Ex 32 - Kaqchiquel Bible

¹ Y jak'a toq ri winaqi' xkitz'et chi ri Moisés xa xyaloj yan y xa man qajineq ta pe pa ruwi' ri juyu', ri winaqi' jari' toq xkimol-apo-ki' chirij ri Aarón y xkibij chire: Wakami ja rat k'a ri kayakatej y tabana' jun qa-dios richin jari' ri niyuqen qichin, roma ri Moisés ri xojelesan-pe pan Egipto, man jun qetaman ri achike xuk'uluwachij, xecha'.

² K'ari' ri Aarón xubij chike: Wakami k'a tiwelesaj ronojel ri ruwi-ixkinaj ri banon rik'in q'anapueq ri k'o chuwi' taq kixikin ri iwixjayilal, ri k'o chuwi' taq kixikin ri imi'al-ik'ajol y ke'ik'ama' k'a pe chuwe, xcha'.

³ Y ri winaqi' kan keri' wi xkiben, xekelesala-pe ri ruwi' taq ixkinaj chuwi' taq kixikin y xekik'en-pe chire ri Aarón.

⁴ Y ri Aarón kan xuk'ul k'a kan chuwi-kiq'a', ri kik'uan-apo chire. Xpe rija' xutzek k'a ronojel ri ruwi' taq ixkinaj ri', richin xya'er y k'ari' xuq'ej pa jun k'ojelibel ri xuben rija'. Y k'ari' xuchop ri rusamajibal y xel ruwachibel jun nima-alaj achij wákix chuwech. Y k'ari' ri winaqi' xkibij: ¡Qawinaq! Ja k'a qa-dios re' ri xojelesan-pe pa ruwach'ulew Egipto, xecha'.

⁵ Jak'a toq ri Aarón xutzu' ri nikiben ri winaqi', rija' xuben k'a q'anej jun porobel ri chiri' chuwech-apo ri ruwachibel ri nima-alaj achij wákix y k'ari' rik'in ruchuq'a' xubij: Chua'q, kan jun nimaq'ij k'a richin ri Jehová.

⁶ Y keri' ri ruka'n q'ij, ri winaqi' kan nimaq'a' yan k'a xeyakatej y xekisuj kamelabel ri yeporox chijun y xekiyala' chuqa' sipanik richin nuq'alajirisaj chi junan kiwech rik'in ri Dios. Y k'ari' xetz'uye' richin xewa-xe'uk'ya' y xeri' xeyakatej-el richin xenimaq'ijun.

⁷ Jari' toq ri Jehová xubij chire ri Moisés: Kabiyin-qa, roma ri atinamit ri xawelesaj-pe chila' pa ruwach'ulew Egipto, wakami xa xyojtej ri rubanik ri kibanobal.

⁸ Rije' xa kan chi'anin k'a xkich'er kan ki' chire ri bey ri xink'ut chiwech, rije' xa xkiben jun ruwachibel nima-alaj achij wákix rik'in q'anapueq ya'erisan pa q'aq' y jari' ri nikiya' ruq'ij y nikisujula' kamelabel chuwech y nikibij chi jari' ri ki-dios ri xe'elesan-pe pan Egipto.

⁹ Y chuqa' ri Dios xubij chire ri Moisés: Yin kan nutz'eton k'a pe chi re winaqi' re' kan man nikiqasaj ta ki'.

¹⁰ Wakami k'a xa taya' q'ij chuwe yin richin chi ninwelesaj woyowal chikij y xkenk'is k'a konojel. Y xeri' yin xtinben k'a jun nimalej tzobaj winaqi' kik'in ri awijatzul rat, chuwech re ruwach'ulew, xcha' ri Jehová.

¹¹ Xeri' ri Moisés xch'on chik rik'in ri Jehová richin ta chi nuqasaj ruwi' ri royowal y xubij chire: Ajaw Jehová, ¿achike k'a roma kan xyakatej ri aq'aq'arinen chikij ri atinamit ri xawelesaj-pe rat pan Egipto rik'in ri nimalej awuchuq'a'?

