Ex 20 - Kaqchiquel Bible

¹ Y ri Jehová Dios xch'on chik y xubij k'a ronojel re ch'abel re':

² Ja yin Jehová ri in i-Dios, ri xinelesan-pe iwichin ri chiri' pa ruwach'ulew Egipto, ri akuchi xixyuqe-wi pa samaj.

³ Man tiben chi kan ek'o ch'aqa' chik dios, roma xaxe yin ri qitzij Dios.

⁴ Man jun wachibel tiben richin niya' kiq'ij: Man tiben kiwachibel ri ek'o chuwech ri kaj, ni ri ek'o chuwach'ulew, ni ri ek'o chupan ri ya'.

⁵ Man k'a kixxuke' chikiwech rije', ni man tiya' kiq'ij, roma ja yin Jehová ri in i-Dios ri kan man niqa' ta chinuwech richin niya' ruq'ij jun chik. Jak'a wi yiniwetzelaj, ri woyowal yin xkeruq'i' ri iwalk'ual, k'a pa rox o pa rukaj sol.

⁶ Man rik'in ri', kan xtinjoyowaj k'a iwech rix y keri' chuqa' xtinben kik'in ri iwijatzul richin jantape'. Keri' xtinben kik'in ri ye'ajowan wichin y ri nikitaqej ri nupixa'.

⁷ Man chaq tinatala' ri nubi' yin Jehová ri i-Dios chaq keri'. Yin kan man xtinben ta chiwe chi maneq imak wi chaq ninatala' ri nubi' y man niya' ta wejqalen.

⁸ Toqaqa k'a chi'ik'u'x ri q'ij richin uxlanen, richin chi nich'er chuwe yin.

⁹ Waqi' k'a q'ij k'o richin niben ri isamaj y chupan ri q'ij ri' tibana' kan ronojel.

¹⁰ Jak'a chupan ri ruwuq q'ij, jun q'ij richin uxlanen y kan ruk'amon chi nich'er chuwe yin Jehová ri i-Dios y kan man jun k'a isamaj xtiben chupan ri q'ij ri', ni rix, ni ri ik'ajol, ni ri imi'al, ni ri isamajela' ri e yuqul pa samaj iwik'in, ni ri iwaj-ik'a', ni ri chikopi' ri e iwichin rix, ni ri winaqi' ri man iwinaq ta ri ek'o iwik'in.

¹¹ Roma yin Jehová, pa waqi' q'ij xinben ri kaj, ri ruwach'ulew, ri palou y ronojel ri ek'o chupan, jak'a chupan ri ruwuq q'ij, yin kan xinuxlan chire ri samaj ri'. Roma ri' ri ruwuq q'ij kan xinch'er richin uxlanen.

¹² Tiya' kiq'ij ri ite-itata', richin chi k'iy k'a juna' xkixk'ase-el chuwech re ruwach'ulew, ri ninya' yin Jehová ri i-Dios chiwe.

¹³ Man tiben k'a kamik.

¹⁴ Rix ri ix k'ulan man tikanoj jun chik.

¹⁵ Man kixeleq'.

¹⁶ Man tiyek tzij chirij jun chik iwinaq.

¹⁷ Man tirayij chi iwik'in ta rix k'o-wi ri k'o kik'in ri iwachpochel: Man tirayij kiwech ri kixjayilal, ni ri kisamajela', ni ri kaj-ik'a', ni ri kibóyix, ni ri kibur; ni man jun chike ri e kichin ri iwachpochel tirayij, xcha' ri Jehová.

Ri xibinri'il richin ri tinamit

¹⁸ Y toq konojel k'a ri winaqi' xkak'axaj ri koqolajay, ri koyopa', ri xupubel y xkitz'et chi ri juyu' nibuqulin; rije' k'a nej xebepa'e-pe y yebaybot roma ri kixibin-ki'.

¹⁹ Y jari' toq xkibij chire ri Moisés: Más utz ja rat kach'on qik'in y xkatqak'axaj, xaxe man tich'on chik ri Dios qik'in richin chi man yojken ta, xecha' ri winaqi'.

²⁰ Y ri Moisés xubij k'a chike ri winaqi': Man tixibij-iwi', roma ri Dios xpe richin yixrutejtobej. Re xibinri'il re' kan xtik'oje' k'a chi'ik'u'x y xtuben chiwe chi niya' ruq'ij-ruk'ojlen, richin chi man yixmakun ta chik chuwech, xcha' ri Moisés chike.

²¹ Y rokik ri winaqi' k'a nej xek'oje-wi-el chire ri juyu', ri Moisés xok-apo chupan ri pimilej-sutz' ri', ri akuchi k'o-wi ri Dios.

Ri ruchojmilal ri tz'aq richin kamelabel

²² Ri Jehová xubij chik chire ri Moisés: Tak'uaj k'a ri nuch'abel chike ri awinaq y tabij chike: Wakami rix kan itz'eton chik k'a toq kan k'a chila' chikaj xich'on-pe iwik'in.

²³ Roma ri' man utz ta chi rix xke'ibanala' ta pe chinuwech yin, ch'aqa' chik dios ri e banon rik'in saqipueq o ri e banon rik'in q'anapueq, richin chi niya' kiq'ij.

²⁴ Wakami k'a, rix tibana' jun porobel rik'in ulew y pa ruwi' ri' tiya-wi ri chikop ri nik'at chijun y pa ruwi' chuqa' ri' ke'iya-wi ri chikopi' ri ye'isuj chuwe richin jun sipanik richin nijunamatej-qawech. Y xabakuchi k'a ri xtinbij-wi yin chiwe chi tibana' jun natabel wichin, yin xkiqaqa-pe iwik'in y xkixinwurtisaj.

²⁵ Y wi xtiben porobel rik'in abej, man ke'itoch' richin niben kichojmil, roma wi keri' xtiben, xa kan xtiben chire ri porobel chi nisach ruch'ajch'ojil richin nikusaj chuwe yin.

²⁶ Y ri porobel ri xtiben chuwe yin, man tiben kan rujotolbal rik'in abej, richin chi man tiq'alajin ri ruch'akul ri nijote-q'anej, xcha' ri Dios.