Ex 3 - Kaqchiquel Bible

Ri Dios nroyoj ri Moisés

¹ Toq ri Moisés yeruyuq'uj ri karne'l e richin ri Jetro, ri rujinan, ri sacerdote chuqa' richin Madián, k'o k'a jun q'ij xeruk'uaj-el ri karne'l k'a pa tz'iran ruwach'ulew y xapon k'a chunaqaj ri juyu' richin ri Dios ri rubini'an Horeb.*f2*

² Y ri chiri' ri ángel richin ri Jehová xuk'ut k'a ri' chuwech ri Moisés, chupan jun ruxaq q'aq' ri nel-pe chupan jun q'ayis k'o ruk'ixal. Toq ri Moisés xutz'et ri' xuch'ob rij chi achike roma toq ri jun k'ix ri' man nik'is ta qa pa ruq'a' ri q'aq'.

³ Jari' toq rija' xubij-qa: ¡Kijel na apo chutz'etik achike roma man nik'is ta qa la q'aq'! Roma kan man jun bey nutz'eton la kela', xcha'.

⁴ Toq ri Dios xutz'et chi ri Moisés tzalan-apo richin niberutz'eta', jari' toq xroyoj-pe pa runik'ajal ri q'ayis ri nijinon pa q'aq' y xubij: ¡Moisés, Moisés!, xcha-pe chire. Y ri Moisés xubij: Jare' ink'o wawe', xcha'.

⁵ Y ri Jehová xubij: Man kajel-pe, tawelesaj la axajab chi'awaqen, roma la akuchi at pa'el-wi wakami, kan wichin yin, xcha' chire.

⁶ Y chuqa' xubij chire: Ja yin ri ru-Dios ri atata', ri ru-Dios ri Abraham, ri ru-Dios ri Isaac, y ri ru-Dios ri Jacob, xcha' chire. Toq xrak'axaj keri', ri Moisés xrewaj rupalej, roma xuxibij-ri' richin nutzu' ruwech ri Dios.

⁷ Y ri Jehová xubij k'a chire: Yin kan nintz'et-wi ri tijoj-poqonal ri nuq'axaj ri nutinamit ri k'o pan Egipto, roma e ya'on pa kow taq samaj. Xinwak'axaj ri raqoj-chi'ij ri nikiben y re' kan nuya' k'a q'axo'n chuwe yin y ninjoyowaj kiwech.

⁸ Roma ri' xiqaqa-pe richin chi yetotej-el pa kiq'a' ri aj-Egipto, y yenwelesaj-el chupan ri ruwach'ulew ri', y yenk'uaj chupan jun utzilej ruwach'ulew y nim, ri akuchi niwachin-wi ronojel ruwech tiko'n, ri akuchi k'o-wi ri kiruwach'ulew ri winaqi' cananeo, ri heteo, ri amorreo, ri ferezeo, ri heveo y ri jebuseo.

⁹ Ri kiraqoj-chi'ij ri israelita kan napon-wi chinuwech yin y chuqa' nintz'et chi kan janila e ya'on pa tijoj-poqonal koma ri aj-Egipto.

¹⁰ Jak'a re wakami ninwajo' chi yabe rik'in ri rey richin ri Egipto, richin chi ye'awelesaj-pe ri winaqi' israelita ri e nuwinaq yin, xcha' ri Jehová.

¹¹ Jari' toq ri Moisés xubij chire ri Dios: ¿In achike ta k'a yin, richin chi ja yin ri yinateq-el k'a rik'in ri rey, y yenwelesaj-pe pan Egipto ri nuwinaq ri junan wijatzul kik'in?, xcha'.

¹² Y ri Dios xubij chire: Kabiyin, roma yin kan xkik'oje' awik'in, y ja retal re' ninya' chawe chi kan ja yin ri yitaqon awichin, chi toq xke'awelesaj-pe pan Egipto, jari' toq rix xkinisamajij pa ruwi' re juyu' re', xcha' ri Dios chire.

