Ex 35 - Kaqchiquel Bible

¹ Ri Moisés xerumol k'a konojel ri ruwinaq y xubij chike: Jare' ri xuq'et pan iwi' ri Jehová ri k'o chi niben rix:

² Waqi' q'ij k'a xtiban samaj y jak'a ri ruwuq q'ij, ri' kan richin ri Jehová, q'ij richin uxlanen, ch'aron richin ninimirisex ruq'ij rija' y xabachike k'a xtisamej chupan ri q'ij ri', kan xtikamisex k'a.

³ Kan man jun k'a wineq ri xtiboxon q'aq' chupan ri rachoch, chupan ri q'ij ri richin uxlanen, xcha'.

Ri sipanik richin ri rachoch ri Dios ri nibeban

⁴ Ri Moisés xch'on chik k'a kik'in ri ruwinaq y xubij chike: Tiwak'axaj k'a ri rubin chik ri Jehová, ri k'o chi niqaben.

⁵ Chiqajujunal chiqe roj tiqaya' k'a jun sipanik chire ri Jehová. Ri kan k'o k'a kikoten pa ránima utz nuk'en-pe q'anapueq, saqipueq o ri q'enq'oj-pueq.

⁶ Utz chuqa' nuk'en-pe raxroj betz', q'eqq'oj-keq y keq y chuqa' ri lino jijoj ruwech y ri rusumal tzuntzun,

⁷ chuqa' utz nuk'en-pe ri rusale'y karne'l aq'oman rik'in keq y chuqa' kisale'y ri chikopi' ri nibix tejón chike y che' richin acacia,

⁸ chuqa' utz nuk'en-pe aceite richin yetzije' ri candil, ri mololen taq aq'om richin niban ri aceite richin ri cha'onri'il y ronojel ri nik'atzin richin niban ri jubulej pom.

⁹ Y utz chuqa' nuk'en-pe ri jebelej taq abej ri nibix ónike chike y ri ch'aqa' chik ruwech abej richin nibe chuwech ri efod y ri richin ri ti peqes ri nuk'uaj chuwa-ruk'u'x ri nimalej sacerdote.

Ri k'atzinel richin niban ri rachoch ri Dios

¹⁰ Konojel k'a ri achi'a' ri kan ketaman nikiben jun ruwech samaj, kepe k'a y je rije' ri kebanon ronojel ri rubin chik ri Jehová:

¹¹ Je rije' ri xkebanon ri rachoch ri Jehová, ri ruche'el y ri tzieq ri nibe pa ruwi' richin nukuch, ri chapbel-tzieq, ri ru-marko, ri rubaloj, ri xata't y ri kich'okolibal,

¹² ri káxa richin ri rujikibel-tzij ri Dios, ri baloj che' uk'uabel richin, ri tz'apebel ruwi' ri káxa y ri peraj tzieq ri nich'aron rupan ri jay,

¹³ ri mesa, ri baloj che' uk'uabel richin, ronojel ri samajibel ri yek'oje' pa ruwi' y ri kaxlan-wey ri niya' chuwech ri Jehová,

¹⁴ ri candelabro ri richin nisaqirisan, ronojel ri samajibel ri yek'atzin chire, ri taq candil ri e cholan pa ruwi' ri candelabro y ri aceite ri nikikusaj ri taq candil.

¹⁵ Xtikiben chuqa' ri porobel-pom, ri baloj taq che' ri uk'uabel richin, chuqa' ri aceite richin cha'onri'il, ri jubulej pom, ri peraj tzieq richin nutz'apej ruchi' ri rachoch ri Dios,

¹⁶ ri porobel ri nisuj poron chikop pa ruwi', ri k'arak'ik ch'ich' ri niya' chupan ri banon rik'in q'enq'oj-pueq, ri baloj taq che' ri uk'uabel richin y ronojel ri samajibel ri nik'atzin chire, keri' chuqa' ri yakbel-ya' ri niban rik'in q'enq'oj-pueq, y ri ruch'okolibal,

¹⁷ ri peraj tzieq ri nik'oje' chuwa-jay, ri xata't y ri ruch'okolibal, ri peraj tzieq ri nik'oje' pan okibel richin ri ruwa-jay,

¹⁸ keri' chuqa' ri ch'ich' simej kitza'n, ri ye'ukusex chire ri rachoch ri Dios y ri ye'ukusex richin ri rij ri ruwa-rachoch ri Dios. Y chuqa' ri kolo' ri yek'atzin chire ri rachoch ri Dios y chire ri rij ri rachoch ri Dios,

¹⁹ ri tzieq kemon ri nukusaj ri Aarón y chuqa' ri tzieq ri nikikusaj ri e ruk'ajol, richin nikiben ri samaj richin sacerdote, xcha' ri Moisés.