¹² Man taya' q'ij richin xkebech'on-pe ri aj-Egipto y xtibekibij-pe: Ri Jehová xerelesaj-el ri israelita wawe', xaxe richin chi xerukamisaj ri pa taq juyu'. Xaxe richin chi xeruk'is-el chuwech re ruwach'ulew, xkecha'. Roma ri', tabana' utzil ajaw, xa taqasaj ruwi' ri awoyowal y tajoyowaj k'a ruwech ri atinamit.

¹³ Toqaqa chi'ak'u'x ri xabij kan chike ri asamajela' ri Abraham, ri Isaac y ri Israel ri xajikiba' kan chike pan abi' rat chi kan xkewinaqir k'a ri kijatzul y kan achi'el k'a kajlabal ri ch'umila' ri ek'o chikaj xtaben chike, kan chike k'a ri kijatzul xtaya-wi kan ri ruwach'ulew ri asujun chike, kan xke'ok k'a chupan y kan xtikichinaj k'a richin q'asen, keri' xabij chike, xcha' ri Moisés.

¹⁴ Y jari' toq ri Jehová xuq'et k'a ri' y man xuya' ta chik pe pa kiwi' ri ruwinaq, ri ruk'ayewal ri ruch'obon richin nuya' pa kiwi'.

¹⁵ Chirij ri' ri Moisés xbeqaqa-pe pa ruwi' ri juyu' y ruk'amon-pe ka'i' tz'alem taq abej ri akuchi e tz'ibatel-wi ri rupixa' ri Dios y kan chi e ka'i' kiwech ri abej e tz'ibatel-wi-pe.

¹⁶ Kan rusamaj k'a ri Dios ri ka'i' tz'alem taq abej ri' y ri tz'ibatel-pe ri chikiwech kan ja chuqa' ri ruq'a' rija' ri xtz'iban-pe chikiwech ri abej ri'.

¹⁷ Y toq ri Josué junan chik k'a e peteneq rik'in ri Moisés, roma nrak'axaj raqoj-chi'ij kichin ri winaqi', xubij chire ri Moisés: Yin ninwak'axaj raqoj-chi'ij richin labal ri akuchi ek'o-wi-qa ri qawinaq, xcha'.

¹⁸ Y ri Moisés xubij: Ni, ri' man raqoj-chi'ij ta richin ch'akonik, ni man ch'abel ta richin bis roma xech'akatej pan oyowal. Yin ninwak'axaj chi bixanik richin nimaq'ij, xcha'.

¹⁹ Y toq xe'apon akuchi ek'o-wi-qa, jari' toq ri Moisés xutz'et ri ruwachibel ri jun nima-alaj achij wákix y ri xajoj ri niban chuwech. Jari' toq xyakatej royowal y xuk'eq-qa pan ulew ri tz'alem taq abej, y xupaxij chiri' chuxe' ri juyu'.

²⁰ Xeri' ri Moisés xberuk'ama-pe ri wachibel richin ri wákix ri kibanon y xubox pa q'aq'. Xeri' xrelesaj-pe pa q'aq' y xuben chi xkok'ix ri wachibel ri', ri banon rik'in q'anapueq. K'ari' xujopij pa ruwi' ri ya' y xuben chike ri ruwinaq chi xkiqum ri ya' ri'.

²¹ Chirij ri' ri Moisés xubij chire ri Aarón: ¿Achike xkiben chawe re winaqi' re', richin xe'ayuqej chupan re jun nimalej mak re'?, xcha'.

²² Y ri Aarón xubij: Táta, man tipe awoyowal chuwe, roma rat kan awetaman chi re winaqi' re' kan niqa' chikiwech richin yemakun.

²³ Rije' kere' k'a xkibij chuwe: Tabana' jun qa-dios richin chi jari' ri niyuqen qichin, roma ri Moisés ri xojelesan-pe pan Egipto, kan man jun qetaman ri achike xuk'uluwachij, xecha' chuwe.

