Ex 29 - Kaqchiquel Bible

¹ Ja ruchojmilal re' ninya' kan chawe, ri ruk'amon richin naben kik'in ri Aarón y ri e ruk'ajol, toq xtikichop ri kisamaj richin sacerdote: Rat, xtabek'ama' k'a pe chikikojol ri q'ataj wákix jun nima-alaj achij wákix y e ka'i' achija' karne'l, ri kan e tz'aqet.

² Chupan ri q'ij ri' xtaben k'a kaxlan-wey y seteseq kaxlan-wey ri e wotz'otz' y xke'aben rik'in k'ej ri k'o aceite rik'in. Chuqa' xke'aben kaxlan-wey ri e yuquyeq, e tz'ajin y ya'on aceite chikij. Re kaxlan-wey re' xke'aben rik'in chayun k'ej y maneq ch'amilej-q'or rik'in.

³ Y ri jalajoj kibanik kaxlan-wey ri', xke'iya-el pa jun chakech richin chi xtik'uaj-apo k'a chinuwech yin. Junan k'a xtik'uaj-apo rik'in ri jun nima-alaj achij wákix y ri e ka'i' achija' karne'l.

⁴ Y xke'ak'uaj-apo ri Aarón y ri e ruk'ajol, ri chiri' pa okibel chire ri wachoch richin ri molojri'il y chiri' chuqa' tabana' chike richin tikich'ajch'ojirisaj-ki'.

⁵ Y k'ari' xtabek'ama-pe ri tzieq ri banon chik richin chi jari' ri xtukusaj ri Aarón. Kan ja rat k'a ri xkajalo-el richin, nabey xtaya' chirij ri tzieq ri más nim raqen, chirij ri' xtaya-qa ri jun chik ko'ol raqen tzieq, xeri' xtaya' ri efod y k'a chuwech ri' xtatzeqeba-wi-el ri ti peqes, ri nuk'uaj chuwa-ruk'u'x. Y k'ari' k'a xtaxim-el ri ximibel-rupan ri efod.

⁶ K'ari' xtaya' chuqa' ri kuchubel-rujolon ri Aarón, ri retal ri rusamaj. Xtaya' chuqa' el ri tz'ajtz'ik q'anapueq nik'aj-ruwech, chuwech ri kuchubel-rujolon ri nuk'ut chi kan wichin yin.

⁷ Chirij ronojel re' rat xtabek'ama-pe ri aceite ri richin cha'onri'il y xtaqasaj pa ruwi' ri Aarón, richin nok nu-sacerdote.

⁸ K'ari' xke'awoyoj ri e ruk'ajol ri Aarón y xtaya' ri nim raqen tzieq chikij.

⁹ Xtaya' chuqa' ri ximibel-kipan ri e ruk'ajol y ri kuchubel-kijolon. Y kan jak'a ri Aarón y ri e ruk'ajol ri xke'ich'er richin xke'ok nu-sacerdote y re' jun ruchojmilal richin jantape'. Kere' k'a ri rubanik xtaben toq ri Aarón y ri e ruk'ajol xke'ok sacerdote.

¹⁰ Xeri' xtuk'uex ri nima-alaj achij wákix chuwech ri wachoch richin molojri'il, y ri Aarón y ri e ruk'ajol xtikiya' ri kiq'a' pa ruwi' rujolon ri chikop ri',

¹¹ y xtakamisaj k'a chinuwech yin, chiri' akuchi k'o-wi ri okibel richin ri wachoch richin molojri'il.

¹² Xeri' xtaju' jun ruwi-aq'a' chupan ri rukik'el ri nima-alaj achij wákix y nakil chikij ri uk'a' ri ek'o chire ri porobel y jak'a ri ch'aqa' chik kik' xtatix chuxe' ri porobel.

¹³ Ronojel k'a ri ruq'anal ri k'o chirij ri rixkolob, ri k'o chirij ri rusase', ri k'o chikij ri rukinaq', xtaporoj k'a pa ruwi' ri porobel.

¹⁴ Jak'a ri ruch'akul, ri rusale'y y ri rutz'ilol rupan ri chikop, xtabeporoj kan k'a chuchi-el ri akuchi ixk'o-wi-qa. Keri' rubanik xtaben chire roma re' jun kamelabel richin nikuyutej ri mak.

¹⁵ Chuqa' xtak'en k'a apo jun chike ri achija' taq karne'l y k'ari' ri Aarón y ri e ruk'ajol, xtikiya' ri kiq'a' pa ruwi' ri rujolon ri karne'l.

¹⁶ K'ari' xtakamisaj k'a y ri rukik'el xtachikaj chi kaji' ruxikin ri porobel.