Ri winaqi' xkik'en-pe ri sipanik

²⁰ Toq ri Moisés xtane' chubixik ronojel re', ri winaqi' richin ri tinamit xkitaluj-el-ki'.

²¹ Y xeri' ri winaqi' ri k'o rayibel kik'in y xalex-pe pa kánima richin nikiya' sipanik kan xkik'amala' k'a pe chire ri Jehová, richin chi niban ri samaj richin ri rachoch, ri richin molojri'il y richin ronojel ri xtik'atzin chupan y chuqa' ri tzieq ri kan ch'aron richin nikikusaj ri sacerdote.

²² Kan chi achi'a' chi ixoqi' k'a xepe y konojel kik'amon-pe sipanik rik'in ronojel kánima. Kik'amon-pe ri wiqobel ri banon rik'in q'anapueq, ri wiqobel ri yetz'arabex chuwech ri tzieq, ri lipq'a', ri retz'aba'l ri kitza'n y ri ichinaj.

²³ Konojel ri winaqi' ri k'o betz' kik'in ri raxroj, q'eqq'oj-keq y keq y chuqa' ri lino jijoj ruwech, ri rusumal tzuntzun, ri rusale'y karne'l aq'oman rik'in keq y ri kisale'y ri chikopi' ri nibix tejón chike.

²⁴ Ri k'o saqipueq y ri q'enq'oj-pueq kik'in kan xkik'en k'a pe y ri k'o che' acacia kik'in xkik'en k'a pe chuqa', richin chi niban ronojel ri nik'atzin.

²⁵ Chuqa' ri ixoqi' ri jebel yebatz'in, xkik'en k'a pe ri betz' ri kibatz'in; ri raxroj, q'eqq'oj-keq, keq y ri lino jijoj ruwech.

²⁶ Y ri ixoqi' ri kan yetikir yebatz'in jebel y kan k'o rayibel pa kánima, xkibatz'ij-pe ri rusumal tzuntzun.

²⁷ Ri e tata'al chikikojol ri winaqi', xkik'en-pe ri taq abej ónike y ri jalajoj ruwech taq abej richin chi nik'oje' chuwech ri efod y chuwech ri ti peqes ri nuk'uaj chuwa-ruk'u'x ri nimalej sacerdote,

²⁸ chuqa' xkik'en-pe ri mololen taq jubulej aq'om y xkik'en pe ri aceite richin ri taq candil y richin chi xban ri aceite richin cha'onri'il y richin ri jubulej pom.

²⁹ Konojel k'a ri winaqi' ri xkina' rayibel richin xeto'on rik'in sipanik, kan xkiya' k'a pe richin chi xban ronojel ri xubij ri Jehová chire ri Moisés.

Ri achi'a' ri xkebebanon ri samaj

³⁰ Ri Moisés xeroyoj k'a ri ruwinaq y xubij chike: Ri Jehová kan rucha'on chik k'a chupan ri tzobaj richin ri Judá, ri Besalel, ri ruk'ajol ri Urí y rumam ri Hur.

³¹ Y re Besalel re', kan rubanon k'a chire chi kan nojineq rik'in ri ru-Espíritu richin chi k'o na'oj rik'in: Richin k'o etamabel, nojibel y uchuq'a' richin nuben xabachike ruwech samaj.

³² Chuqa' nitikir nusamajij ri q'anapueq, ri saqipueq y ri q'enq'oj-pueq. Kan nitikir yerubanala' jalajoj ketz'aba'l.

³³ Nitikir nuben jebelej taq samaj rik'in jebelej taq abej, nitikir yeruben jebelej taq samaj rik'in che' y nitikir chuqa' yeruben xabachike ruwech samaj richin wiqobel.

³⁴ Ri Jehová kan ruya'on k'a na'oj chire ri Besalel richin nitijon y keri' chuqa' ruya'on chire ri Oholiab, ri ruk'ajol ri Ahisamac, ri peteneq chupan ri tzobaj richin ri Dan.

³⁵ Chi e ka'i' k'a achi'a' re' kan e nojisan rik'in na'oj richin nikich'ob ronojel ruwech samaj ri kan e jebejoj ok y chuqa' ri tz'ison rik'in betz' raxroj, q'eqq'oj-keq y keq y ri samaj rik'in ri betz' lino y xabachike ruwech kem ri k'o retz'aba'l ruwech.