²⁴ Roma ri' yin xinbij chike: Wi k'o q'anapueq iwik'in, tik'ama-pe; xicha' chike. Y rije' kan xkik'en k'a pe. Y yin xinya' pa q'aq' ri q'anapueq ri' y jari' toq xbek'ulun-pe re jun nima-alaj achij wákix re', xcha' ri Aarón.

²⁵ Toq ri Moisés xutz'et chi ri winaqi' kan e jaqatajineq chubanik ri etzelal, roma ri Aarón man xtikir ta xeruq'et, ri winaqi' ri e etzelanel kichin, xa xetze'en chikij.

²⁶ Xeri' ri Moisés xbepa'e' chuchi' ri akuchi ek'o-wi-qa, xch'on kik'in ri winaqi' y xuk'utuj k'a chike: Ri wineq ri kan nuna' chi kan richin wi ri Jehová, kan tiq'ax k'a pe wawe' wik'in, xcha'. Y xeri' xeq'ax-apo rik'in, konojel ri e rijatzul kan ri Leví.

²⁷ Chirij k'a ri', ri Moisés xubij chike ri e rijatzul kan ri Leví: Kere' nubij ri Jehová ri qa-Dios roj ri oj rijatzul kan ri Israel: Chi'ijujunal rix tichapa-el ri i-espada, kixbiyin y kixok-apo re akuchi ojk'o-wi-qa re wakami. Y kebe'ikamisaj ri winaqi' ri xemakun, stape' iwach'alal, iwachpochel o iwachk'uljay, xcha' ri Moisés chike.

²⁸ Ri e rijatzul kan ri Leví kan xkiben k'a ronojel ri xbix chike roma ri Moisés y chupan ri q'ij ri' xeken e 3,000 achi'a'.

²⁹ Y jari' toq ri Moisés xubij chike ri e rijatzul kan ri Leví: Wakami rix xijech-iwi' pa rusamaj ri Jehová, stape' kan xe'ikamisaj ri iwalk'ual y ri iwach'alal. Y roma re' ri Jehová kan yixrurtisaj-wi, xcha' ri Moisés chike.

³⁰ Ri jun chik q'ij ri Moisés xubij chike ri ch'aqa' chik ruwinaq: Rix kan jun nimalej mak ri xiben. Wakami k'a xkijote-q'anej pa ruwi' ri juyu' rik'in ri Jehová y xtink'utuj utzil chire richin xtukuy ta ri imak, xcha' ri Moisés.

³¹ Keri' ri Moisés xjote' chik el ri akuchi k'o-wi ri Jehová y xubij chire: Qitzij na wi ri tinamit kan jun nimalej mak ri xuben, roma xkiben jun ki-dios rik'in q'anapueq.

³² Ajaw, jak'a re wakami nink'utuj utzil chawe richin xtayoj ta jumul ri kimak. Roma wi rat man naben ta keri', xa kan más k'a utz tayojo' ri nubi' chupan ri wuj ri akuchi tz'ibatel wi ri kibi' ri kan e awichin rat, xcha' ri Moisés.

³³ Xeri' ri Jehová xubij chire: Yin xaxe k'a ri nimakun chinuwech ri xtinyoj ri rubi' chupan ri nuwuj.

³⁴ Wakami k'a, kabiyin, tak'uaj-el ri tinamit k'a chupan ri ruwach'ulew ri nubin chik chawe. Y ri nu-ángel kan xtik'o k'a el chiwech. Man rik'in ri' toq xtapon k'a ri q'ij richin chi xtinya' ri rutojbalil chike, re winaqi' re' kan xtinya-wi ruk'ayewal pa kiwi' roma ri kimak, xcha' ri Jehová.

³⁵ Y ri Jehová kan xuya-wi-pe jun nima-yabil pa ruwi' ri tinamit, roma kan xkiya' ruq'ij ri ruwachibel ri nima-alaj achij wákix, ri xuben ri Aarón.