Ex 24 - Kaqchiquel Bible

Ri winaqi' xkiben jun jikibel-tzij rik'in ri Dios

¹ Y ri Jehová xch'on chik rik'in ri Moisés y xubij chire: Kajote-pe, awachibilan ri Aarón, ri Nadab, ri Abihú y ri e oxk'al lajuj rijita'q taq achi'a' ri k'o kiq'ij chupan ri tinamit y k'a nej kexuke-wi kan richin nikiya' nuq'ij.

² Y xaxe k'a rat Moisés ri xkajel-pe k'a wik'in. Ri ch'aqa' chik man kejel-pe, ni ta ri winaqi' richin ri tinamit man kejote-pe, xcha' chire.

³ Xeri' ri Moisés xqaqa k'a pe y xorucholo-qa ronojel ri pixa' y ronojel ri ch'abel ri xubij-pe ri Jehová chire. Y jari' toq ri winaqi' rik'in jun kich'abel xech'on y xkibij: Kan xtiqaben k'a ronojel ri rubin-pe ri Jehová, xecha'.

⁴ Ri Moisés kan xutz'ibaj k'a ronojel ri xubij-pe ri Jehová chire. Y ri ruka'n q'ij xyakatej nimaq'a' yan y xupaba-q'anej jun porobel richin kamelabel, chuxe-apo ri juyu' ri'. Chuqa' xerupaba-q'anej kablajuj abej, kik'exewach ri kablajuj tzobaj kichin ri rijatzul kan ri Israel.

⁵ Y ri Moisés xeruteq k'a e ka'i-oxi' alaboni' israelita, richin kekikamisaj nima-achija' taq wákix, richin yekiporoj chuwech ri Jehová y richin yekisuj chuqa' chire rija' richin chi niq'alajin chi kan junan kiwech rik'in.

⁶ Y ri Moisés xuk'ul kan pa nima'q taq k'ojelibel nik'aj chire ri kikik'el ri chikopi' y ri nik'aj chik jari' ri xuchikaj pa ruwi' ri porobel.

⁷ Y k'ari' xuchop ri wuj ri richin ri rujikibel-tzij ri Jehová y xusik'ij chuwech ri tinamit y konojel xkibij: Kan xtiqaben ronojel ri rubin kan ri Jehová y kan xtiqanimaj ri rutzij, xecha'.

⁸ K'ari' ri Moisés xberuk'ama-pe ri nik'aj chire ri kik' ri e ruya'on chupan ri nima'q taq k'ojelibel y xuchikaj pa kiwi' ri winaqi' y xubij: Rik'in re kik' re' niq'alajin ri jikibel-tzij ri nuben ri Jehová iwik'in y chuqa' nijike' kan pa kiwi' ri ch'abel ri xebitej-qa, xcha'.

⁹ Xeri' xejote-q'anej pa ruwi' ri juyu' Sinaí; ri Moisés, ri Aarón, ri Nadab, ri Abihú, y ri e oxk'al lajuj rijita'q taq achi'a' ri k'o kiq'ij richin ri Israel.

¹⁰ Y rije' xkitz'et k'a ri Dios richin ri Israel ri chiri' y ri akuchi pa'el-wi rija' jun k'a nimalej ripirik abej rubini'an zafiro, niyok'olin y ch'ajch'oj-ch'ajch'oj nitzu'un ri ruwi', kan achi'el ri kaj toq ch'ajch'oj-ch'ajch'oj ri ruwech.

¹¹ Y ri Jehová kan man jun k'a achike ta xuben chike rije'. Y kan ja ri chiri' chuwech rija' xewa-xe'uk'ya-wi.

Ri Moisés xjote' chik el pa ruwi' ri juyu' Sinaí

¹² Chirij ri' ri Jehová xch'on chik rik'in ri Moisés y xubij: Kajote-pe wawe' wik'in pa ruwi' re juyu' y xkak'oje' wik'in. Y yin xtinya' k'a ri tz'alem taq abej chawe, ri uk'uayon ri pixa' ri ninwajo' chi niben. Ri xintz'ibaj kan richin chi rat nak'ut chikiwech ri winaqi'.

¹³ Y ri Moisés jari' k'a nibe-el pa ruwi' ri juyu' rachibilan-el ri Josué ri ruto'onel.

¹⁴ Y roma ri' rija' xubij kan chike ri rijita'q taq achi'a' ri k'o kiq'ij: Qojiwoyobej k'a, k'a toq xqojtzolin na pe iwik'in. Ri Aarón y ri Hur jari' ri xkek'oje' kan iwik'in. Wi k'o ta jun oyowal nibek'ulun-pe chi'ikojol, kan kixapon k'a kik'in rije', xcha' kan chike.

¹⁵ Y jari' toq ri Moisés xjote' k'a q'anej pa ruwi' ri juyu' y ri sutz' kan xutz'apej rij ri juyu' ri'.

¹⁶ Y ri ruk'ojlen ri Jehová xok'oje' k'a qa pa ruwi' ri juyu' Sinaí. Y ri sutz' ri k'o chiri', waqi' k'a q'ij xutz'apej rij ri juyu'. Y chupan ri ruwuq q'ij, ri Jehová xroyoj k'a ri Moisés ri k'o chiri' pa runik'ajal ri sutz'.

¹⁷ Chikiwech ri winaqi' israelita, xq'alajin chi ri rubanik ri ruk'ojlen ri Jehová, achi'el jun nimalej q'aq' ri nitikir nuk'is ronojel. Keri' ri rubanik ri xq'alajin ri pa rutza'n-q'anej ri juyu'.

¹⁸ K'ari' ri Moisés xok-apo pa runik'ajal ri sutz' y xjote-el k'a pa rutza'n-q'anej ri juyu' y chiri' k'a xk'oje-wi kawineq q'ij y kawineq aq'a'.