¹³ Jak'a ri Moisés xubij chire ri Dios: Wi ta yin yinapon kik'in ri nuwinaq, y ninbij chike: Ri Dios ri kichin kan ri qati't-qamama' in rutaqon-pe iwik'in rix, xkicha' chike, wi rije' xtikik'utuj chuwe: ¿Achike rubi'?, xkecha' chuwe. ¿Achike k'a xtinbij yin chike?, xcha' ri Moisés chire ri Dios.

¹⁴ K'ari' ri Dios xubij chire ri Moisés: JA YIN RI' RI KAN JANTAPE' INK'O. Y xubij chuqa': Keri' xtabij chike ri awinaq: RI JANTAPE' INK'O, jari' ri in taqayon-pe iwik'in rix, xtabij, xcha' ri Dios chire ri Moisés.

¹⁵ Chuqa' xubij chire ri Moisés: Kere' tabij chike ri awinaq: Jehová ri Dios kichin kan ri qati't-qamama', ri Abraham, ri Isaac, y ri Jacob, ja rija' ri in taqayon-pe iwik'in rix, xkacha' chike. Ja nubi' re' richin q'asen. Rik'in k'a re bi'aj re' xkinatex koma ri winaqi' chi wiq chi tanaj.

¹⁶ Kabiyin k'a y toq xkatapon, ke'amolo' ri nima'q taq achi'a' chikikojol ri awinaq y tabij chike: Ri Jehová ri ki-Dios ri qati't-qamama', ri Abraham, ri Isaac y ri Jacob, xuk'ut-ri' chinuwech y xubij chuwe chi rija' kan nutz'et k'a ronojel ri ruk'ayewal ri niban chiwe wawe' pan Egipto y roma ri' xpe chi'ito'ik.

¹⁷ Xubij k'a chi yixrelesaj-el chupan ri tijoj-poqonal, y yixruk'uaj k'a chupan ri ruwach'ulew ri wakami k'o pa kiq'a' ri winaqi' aj-Canaán, ri heteo, ri amorreo, ri ferezeo, ri heveo, y ri jebuseo, ruwach'ulew akuchi niwachin-wi ronojel ruwech tiko'n, kere' xubij chuwe, xkacha' chike.

¹⁸ Wakami ri e tata'al richin ri Israel kan xtikinimaj k'a el ri atzij y xkixbe k'a rik'in ri rey richin Egipto y rat xtabebij chire: Ri Jehová ri qa-Dios roj ri oj israelita xuk'ut-ri' chiqawech y xch'on qik'in y roma ri' taya' k'a q'ij chiqe richin yojbe pa tz'iran ruwach'ulew richin nibeqasuju' kamelabel chire ri Jehová ri qa-Dios roj. Oxi' k'a q'ij xqojbiyin-el richin yojapon-el k'a chiri', xkacha' chire.

¹⁹ Jak'a yin kan wetaman chi ri rey richin ri Egipto man xkixruya' ta el chi utzil, xa kan k'a k'o na jun ri chi uchuq'a' xtuben chire chi xkixrisq'opej-el.

²⁰ Roma ri', yin kan xtinben chi xtiqaqa ruk'ayewal pa ruwi' ri Egipto, kan xtinben chi xkebanatej banobel ri man jun bey e tz'eton ta. K'a chirij ri' xtuya-el q'ij chiwe richin xkixbe.

²¹ Y yin kan xtinben k'a chike ri winaqi' aj-Egipto chi kan utz xkixkitz'et y roma ri' kan k'o k'a ri xtikiya-el chiwe richin man choj keri' yixbe.

²² Roma ri' toq chikijujunal ri ixoqi' israelita xtikik'utuj-el chike ri ixoqi' e kachk'uljay aj-Egipto, o chike xabachike ixoqi' ri akuchi ek'o-wi, rije' kan xkekiyala' k'a el chiwe ronojel ri k'o kejqalen ri e banon rik'in saqipueq y q'anapueq. Chuqa' kan xkekiyala-el jebelej taq tzieq, richin chi jari' xkekikusala' ri imi'al-ik'ajol. Y keri' xtimej-el ri kibeyomel ri aj-Egipto, xcha' ri Dios chire ri Moisés.