Ex 38 - Kaqchiquel Bible

¹ Chuqa' xuben jun porobel richin nisuj kamelabel rik'in che' acacia. Ri raqen ri porobel jun jaj rik'in ka'i' q'a'aj y kan keri' chuqa' ri ruwech, jak'a ri rujotolen nik'aj jaj.

² Ri pa taq rutza'n ri porobel ri' xuben k'a kan jujun kiwachibel uk'a'. Re kiwachibel uk'a' re' y ri porobel kan kich'akulan k'a ki'. Y xuq'olij-kij rik'in ri q'enq'oj-pueq.

³ Ronojel ri samajibel ri nik'atzin chire ri porobel, xeruben rik'in q'enq'oj-pueq, achi'el ri k'ulbel-chaj, ri chapbel-q'aq', ri chapbel-ti'ij, ri nima'q taq leq, ri jik'bel-ti'ij y ri akuchi nik'oje-wi ri racheq-q'aq'.

⁴ Chuqa' xuben jun k'arak'ik ch'ich' ri banon rik'in q'enq'oj-pueq y xuya' chupan ri porobel, oxi' k'a q'a'aj xk'oje' kan chukojolil ri ruwi' ri ulew rik'in ri ch'ich' ri'.

⁵ Y chuqa' xuben kaji' argolla rik'in q'enq'oj-pueq ri ya'erisan pa q'aq' y xuya' jujun pa taq ruxikin, ri pa taq rutza'n.

⁶ Chuqa' xuben ri baloj che' rik'in che' acacia y re' xuq'olij rik'in q'enq'oj-pueq.

⁷ Re baloj re' xuju' chupan ri argolla ri ek'o pa taq ruxikin ri porobel. Ri porobel xuben rik'in tz'alem y wokowik rupan.

Ri yakbel-ya' banon rik'in q'enq'oj-pueq

⁸ Chuqa' xuben ri yakbel-ya' y jun ruch'okolibal, rik'in ri espejo ri banon rik'in ri q'enq'oj-pueq ri kichin ri ixoqi' ri yesamej chiri' chuchi' ri rachoch ri Dios.

Ri ruwa-jay richin ri rachoch ri Dios

⁹ Ri Besalel xuben jun nimalej peraj tzieq, ri nusutij-rij ri rachoch ri Dios. Jari' xukusex pa xokon chire ri ruwa-jay ri'. Xutzeqeba' k'a ri peraj tzieq richin xutz'apej rij. Ri peraj tzieq ri' banon rik'in betz' lino ri jebel batz'in y ri raqen juwineq wuqu' jaj.

¹⁰ Richin ri', xeruben k'a juwineq xata't rachibilan ri kich'okolibal ri xeruben rik'in q'enq'oj-pueq. Ri xata't ri' xkik'uaj tzeqebel-tzieq y ri k'an banon rik'in saqipueq, ri xebe chikikojol ri xata't.

¹¹ Chuqa' ri pa xaman chire ri ruwa-jay xuya' juwineq wuqu' jaj peraj tzieq, chuqa' xuk'uaj juwineq xata't y kich'okolibal. Ri xata't ri' xkik'uaj k'a tzeqebel-tzieq y ri k'an banon rik'in saqipueq, ri yebe chikikojol ri xata't.

¹² Ri pa qajbel-q'ij chire ri rachoch ri Dios xutzeqeba' jun peraj tzieq, ri k'o oxlajuj jaj rik'in nik'aj raqen. Re' xutz'apej-rij ri ruwa-jay y richin ri' xuben lajuj xata't y lajuj kich'okolibal. Ri retz'aba'l ri xata't y ri tzeqebel-tzieq xeruben rik'in saqipueq.

¹³ Chuqa' richin ri chiri' pa relebel-q'ij chire ri ruwa-jay, ri akuchi nibek'ulun-wi-pe ri q'ij, xuben jun peraj tzieq ri oxlajuj jaj rik'in nik'aj ri raqen.

¹⁴ Pa jun chike ri ruxikin ri akuchi k'o-wi ri okibel, xutzeqeba' k'a jun peraj tzieq ri kaji' jaj rik'in jun q'a'aj raqen. Ri peraj tzieq ri' nitzeqe' pa kiwi' oxi' xata't, ri e tikil pa kiwi' ri kich'okolibal.

¹⁵ Y ri pa jun chik ruxikin ri akuchi xk'oje-wi ri okibel, xutzeqeba' k'a jun chik peraj tzieq ri kaji' chuqa' jaj rik'in jun q'a'aj raqen. Ri peraj tzieq ri' nitzeqe' pa kiwi' oxi' xata't, ri e tikil pa kiwi' ri kich'okolibal.

¹⁶ Ronojel ri peraj tzieq ri' ri nikisutij-rij ri ruwa-jay xeruben rik'in jebelej lino batz'in.

¹⁷ Ronojel ri ruch'okolibal ri xata't ruyon rik'in q'enq'oj-pueq xeruben-wi. Ri tzeqebel-tzieq y ri taq k'an ri yebe chikikojol ri xata't xeruben rik'in saqipueq, ri ketz'aba'l ri kiwi' ri xata't xuq'olij-kij chi saqipueq. Y keri' ronojel ri taq k'an ri xebe chikikojol ri xata't, xeruben rik'in saqipueq.

