Ex 25 - Kaqchiquel Bible

¹ Ri Jehová xch'on chik k'a rik'in ri Moisés y xubij chire:

² Tabij chike konojel ri awinaq israelita chi chikijujunal tikik'ama-pe jun sipanik chuwe. Y konojel k'a ri kan rik'in ronojel kánima xtikik'en-pe ri sipanik ri', ja rat k'a ri xkak'ulun kan chuwi-kiq'a', pa nubi' yin.

³ Y ri sipanik k'a ri ruk'amon richin nikik'en-pe richin nokiya' kan chawe, ja ri q'anapueq, ri saqipueq y ri q'enq'oj-pueq.

⁴ Utz chuqa' nikik'en-pe ri betz' raxroj, q'eqq'oj-keq y keq yetzu'un, chuqa' ri betz' lino jijoj ruwech y ri rusumal tzuntzun,

⁵ chuqa' rusale'y karne'l aq'oman rik'in keq, ri kisale'y ri chikopi' ri nibix tejón chike y che' acacia.

⁶ Utz chuqa' nikik'en-pe aceite richin yetzije' ri candil, chuqa' mololen taq aq'om richin niban ri aceite richin cha'onri'il y ri jubulej taq aq'om richin niban ri pom,

⁷ chuqa' utz nikik'en-pe ri jebelej taq abej ónike y ch'aqa' chik kiwech jebelej taq abej richin xtiya'ox chuwech ri tzieq efod*f10* ri banon rik'in lino y richin xtiya' chuwech ri ti peqes ri xtuk'uaj chuwa-ruk'u'x ri nimalej sacerdote.

⁸ Y xeri' ri awinaq kan tikibana' k'a jun jay ri kan wichin yin, richin chi chiri' yinok'oje-wi-qa ri chi'ikojol.

⁹ Y ri rubanik ri xtikiben chire, kan achi'el ri rubanik ri xtink'ut yin chawech. Keri' chuqa' rubanik xtikiben chire ronojel ri xkebek'atzin chupan ri wachoch, richin niya' nuq'ij.

Ri káxa ri nik'oje' chupan ri rachoch ri Jehová

¹⁰ Xtabij chi tikibana' jun káxa rik'in che' acacia; ri raqen wo'o' q'a'aj rik'in nik'aj, ri ruwech oxi' q'a'aj y ri rujotolen oxi' q'a'aj.

¹¹ Y xtikiq'olij rik'in q'anapueq, ri chirij y ri chupan y pa ruwi' xtikiben-q'anej jun chik retz'aba'l ruchi', rik'in chuqa' q'anapueq.

¹² Xtikiben chuqa' kaji' argolla rik'in q'anapueq ri ya'erisan pa q'aq' y xkekiyala' ri pa taq rutza'n ri chiri' pa taq ruxikin ri káxa, ka'i' k'a argolla ri xtibe juk'an y ka'i' ri juk'an chik.

¹³ Y xtikiben chuqa' baloj nima'q kaqen, rik'in ri che' acacia y xtikiq'olij-kij rik'in q'anapueq.

¹⁴ Re baloj re' xkekiju' chupan ri argolla ri xkeya'ox pa taq ruxikin ri káxa y rik'in re' xtikik'uaj-wi.

¹⁵ Y re baloj re' kan xkek'oje' kan chiri' chupan ri argolla ri' y man xkejurux ta chik el.

¹⁶ Y ri ka'i' tz'alem taq abej ri xkenya' chawe, ri e tz'ibatel ri nupixa' chikiwech, xke'aya' k'a chupan ri káxa.

¹⁷ Y xtaben k'a chi xtiban ri tz'apebel ruwi' ri káxa, ri niya'on kuyubel. Re tz'apebel re' xtiban rik'in jun jebelej q'anapueq. Ri raqen wo'o' k'a q'a'aj rik'in nik'aj xtiban chire y ri ruwech oxi' q'a'aj.

¹⁸ Y pa ruwi' ri tz'apebel ri', ri pa taq rutza'n xkeban jujun kiwachibel querubín ri nikitzu-ki'. Rik'in k'a q'anapueq xkeban-wi y xtiban kutzil rik'in bajibel.

¹⁹ Jun ruwachibel querubín xtiya'ox k'a pa jun rutza'n ri tz'apebel y ri jun chik xtiya'ox pa jun chik rutza'n. Re ka'i' ruwachibel re' kan xtikich'akulaj k'a ki' rik'in ri tz'apebel.

²⁰ Ri jun ruwachibel querubín niban k'a chire chi k'o apo chuwech ri jun y ri jun chik k'o pe chuwech re jun re'. Niban chike chi kirik'on-apo ri kixik' chikiwech, richin nikimatzej ruwi' ri tz'apebel. Y niban chuqa' chike chi rije' yetzu'un-qa pa ruwi' ri tz'apebel.