¹⁷ Chirij ri' xtaqupila' ri ruch'akul ri karne'l ri', xtach'ej ri mololen ri k'o chupan y ri raqen. Y ronojel re' xtaya' pa ruwi' ri porobel junan rik'in ri ti'ij ri iqupin chik, rachibilan ri rujolon.

¹⁸ Xtaporoj k'a chijun ri karne'l pa ruwi' ri porobel. Re' jun jubulej sipanik poron chuwe yin Jehová, jun sipanik ri jebel ruxla' ri nasuj chuwe yin pa ruwi' ri q'aq'.

¹⁹ Xeri' xtik'en chik k'a pe ri jun chik achij karne'l y ri Aarón y ri e ruk'ajol xtikiya' chik ri kiq'a' pa ruwi' rujolon ri karne'l ri'.

²⁰ Xtakamisaj k'a y xtachop juba' ri rukik'el y xtiya' chutza'n ri ruxikin ri Aarón ri k'o pa rijkiq'a', chirij ri nim rupan ruwi-ruq'a' y ri nim rupan ruwi-raqen ri k'o pa rijkiq'a'. Chuqa' keri' niben chike ri e ruk'ajol. Y juba' chire ri kik' xtachikaj k'a chi kaji' ruxikin ri porobel.

²¹ Y ri juba' chik kik' ri k'o pa ruwi' ri porobel xtaxol rik'in ri aceite richin cha'onri'il, y xtachikaj k'a pa ruwi' ri Aarón y chirij ri rutziaq chuqa'. Keri' chuqa' xtaben chike ri e ruk'ajol y chire ri kitziaq rije'. Richin keri' ri Aarón, ri e ruk'ajol y chuqa' ri kitziaq xkench'er chire ri nusamaj.

²² Xeri' xtamol ronojel ri ruq'anal ri achij karne'l ri', ri rujey ri jebel q'en, ri ruq'anal ri k'o chirij ri rixkolob y ri ruq'anal ri k'o chirij ri rusase', ri ka'i' rukinaq' rachibilan ri kiq'anal y chuqa' ri racheq ri k'o pa rijkiq'a'. Keri' rubanik xtaben chire roma re' jun kamelabel richin yeya'ox kan pa samaj.

²³ Chuqa' xtak'en-el chupan ri ti chakech ri aya'on chik chinuwech yin, jun kaxlan-wey, jun setesik kaxlan-wey ri wotz'otz' ri xolon aceite rik'in y jun kaxlan-wey ri yuquyik y tz'ajin, ri kan man ya'on ta ch'amilej-q'or kik'in.

²⁴ Ronojel ri ti'ij y ri kaxlan-wey ri' xtaya-el pa ruq'a' ri Aarón y pa kiq'a' ri e ruk'ajol. Y rije' xtikili'ej k'a ri sipanik pa kiq'a' y xtikisiloj chinuwech, roma kere' rubanik toq nisuj jun sipanik kere'.

²⁵ Xeri' xtak'en chuwi-kiq'a' y xtaya' pa ruwi' ri porobel y xtaporoj k'a. Re' jun jubulej sipanik poron chuwe yin Jehová, jun sipanik ri jebel ruxla' ri nasuj chuwe yin pa ruwi' ri q'aq'.

²⁶ Chirij re', rat xtak'en k'a ri ruwa-ruk'u'x ri ti achij karne'l, ri kamelabel richin ri Aarón roma nok kan pa samaj. Xtasiloj k'a chinuwech yin, kan achi'el jun sipanik ri keri' rubanik. Y re ti'ij re' xtasuj awoma rat.

²⁷ Y rat kan xtach'er k'a kan ri ruwa-ruk'u'x y ri racheq ri karne'l, ri richin pa rajxokon, ri xsilox y xyak chikaj chinuwech yin, chupan re q'ij re' toq ri Aarón y ri e ruk'ajol xek'oje' kan chupan ri samaj.

²⁸ Ri ruwa-ruk'u'x y ri racheq ri karne'l, ri richin pa rajxokon, richin ri kamelabel ri nikisuj ri winaqi' israelita, kan k'o k'a chi nich'ar kan. Kan xtok k'a kan jun pixa' ri richin jantape'. Kan kere' k'a xtiban toq k'o jun kamelabel richin nijunamatej-ruwech ri wineq wik'in yin Jehová. Sipanik ri niyak-q'anej chikaj chinuwech yin.

²⁹ Ri tzieq ri nukusaj ri Aarón toq yirusamajij, xtok k'a kan kichin ri e rijatzul, ri xke'ok nimalej taq sacerdote. Toq rije' xkecha'ox y xke'ok kan pa samaj.

