Ex 31 - Kaqchiquel Bible

¹ Xeri' ri Jehová xch'on chik rik'in ri Moisés y xubij chire:

² Yin xincha' k'a chikikojol ri winaqi' ri e richin ri tzobaj richin ri Judá, ri achin rubini'an Besalel, ri ruk'ajol ri Urí, rumam kan ri Hur.

³ Y re Besalel re' kan nunojisan k'a rik'in ri nu-Espíritu richin chi k'o na'oj rik'in, etamabel, nojibel y uchuq'a' richin nuben xabachike ruwech samaj.

⁴ Y nubanon chire richin nitikir nunojij jalajoj ruwech wiqobel rik'in q'anapueq, saqipueq y rik'in q'enq'oj-pueq.

⁵ Nuya'on nojibel chire richin nuben jebelej taq samaj rik'in jebelej taq abej, richin yeruben jebelej taq samaj rik'in che' y richin chuqa' yeruben xabachike jebelej taq samaj, ri kan nrajo' janila na'oj.

⁶ Chuqa' nucha'on chik chikikojol ri winaqi' ri e richin ri tzobaj richin ri Dan, ri achin rubini'an Oholiab, ri ruk'ajol ri Ahisamac richin chi nok jun to'onel chupan ri samaj. Yin kan nubanon k'a chuqa' chike konojel achi'a' ri yetikir nikiben jun ruwech samaj, chi kan k'o kina'oj, richin chi ja rije' ri xkebebanon ri nubin chik chawe chi k'o chi yeban.

⁷ Y je achi'a' re' ri xkebanon ri wachoch richin molojri'il, ri káxa richin ri jikibel-tzij, ri tz'apebel ruwi' ri káxa y ri nik'atzin chupan ri wachoch yin.

⁸ Chuqa' jeri' ri xkebanon ri mesa y ronojel ri niya' pa ruwi', ri candelabro ri xtiban rik'in q'anapueq y ronojel ri yek'atzin chire y ri porobel ri niporox pom pa ruwi'.

⁹ Je chuqa' rije' ri xkebanon ri porobel kichin ri kamelabel y ronojel ri yek'atzin chire, xtikiben chuqa' ri yakbel-ya' y ri ruch'okolibal.

¹⁰ Xtikiben chuqa' ri kemon tzieq ri xtukusaj ri Aarón y ri tzieq ri xkekikusaj ri e ruk'ajol, ri xtik'atzin chike toq nikiben ri samaj richin sacerdote.

¹¹ Y je rije' chuqa' ri xkebanon ri aceite richin ri cha'onri'il y ri jubulej pom richin ri niporox chupan ri loq'olej chire ri wachoch. Y rije' kan tikibana' k'a ronojel ruwech ri samaj, kan achi'el ri rubanik ri nubin chik chawe yin.

Ri ruchojmilal richin ri q'ij richin uxlanen

¹² Xeri' ri Jehová xch'on chik rik'in ri Moisés y xubij chire:

¹³ Kach'on kik'in ri awinaq y tabij chike: Chi'iwonojel rix man timestaj chi k'o chi nichajij ri q'ij richin uxlanen, roma re' kan wichin yin. Ja retal re' chuwe yin y chiwe rix chi wiq chi tanaj richin niwetamaj chi ja yin Jehová ri ix nuch'aron wichin yin.

¹⁴ Roma ri' kan tichajij k'a ri q'ij richin uxlanen y xabachike wineq ri xtiqasan rejqalen re jun q'ij re', xtiken, o xabachike ri xtisamej chupan re q'ij re', kan xtikamisex.

¹⁵ Waqi' q'ij k'a xtiban samaj y jak'a ri ruwuq q'ij ri' kan q'ij k'a richin uxlanen, q'ij ch'aron chuwe yin y roma ri' xabachike k'a ri xtisamej chupan ri q'ij ri', kan qitzij na wi chi kan xtikamisex.

¹⁶ Chi'iwonojel k'a rix ri ix rijatzul kan ri Israel tichajij ri q'ij richin uxlanen, kan keri' k'a chuqa' tikibana' ri winaqi' ri xkepe chi wiq chi tanaj.

¹⁷ Y re' kan xtok k'a jun retal chiqakojol roj richin jantape', roma yin Jehová pa waqi' q'ij xinben ri kaj y ri ruwach'ulew y pa ruwuq q'ij xitane' chubanik ri nusamaj y xinuxlan, xcha' ri Jehová.

Toq ri winaqi' xkiben ruwachibel jun nima-alaj achij wákix

¹⁸ Toq ri Jehová xtane' chi ch'owen rik'in ri Moisés chiri' pa ruwi' ri juyu' Sinaí, xujech-pe ri ka'i' tz'alem taq abej chire, ri akuchi nuq'alajirisaj-wi ri rurayibel rija'. Re tz'alem taq abej re' kan ja ri Dios ri xtz'iban-pe kiwech.