: RI KAN RICHIN RI JEHOVÁ.

³¹ Xeri' re tz'ajtz'ik q'anapueq re' xya'ox chuwech jun ti ripirik tzieq, ri ti nim raqen, ri banon rik'in betz' raxroj richin xxim-apo chuwech ri kuchubel-rujolon ri Aarón, retal ri rusamaj, achi'el ri xubij ri Jehová chire ri Moisés.

Toq xk'achoj ri rachoch ri Dios

³² Keri' xk'achoj ronojel ri samaj richin ri rachoch ri Dios, ri richin molojri'il. Ri winaqi' kan xkiben k'a achi'el ri xubij ri Jehová chire ri Moisés.

³³ Ri xebanon ri samaj xkijech k'a kan pa ruq'a' ri Moisés ri rachoch ri Dios ri xban rik'in tzieq y ronojel ri yek'atzin chupan: Ri chapbel-tzieq, ri marco, ri baloj che' ri yeq'e'e' pa ruwi', ri xata't y ri kich'okolibal,

³⁴ ri nima'q taq peraj sale'y ri xeban rik'in kisale'y achija' taq karne'l, ri aq'oman rik'in keq, richin xya'ox pa ruwi' ri rachoch ri Dios. Keri' chuqa' ri nima'q taq peraj sale'y ri xeban rik'in kisale'y ri chikopi' nibix tejón chike y ri peraj tzieq ri nich'aron rupan ri jay,

³⁵ ri káxa richin ri rujikibel-tzij ri Dios y ri baloj taq che' ri yeju'ux chupan richin nitelex, chuqa' ri rutz'apebal-ruwi' ri káxa, ri niya'on kuyubel-mak,

³⁶ ri mesa y ronojel ri samajibel ri nik'atzin chire, ri kaxlan-wey ri nik'oje' chuwech ri Jehová,

³⁷ ri candelabro ri banon rik'in q'anapueq ri jebel ch'ajch'oj, ri taq candil ri e cholan pa ruwi' y ronojel ri samajibel ri yek'atzin chire y ri aceite ri nik'atzin richin ri taq candil.

³⁸ Ri porobel-pom ri banon rik'in q'anapueq, ri aceite richin cha'onri'il, ri jubulej pom, ri peraj tzieq ri nik'oje' chuchi' ri rachoch ri Dios,

³⁹ ri porobel ri banon rik'in q'enq'oj-pueq, ri ti k'arak'ik ch'ich' ri nik'oje' chupan ri porobel, ri baloj taq che' ri uk'uabel richin, ronojel ri samajibel ri yek'atzin chire, keri' chuqa' ri yakbel-ya' y ri ruch'okolibal,

⁴⁰ ri peraj tzieq ri yeya'ox chuwa-jay, ri xata't y ri kich'okolibal, ri peraj tzieq ri nik'oje' chuchi' ri ruwa-jay, ri kolo', ri ch'ich' simej kitza'n, ronojel ri samajibel ri yek'atzin chupan ri rachoch ri Dios richin molojri'il,

⁴¹ ri tzieq kemon ri nukusex richin ri samaj chupan ri rachoch ri Dios nel chi tzij, ri rutziaq ri Aarón, ri nimalej sacerdote y chuqa' ri kitziaq ri e ruk'ajol, richin nikiben ri samaj richin sacerdote.

⁴² Ronojel ri samaj ri xkiben ri winaqi', kan xel k'a achi'el ri xubij ri Jehová chire ri Moisés.

⁴³ Y ri Moisés xutz'et k'a chi ronojel ri samaj kan utz xuben, kan xel k'a achi'el ri xbix chire roma ri Jehová. Xeri' ri Moisés xuya' urtisanik pa kiwi' ri winaqi' ri xebanon ri samaj.