Ex 30 - Kaqchiquel Bible

¹ Tabij chuqa' chi xtiban jun chik porobel richin niporox pom y re' niban rik'in che' acacia.

² Ri retabal jare': Ka'i' q'a'aj ri ruwech y kan keri' chuqa' ri raqen y wo'o' q'a'aj rujotolen. Chuqa' niban kaji' achi'el uk'a', ri pa taq rutza'n, ri pa ruwi-q'anej y re' nuch'akulaj-ri' rik'in ri porobel.

³ K'ari' xtiq'olij-rij rik'in q'anapueq, ri jebel ch'ajch'oj. Xtiq'olij ri ruwi', ri pa taq ruxikin y ri taq uk'a'. Chuqa' xtiben chik q'anej jun ti ruchi' rik'in q'anapueq, ri jebel ch'ajch'oj.

⁴ Chuqa' xtiben ka'i' argolla rik'in q'anapueq, richin yebe chuxe' ri ruchi' ri porobel, jun pa jun rutza'n y jun ri juk'an chik. Chuqa' xtiben chik ka'i', richin chi yebe ri juk'an chik. Richin chi chupan ri argolla ri' yeju'ux ri baloj che', richin chi nitelex-el.

⁵ Ri baloj che' ri xke'iju' chupan ri argolla, rik'in k'a ri che' acacia xke'iben-wi y xtiq'olij kij rik'in q'anapueq.

⁶ Y xtiya' ri porobel ri' chupan ri wachoch, chuwech-apo ri tzieq ri tasbel, ri newan ri káxa ri richin ri nujikibel-tzij, ri akuchi xtink'ul-wi' iwik'in richin yich'on iwik'in.

⁷ Ronojel nimaq'a' toq nichojmirisex ri rutza'n ri candil, jari' toq ri Aarón xtuporoj ri jubulej pom pa ruwi' ri porobel ri'.

⁸ Chuqa' ronojel tiqaq'ij toq xtiberuchojmirisaj ri rutza'n ri candil, chuqa' xtuporoj pom chiri'. Kan kere' k'a xtiban chinuwech yin, tibe q'ij tibe seq, chi wiq chi tanaj.

⁹ Kan man jun k'a pom ri jun wi chik xtiya' pa ruwi' re porobel re', ni man nisuj ta chikop pa ruwi', ni jun chik sipanik, ni ri vino man niq'ej ta pa ruwi'.

¹⁰ Xaxe k'a jun bey pa jun juna' ri xtiberuchojmirisaj ri porobel ri', chupan ri q'ij toq nijunamatej-iwech wik'in. Ri Aarón xtuk'en-pe ri kik' richin ri kamelabel richin nijunamatej-iwech wik'in y xtuya' ri kik' ri' chirij ri uk'a' ri ek'o chire ri porobel. Kan kere' k'a xtiban, tibe q'ij tibe seq, koma ri winaqi' ri e peteneq chi wiq chi tanaj. Re jun porobel re' kan xtijech k'a richin pa nusamaj yin.

Ri méro ri niya'ox pa kik'exel ri winaqi'

¹¹ Y xeri' ri Jehová xch'on chik rik'in ri Moisés y xubij chire:

¹² Toq xke'awajlaj k'a konojel ri awinaq, chikijujunal k'o chi nikiben jun tojoj chuwe yin roma ri kik'aslen, richin chi man jun ruk'ayewal tiqaqa pa kiwi' ri ruk'amon-pe kamik.

¹³ Jak'a méro re' ri k'o chi nikiya' chikijujunal ri xke'ajlex; k'o chi niya' richin sipanik, jubama nik'aj onza saqipueq richin rutojbal ri kik'aslen chuwe yin. Y ri etabel richin ri sipanik achi'el ri etabel ri nikusex chupan ri jay wichin yin.

¹⁴ Konojel k'a ri achi'a' ri xke'ajlex ri k'o chik juwineq kijuna' pa jotol, jari' ri xkeya'on re sipanik re' richin tojbel chuwe yin.

¹⁵ Konojel k'a xtikiya' nik'aj onza saqipueq. Ri beyom man xtik'o ta ruwi' ri xtuya', ni ri man jun ok k'o rik'in man ta nuq'i' ri k'o chi nuya'. Konojel junan k'a ri xtikitoj roma ri kik'aslen.

¹⁶ Ri méro ri xtak'ul chuwi-kiq'a' ri awinaq, roma ri kik'aslen, xtakusaj k'a richin xtukusex chupan ri wachoch ri richin molojri'il. Re méro re' kan xtik'atzin k'a richin chi ye'oqaqa chinuk'u'x y richin chi nok pa ruk'exel ri kik'aslen.

Ri yakbel-ya' banon rik'in q'enq'oj-pueq

¹⁷ Xeri' ri Jehová xch'on chik rik'in ri Moisés y xubij chire:

¹⁸ Tabij chike ri awinaq chi tiban jun yakbel-ya' y jun ruch'okolibal y kekibana' rik'in ri q'enq'oj-pueq. Roma chupan ri yakbel-ya' xtikik'en-wi ri ya' richin nikich'ajch'ojirisaj-ki'. Re yakbel-ya' re' xtiya' pa kinik'ajal ri wachoch y ri porobel.