²¹ Y chupan k'a ri káxa ri' xtaya-wi ri ka'i' tz'alem taq abej, ri niq'alajirisan chi roj k'o chik tununri'il chiqakojol y k'ari' xtaya' ri tz'apebel ruwi' ri káxa.

²² Y chiri' k'a pa ruwi' ri tz'apebel, chiri' chikikojol ri e ka'i' querubín, chiri' xtink'ut-pe-wi' chawech. Ja ri chiri' ri xtiqak'ul-wi-qi' richin xtinbij ri k'atzinel richin nikiben ri awinaq.

Ri mesa richin ri kaxlan-wey

²³ Chuqa' xtaben chike ri awinaq chi tikibana' jun mesa rik'in ri che' rubini'an acacia. Wo'o' k'a q'a'aj ri raqen, ka'i' q'a'aj ri ruwech y oxi' q'a'aj ri rujotolen xtikiben chire.

²⁴ Y chijun re mesa re' xtikiq'olij rij rik'in q'anapueq ri jebel ch'ajch'oj y chuqa' xtikiben jun retz'aba'l-ruchi' rik'in q'anapueq.

²⁵ Y k'ari' xtikiben chik q'anej jun ti ruchi', ri oxi' ruwi' q'a'aj rujotolen. Y re ruchi' re' xtikiben chuqa' jun retz'aba'l ruchi', rik'in q'anapueq.

²⁶ Xeri' xkeban kaji' argolla rik'in q'anapueq y xkeya' ri pa taq ruxikin, ri akuchi e tikil-wi ri kaji' raqen.

²⁷ Ri argolla kan chuxe-ok ri ruchi' ri mesa yebe-wi, richin chi yeju'ux ri baloj taq che' chupan, richin chi nitelex-el.

²⁸ Ri baloj che' ri' xkekiben rik'in che' acacia y xkekiq'olij rik'in q'anapueq y kik'in ri' xtuk'uex-wi ri mesa.

²⁹ Chuqa' xkekiben leq lik'ileq, ri pajbel, ri pichel y ri qumbel richin ri vino, ri niya'ox pa kiwi' ri sipanik. Y ronojel re' kan rik'in k'a q'anapueq xkekiben-wi.

³⁰ Kan jantape' k'a xtiya'ox ri kaxlan-wey pa ruwi' ri mesa, chinuwech yin, richin jun sipanik.

Ri candelabro ri banon rik'in q'anapueq

³¹ Chuqa' xtikiben jun candelabro rik'in q'anapueq jebel ch'ajch'oj achi'el rubanik jun ti che' almendra,*f11* y re' xtikiben rutzil rik'in jun bajibel. Xtikiben ri ruch'okolibal, ri raqen, ri ruq'a', ri taq rusi'j y ronojel ri retz'aba'l rik'in k'a q'anapueq xtikiben-wi y kan ruch'akulan-ri' xtikiben chire.

³² Y chire ri raqen xke'el waqi' ruq'a', oxi' ri juk'an y oxi' chik ri juk'an.

³³ Chikijujunal k'a ri ruq'a' nikik'uaj oxi' kiwachibel rusi'j ri almendro, jak'a ri rox rusi'j ri k'o pa taq kitum chike chikijujunal ri ruq'a' ek'o taq k'ojelibel kik'uan.

³⁴ Y ri raqen ri candelabro ri akuchi ye'el-el ri ruq'a', xtuk'uaj jujun kiwachibel rusi'j almendro. Kaji' k'a rusi'j almendro xtuk'uaj.

³⁵ Richin chi ri jujun k'ulaj ruq'a' nibe jun ruwachibel rusi'j ri almendro chikixe'. Kan keri' niban chire ri chi e oxi' k'ulaj ruq'a'.

³⁶ Ri raqen, ri ruq'a' y ri ruwachibel ri rusi'j ri almendro kan nuch'akulaj-ri' niban chire. Y re' nikiben rik'in q'anapueq jebel ch'ajch'oj y nikiben rutzil rik'in bajibel.

³⁷ Y xeri' xke'iben wuqu' taq candil y xke'ich'okobala' jujun pa kiwi' ri k'ojelibel ri ek'o pa kitum chike chikijujunal ri ruq'a' ri candelabro. Y xtiben chike chi ri taq kiq'aq'al ri candil chikiwech yetzu'un-wi.

³⁸ Ri kichojmirisabal ri taq ruxaq q'aq' kichin ri taq candil y ri k'ojelibel richin chaj, kan rik'in ch'ajch'ojilej q'anapueq xtiben-wi.

³⁹ Kan rik'in k'a ch'ajch'ojilej q'anapueq tibana-wi ri candelabro y ri yek'atzin chire. Richin ye'iben re', tikusaj k'a jun oxi' arroba*f12* q'anapueq.

⁴⁰ Tatz'eta' jebel richin chi toq rije' xtikiben, kan tikibana' chire achi'el rubanik re jun re xatzu' kan re wawe' pa ruwi' re juyu'.