Ex 19 - Kaqchiquel Bible

Toq ri israelita xe'apon pa Sinaí

^1-2 Chirij re', ri israelita xe'el-pe pa Refidim; y chupan k'a ri q'ij toq xtz'aqet oxi' ik' chi ke'el-pe pan Egipto, chupan ri q'ij ri', jari' toq xe'apon pa ruwa-taq'aj ri k'o chunaqaj ri juyu' Sinaí. Y chiri' xek'oje-wi-qa chuwech-pe ri juyu'.

³ Y ri Moisés xjote' k'a el pa ruwi' ri juyu'. Y ri chiri' pa ruwi' ri juyu', ri Dios xch'on-pe rik'in y xubij-pe chire: Kere' k'a tabij chike konojel ri e rijatzul ri Jacob, taya' rutzijol chike ri winaqi' israelita y tabij:

⁴ Rix kan xitz'et k'a jebel ri xinben yin kik'in ri aj-Egipto, ri xinben richin xixink'en-pe wawe' wik'in yin, achi'el xa ta xixpe pa ruwi' ruxik' jun kot.

⁵ Wakami k'a, wi kan xtinimaj k'a ri nuch'abel y nitaqej ri jikibel-tzij ri nubanon iwik'in, rix kan xkixok k'a jun tinamit ri janila iwejqalen chikiwech ri ch'aqa' chik tinamit. Man rik'in ri' chijun re ruwach'ulew kan wichin yin.

⁶ Chuqa' kan xkixok jun ajawaren kichin sacerdote richin yinisamajij y rix kan xkixok xaxe wichin yin, xkacha' chike, xcha' ri Jehová chire ri Moisés.

⁷ Y ri Moisés xqaqa k'a pe y xuteq koyoxik ri rijita'q taq achi'a' ri k'o kiq'ij y xuq'alajirisaj k'a chikiwech ronojel ri xubij-pe ri Jehová chi k'o chi nubij chike.

⁸ Y konojel k'a ri winaqi' kan junan k'a xech'on y xkibij: Roj kan xtiqaben k'a ronojel ri rubin-pe ri Jehová, xecha'. Y ri Moisés xuk'uaj k'a chire ri Jehová ri ch'abel ri xkibij ri winaqi'.

⁹ Y ri Jehová xubij chik k'a chire ri Moisés: Yin kan xkipe k'a pa jun pimilej-sutz' richin yich'on awik'in y ri awinaq kan xtikak'axaj k'a y kan xtikikuquba' kik'u'x awik'in richin jantape'. Y jari' toq ri Moisés xutzijoj-el chire ri Dios ri ch'abel ri xkibij ri winaqi'.

¹⁰ Y k'ari' ri Jehová xubij chik k'a chire ri Moisés: Kabiyin kik'in ri awinaq y tabana' k'a chike chi kan tikijacha-ki' chuwe yin chupan re q'ij re' y ri q'ij chua'q. Chuqa' kan tikich'aja' ri kitziaq.

¹¹ Roma chupan-apo ri rox q'ij, konojel ta winaqi' kichojmirisan ta chik ki', roma jari' toq ri Jehová xtiqaqa-pe pa ruwi' re juyu' re' y konojel ri awinaq kan kitzuliben k'a toq xtiqaqa-pe.

¹² Rat taya' k'a retal k'a akuchi utz chi yejel-apo ri winaqi' y man keq'ax-apo chire ri retal ri' y tabij chike: Tichajij-iwi' chi man yixjote-q'anej pa ruwi' ri juyu', ni man tineq chuqa'. Roma ri wineq ri xa man niniman ta tzij, xa xtiken y man jun ri xtitikir xtikolon richin.

¹³ Kan man jun k'a xtijelun ruq'a' chirij ri juyu', roma ri xtibanon keri' xtikamisex chi abej o chi ch'ab; ri' wi wineq o chikop: Y k'a toq xtiq'ajan na k'a pe ri xupubel banon rik'in uk'a', k'ari' utz richin xkejote-pe, xcha' ri Dios, chire ri Moisés.

¹⁴ K'ari' ri Moisés xqaqa k'a pe pa ruwi' ri juyu' y kan xuben chike ri winaqi' chi tikijacha-ki' chire ri Dios y tikich'aja' ri kitziaq.

¹⁵ K'ari' rija' xubij chike: Kan tichojmirisala' k'a apo iwi' richin ri pa rox apo q'ij. Man kixk'oje' kik'in ri iwixjayilal, xcha'.

¹⁶ Y xk'uluwachitej k'a chi toq xapon ri rox q'ij nimaq'a' yan, xpe k'a koqolajay y koyopa' y xqaqa k'a jun pimilej-sutz' pa ruwi' ri juyu'. Y xebeq'ajan k'a pe rik'in janila uchuq'a' ri xupubel ri e banon rik'in uk'a'. Y ri winaqi' ri ek'o pa taq kachoch ri banon rik'in tzieq kan janila k'a xkik'en rukiy.

¹⁷ Y ri Moisés xeberoyoj k'a pe konojel ri ruwinaq ri ek'o chiri', ri akuchi ek'o-wi-qa, richin chi nibekik'ulu' ri Dios. Y rije' xebepa'e-apo chuxe' ri juyu'.

¹⁸ Kan chijun k'a ri juyu' Sinaí nibuqun pa sib, roma ri Jehová xqaqa-pe pa ruwi' ri juyu' ri' rik'in q'aq'. Y ri sib ri' kan achi'el k'a ri rusibil jun horno nuben, y chijun ri juyu' nisilon janila.

¹⁹ Ri xupubel, ronojel mul kan más k'a niq'ajan-pe. Ri Moisés nich'on k'a rik'in ri Dios y ri Dios kan nuk'uluba' k'a ri ruch'abel, rik'in achi'el ruch'abel koqolajay.

²⁰ Ri Jehová xqaqa k'a pe pa rutum ri juyu' Sinaí, y k'a chiri' xroyoj-wi-pe ri Moisés, y ri Moisés xjote-q'anej k'a rik'in.

²¹ Y xubij chire ri Moisés: Kaqaqa-el y tabebij chike ri winaqi' chi man keq'ax-pe ri akuchi k'o-wi ri retal ri ruchi' ri juyu', richin chi nikajo' yinkitz'et yin. Roma wi xa man xtikinimaj ta tzij, kan xkeken k'a janila chi winaqi'.

²² Chuqa' ri sacerdote kan tikijacha-ki' pa nusamaj yin y wi man xtikiben ta, kan xkenk'is k'a, xcha' ri Jehová.

²³ Ri Moisés xubij chik k'a chire ri Jehová: Ri winaqi' kan man xketikir ta k'a xkejote-pe pa ruwi' re juyu' re', roma kan atk'o rat wawe' y chuqa' xabij chi tinya' k'ulba't richin man yeq'ax ta pe, xcha' ri Moisés.

²⁴ Y ri Jehová xubij: Kaqaqa-el y tabek'ama-qa ri Aarón y k'ari' junan yixjote-pe, jak'a ri e sacerdote y ri winaqi' man k'a keq'ax-pe ri akuchi k'o-wi ri k'ulba't richin chi yepe wik'in yin, richin chi man kenk'is, xcha' ri Dios.

²⁵ Y ri Moisés xqaqa k'a pe akuchi ek'o-wi kan ri winaqi' y xuq'alajirisaj chikiwech ronojel re'.