¹⁹ Y ri Aarón y ri e ruk'ajol, kan chiri' k'a xtikik'en-wi ri ya' richin xtikich'ej ri kiq'a' y ri kaqen, richin nikich'ajch'ojirisaj-ki'.

²⁰ Roma toq rije' k'o chi ye'ok-apo chupan ri wachoch ri richin ri molojri'il, k'o chi nikich'ajch'ojirisaj-ki' rik'in ri ya', roma wi man nikiben ta, rije' xa xkeken. Y chuqa' k'o chi nikich'ajch'ojirisaj-ki' toq yejel-apo rik'in ri porobel richin nikisuj ri kamelabel, richin chi man yeken ta.

²¹ Ri k'o chi nikich'ej kiq'a' y ri kaqen richin chi man yeken, kan jun pixa' ri ya'on chike ri Aarón y chike ri e rijatzul ri e peteneq chi wiq chi tanaj.

Ri aceite richin cha'onri'il

²² Xeri' ri Jehová xch'on chik rik'in ri Moisés y xubij chire:

²³ Takanoj k'a ri q'ayis ri más jubul kuxla': Takanoj kablajuj libra mirra, waqi' libra canela, waqi' libra aji'j y

²⁴ kablajuj libra kasia. Y re' ke'awetaj rik'in ri etabel ri nikusex chupan ri wachoch yin. Y ronojel re' naxol rik'in oxi' litro rik'in nik'aj aceite richin olivo.

²⁵ Rat kan xtaben k'a ri aceite richin cha'onri'il, kan achi'el ri rubanik nuben jun banoy jubulej taq aq'om.

²⁶ Y jare' ri xtakusaj richin chi xtaqasaj aceite pa ruwi' ri wachoch richin molojri'il, pa ruwi' ri káxa ri k'o ri nujikibel-tzij chupan,

²⁷ pa ruwi' ri mesa y ronojel ri k'o pa ruwi', ri candelabro y ri ye'ukusex chire, pa ruwi' ri porobel richin ri pom,

²⁸ ri porobel richin ri poron chikop y ronojel ri ye'ukusex chire, ri yakbel-ya' y ri ruch'okolibal chuqa'.

²⁹ Rik'in k'a re' xke'ajech pa nusamaj ri samajibel. Y wi re samajibel re' nikitun ta apo ki' rik'in xabachike, kan nikiben chire chi chuqa' nok wichin yin.

³⁰ Xtaqasaj k'a ri aceite ri' pa ruwi' ri Aarón y pa kiwi' ri e ruk'ajol richin chi ye'ok nu-sacerdote, richin nikiben ri nusamaj.

³¹ Y kan tabij k'a chike ri awinaq chi ja aceite re' ri richin cha'onri'il, ri tukusex koma ri awinaq ri e peteneq chi wiq chi tanaj.

³² Re aceite re' man k'a tiq'ej pa ruwi' xabachike wineq y chuqa' man jun tibanon pa ruyonil re jun ruwech aceite re'. Roma re aceite re' ch'aron wichin yin y roma ri' rix kan wichin yin tibana' chire.

³³ Roma ri' wi k'o jun ri nibanon aceite achi'el re wichin yin, o k'o ta jun ri niq'ejo pa ruwi' jun xabachike wineq, ri xtibanon keri' kan jumul k'a telesex-el chi'ikojol.

Ri rubanik ri pom

³⁴ Xeri' ri Jehová xch'on chik rik'in ri Moisés y xubij chire: Takanoj k'a re jalajoj ruwech taq aq'om re': Ri ruq'olil ri q'ayis estacte,*f14* ri parapox, ri gálbano*f15* y ri pom. Y k'ari' junan retabal tachapa' chike chikijujunal re jalajoj ruwech q'ayis re'.

³⁵ K'ari' kik'in re jalajoj kiwech q'ayis re' tiban k'a jun jubulej ruwech pom, kan achi'el rubanik nuben jun banoy jubulej taq aq'om. Tiwatz'amij k'a, jebel ch'ajch'oj tibana' chire y tibana' chi jari' ri nukusex pa nusamaj yin.

³⁶ Juba' k'a chire ri jalajoj kiwech q'ayis xtijok' jebel y xtik'uaj pa wachoch richin tiya' chuwech ri káxa ri k'o ri nujikibel-tzij chupan, ri chiri' ri akuchi nink'ut-wi' chiwech. Re pom re' kan janila k'a rejqalen xtok chiwech rix, roma kan xtich'er richin nukusex pa nusamaj yin.

³⁷ Man jun k'a tibanon pa ruyonil re jun ruwech pom re', roma kan k'o chi niben chire chi re pom re' kan xaxe pa nusamaj yin utz nukusex-wi.

³⁸ Roma ri' wi k'o jun ri nibanon pom achi'el re wichin yin, roma jebel jubul nuseq ri ruxla', ri xtibanon keri' kan jumul k'a telesex-el chi'ikojol.