¹⁸ Ri peraj tzieq ri k'o pan okibel chire ri ruwa-jay kan jebel k'a rutz'isik xuben chire y xukusaj betz' raxroj, q'eqq'oj-keq y keq y chuqa' xukusex lino ri jebel batz'in. Y xuben k'a chire chi wo'o' jaj rik'in ka'i' q'a'aj raqen y ri ruwech jun jaj rik'in ka'i' q'a'aj. Kan junan k'a rubanik ri rujotolen rik'in ri tzieq ri xya'ox chirij ri ruwa-jay.

¹⁹ Xuben k'a kaji' xata't y kaji' kich'okolibal rik'in q'enq'oj-pueq. Ri tzeqebel-tzieq y ri k'an ri beneq chikikojol ri xata't xeruben rik'in saqipueq y ri retz'aba'l ri ek'o k'a pa kiwi-q'anej ri xata't, kan xuq'olij-kij rik'in saqipueq.

²⁰ Ronojel ri ch'ich' simej kitza'n ri chapayon ri rachoch ri Dios y ri ruwa-jay ri rusutin-rij, kan ruyon k'a rik'in q'enq'oj-pueq xeruben-wi.

Ri xe'ukusex chire ri rachoch ri Dios

²¹ Ri Moisés xubij k'a chi titz'ibex ri janipe' xuk'is ri samaj richin xban ri jay ri akuchi k'o-wi ri káxa richin ri rujikibel-tzij ri Dios. Ri levita kan keri' xkiben y jak'a ri Itamar ri ruk'ajol ri sacerdote Aarón ri xk'oje' pa kiwi'.

²² Ri Besalel, ri ruk'ajol ri Urí, rumam kan ri Hur, ri peteneq chupan ri tzobaj richin Judá, kan xuben k'a ronojel achi'el ri xubij ri Jehová chire ri Moisés.

²³ Y kan xto'ox k'a roma ri Oholiab, ri ruk'ajol ri Ahisamac, ri peteneq chupan ri tzobaj richin Dan, y re' kan retaman k'a nusamajij ri xabachike ruwech ch'ich', kan retaman k'a nikemon y kan nitikir k'a nutz'is ruwech xabachike ruwech tzieq rik'in betz' raxroj, q'eqq'oj-keq y keq y chuqa' rik'in lino ri jebel batz'in.

²⁴ Ronojel ri q'anapueq ri xukusex richin chi xban ri samaj, kan ruyon k'a sipanik kichin ri winaqi' y xuk'uaj k'a juwineq ka'i' quintal y re' xpaj k'a rik'in ri pajbel ri nikusex chupan ri jay richin ri Dios.

²⁵ Ronojel ri saqipueq ri xmolotej toq xe'ajlex konojel ri winaqi' xapon oxk'al wolajuj quintal rik'in nik'aj y re' xpaj k'a rik'in ri pajbel ri nikusex chupan ri jay richin ri Dios.

²⁶ Konojel k'a ri achi'a' ri xe'ok chupan ri ajlanik ja ri k'o juwineq kijuna' pa jotol, e 603,550 konojel y chikijujunal re achi'a' re' xkiya' ri k'o chi xkiya'. Y re' xetex k'a rik'in ri etabel ri nikusex chupan ri jay richin ri Dios.

²⁷ Xrukusaj chuqa' oxk'al wolajuj quintal saqipueq richin xeruben ri kich'okolibal ri xata't ri yek'atzin chire ri jay richin ri Dios y chuqa' ri kich'okolibal ri xata't, ri xtzeqebex ri peraj tzieq chuwech. Xeruben k'a wok'al ch'okolibel richin xata't y xukusaj jubama ox-ox arroba saqipueq chike chikijujunal ri ch'okolibel.

²⁸ Y chire ronojel ri saqipueq ri xmolotej, ka'i' arroba ri xukusex richin xeban ri tzeqebel-tzieq, ri ek'o pa kiwi' ri xata't y keri' chuqa' ri k'an ri xebe chikikojol ri xata't.

²⁹ Ronojel ri q'enq'oj-pueq ri xkiya' ri winaqi' richin sipanik chire ri Jehová xapon jubama kawineq oxlajuj quintal.

³⁰ Y rija' xukusaj k'a re q'enq'oj-pueq re' richin xeruben ri kich'okolibal ri xata't ri xeya' chiri' pan okibel chire ri rachoch ri Dios, ri richin molojri'il; chuqa' ri porobel y ri k'arak'ik ch'ich' ri xbe chupan y ronojel ri samajibel ri yek'atzin chire ri porobel,

³¹ chuqa' ri kich'okolibal ri xata't richin chijun ri ruwa-jay y ri akuchi k'o-wi ri okibel, keri' chuqa' ronojel ri ch'ich' simej kitza'n, ri xukusaj chire ri rachoch ri Dios y ri xukusaj richin ri rij ri ruwa-rachoch ri Dios.