³⁰ Ri rijatzul ri xtok kan sacerdote pa ruk'exel rija', wuqu' k'a q'ij xtukusaj re tzieq re', richin chi ruk'amon xtok-apo chupan ri wachoch ri richin molojri'il y richin yirusamajij.

³¹ Xeri' xtabek'ama' k'a pe ri ruwa-ruk'u'x y ri racheq ri karne'l ri xasiloj chinuwech yin y xtaroqowisaj chiri' chuwa-jay, ri akuchi ch'aron-wi richin niroqowisex ri q'utun, toq k'o jun ri nok kan pa samaj.

³² Jak'a ri Aarón y ri e ruk'ajol ri xketijo re ti'ij re', rachibilan ri kaxlan-wey ri ek'o kan chupan ri chakech. Re' xtikitej ri chiri' pan okibel chire ri wachoch.

³³ Xaxe k'a rije' ri utz xketijo ri kik'uan-apo chuwech ri Jehová, ri sipanik ri xkisuj roma ri kimak y roma ri xejach kan chupan ri kisamaj. Y kan man jun k'a wineq ri ruk'amon ta chi nitijo ri sipanik ri', roma ri sipanik ri' kan jachon chire ri Jehová.

³⁴ Wi man nikik'is ta ri ti'ij y ri kaxlan-wey chupan ri q'ij ri', toq xtiseqer-pe kan xtiporoj y man jun chik titijo roma re' xajan richin nitij roma jun chik wineq.

³⁵ Kan kere' k'a tabana' kik'in ri Aarón y ri e ruk'ajol, kan achi'el ronojel ri xinbij yin chawe. Wuqu' k'a q'ij ri xtakusaj richin naya' ri ruchojmilal chike, richin ye'ok kan nu-sacerdote.

³⁶ Y ronojel k'a q'ij chire ri wuqu' q'ij ri' xtasuj jun alaj achij wákix richin kuyubel-mak pa ruwi' ri porobel. Ronojel mul toq xtasuj ri kamelabel, k'o chi nach'ajch'ojirisaj na ri porobel. Y k'ari' xtaya' aceite pa ruwi' y keri' ri porobel kan xtajech k'a pa nusamaj.

³⁷ Chi wuqu' q'ij k'a xtaporoj ri kamelabel ri', richin keri' ri porobel kan xtok k'a wichin yin. Y roma ri' toq re porobel re' nutun ta apo ri' rik'in xabachike, kan nuben chire chi chuqa' nok richin ri Dios.

Ri sipanik richin ronojel q'ij

³⁸ Jare' ri sipanik ri xtisuj ronojel q'ij: Xtik'en pe ri ka'i' alaji' taq karne'l ri jujun kijuna', kan kere' xtiben richin jantape'.

³⁹ Ri jun karne'l xtiporoj ri nimaq'a' y ri jun chik xtiporoj toq xqaqa yan qa ri q'ij.

⁴⁰ Ri chikop ri' toq nisuj, rachibilan ka'i' libra k'ej chayun, xolon rik'in jun litro aceite richin olivo. Y chuqa' xtiq'ej pa ruwi' ri' jun litro vino richin jun sipanik.

⁴¹ Y toq xtiqaq'ij-qa, xtisuj k'a ri jun chik karne'l y niben chire achi'el ri xisuj ri nimaq'a' y niya' ri k'ej y ri vino chirij. Y re' kan jare' ri sipanik poron y jubul ruxla' chinuwech yin Jehová.

⁴² Kan kere' k'a xtikiben ri iwijatzul chi wiq chi tanaj, rije' xtikisuj k'a chuwe yin re kamelabel re', ri akuchi niban-wi oken chupan re wachoch. Y chiri' xtiqak'ul-wi-qi', rat Moisés y yin, richin chi yich'on awik'in.

⁴³ Y ja ri chiri' chuqa' xtiqak'ul-wi-qi', ri awinaq y yin, roma ri' ri chiri' ri akuchi niban-wi oken, kan xtok wichin yin, roma ja ri chiri' xtink'ut-wi' rik'in ri nuq'ij-nuk'ojlen.

⁴⁴ Ri wachoch y ri porobel kan xkench'er k'a richin chi ye'ok wichin yin y keri' chuqa' xtinben rik'in ri Aarón y ri e ruk'ajol, kan xke'ok nusamajela' roma ye'ok nu-sacerdote.

⁴⁵ Y keri', yin kan xkik'oje' k'a chi'ikojol y ja yin ri xkinok ri i-Dios.

⁴⁶ Y xtiwetamaj k'a chi ja yin Jehová ri in i-Dios, ri xinelesan-pe iwichin chupan ri ruwach'ulew Egipto, richin chi yin yitikir k'a yik'oje' chi'ikojol rix. Yin Jehová Dios ri yibin.