Ex 18 - Kaqchiquel Bible

Ri Moisés nibeq'ejelox kan roma ri rujinan

¹ Ri Jetro ri rujinan ri Moisés, ri sacerdote richin ri Madián xapon k'a rutzijol rik'in ronojel ri rubanon ri Dios rik'in ri Moisés, y kik'in konojel ri israelita y achike rubanik toq xerelesaj-pe pan Egipto.

² K'o yan chik q'ij ri Moisés e rutaqon-el ri Séfora, ri rixjayil chirachoch ri rujinan. Y ri Jetro kan e ruk'amon k'a qa ri Séfora,

³ e rachibilan ri e ka'i' rumam. Jun rubini'an Guersón, roma ri Moisés xuch'ob k'a: Yin xa in q'axel chupan re jun ruwach'ulew re'.

⁴ Y ri rubi' ri jun chik ja ri Eliézer, roma ri Moisés xuch'ob k'a: Ri ru-Dios ri nata' xiruto' y xirukol chuwech ri ru-espada ri rey, xcha'.

⁵ Ri Jetro rachibilan-el ri Séfora ri rumi'al y ri e ka'i' rumam, xe'apon pa tz'iran ruwach'ulew akuchi ek'o-wi-qa ri Moisés, chunaqaj ri juyu' ri akuchi k'o-wi ri Dios.

⁶ Y jari' toq ri Jetro xuteq rubixik chire ri Moisés y xubij: Yin ri in ajinan, xinoqaqa k'a re wawe' chi aq'ejeloxik, nuk'amon-pe ri numi'al, ri awixjayil rat y ri e ka'i' taq ak'ajol, xcha'.

⁷ Y ri Moisés xbe k'a richin xberuk'ulu' ri rujinan, y toq xapon rik'in, xuqasaj-ri' chuwech pan ulew y xutz'ubaj. K'ari' xkik'utula' k'a rutzil kiwech y xe'ok-apo pa rachoch ri Moisés, ri banon rik'in tzieq.

⁸ Y jari' toq ri Moisés xuchop rutzijoxik chire ri rujinan ronojel ri xuben ri Jehová rik'in ri rey y kik'in ri winaqi' aj-Egipto, roma ri rajowabal pa kiwi' ri israelita. Chuqa' xutzijoj chire ronojel ri ruk'ayewal ri xkil pa bey y ri rubanik ri xuben ri Jehová richin xerukol.

⁹ Ri Jetro toq xrak'axaj ronojel re', kan janila k'a xkikot, roma ronojel ri utzil ri rubanon ri Jehová kik'in ri israelita, toq xerelesaj-pe pa kiq'a' ri aj-Egipto.

¹⁰ Y ri Jetro xubij chuqa': Tiqanimirisaj k'a ruq'ij ri Jehová, ri xelesan-pe iwichin pa kiq'a' ri aj-Egipto y pa ruq'a' ri rey. Xaxe k'a rija' ri xtikir xkolon-pe kichin ri winaqi' ri chiri' pan Egipto.

¹¹ Wakami jebel k'a xq'alajin chinuwech chi ja ri Jehová jari' ri más nim chikiwech ri ch'aqa' chik dios, roma xuya' rutojbalil pa kiwi' ri winaqi' ri nim xkina-ki', roma xekiya' pa tijoj-poqonal ri israelita, xcha'.

¹² Y k'ari' ri Jetro xusuj jun poron kamelabel y ch'aqa' chik kiwech kamelabel chire ri Jehová. Y ri Aarón y konojel ri rijita'q taq achi'a' ri kan k'o kiq'ij chikikojol ri israelita, xe'apon richin xbekitija' kiway rik'in ri Jetro, ri chiri' chuwech ri Jehová.

Ri Moisés xerukanoj to'onela'

¹³ Y chupan k'a ri ruka'n q'ij chi tapon ri Jetro, ri Moisés xtz'uye' k'a richin xuchop nuq'et-tzij pa kiwi' ri winaqi' y rije' kan xkimol k'a apo ki' chirij kan xaxe toq xseqer-pe y xetane' k'a toq xqaqa na qa ri q'ij.

¹⁴ Y toq ri rujinan xutz'et chi ruyon ri Moisés nuq'et-tzij pa kiwi' ri ruwinaq, jari' toq xubij chire: ¿Achike k'a re naben rat kik'in ri awinaq? ¿Achike k'a roma ayon ok yaq'aton-tzij pa kiwi' rije'? Roma kan ek'o-pe chawech kan xaxe toq xseqer-pe k'a toq xqaq'ij na qa, xcha'.

¹⁵ Y ri Moisés xubij chire ri rujinan: Kere' ninben, roma ri winaqi' yepe wik'in roma nikajo' niketamaj ri achike k'a ri rurayibel ri Dios, richin chi jari' ri nikiben rije'.

¹⁶ Rije' yepe wik'in, toq k'o oyowal chikikojol y yin ninq'et-tzij pa kiwi'. Y jari' toq ninq'alajirisaj-el ri pixa' chikiwech y ronojel ri nrajo' ri Jehová, chi nikiben, xcha' ri Moisés.

¹⁷ Y jari' toq ri rujinan xubij chire: La yatajin chubanik man utz ta.

¹⁸ Roma rat y ri awinaq xkixbekos, roma ri samaj kan janila ralal chawe rat. Ayon xa man xkatikir ta xtaben.

¹⁹ Wakami kinawak'axaj k'a y xtinya' ri ruchojmilal chawech y wetaman chi ri Dios kan xkaruto-wi rik'in re'. Ja rat k'a ri katok q'axey kitzij ri e awinaq chuwech ri Dios, y ja rat ri xkaq'axan-q'anej chire rija', ronojel ri kich'ojinik.

²⁰ Kan tak'utu' k'a chikiwech ronojel ri pixa' y ri ch'aqa' chik ruchojmilal, richin chi tikik'uaj jun utzilej bey y utzilej banobel.

²¹ Chuqa' rat ke'acha' chikikojol ri winaqi' richin ri tinamit, achi'a' ri kan k'o samaj ri yetikir nikiben, achi'a' ri kan k'o rukiy ri Dios chikiwech, achi'a' ri kan nakuquba' ak'u'x kik'in y kan niketzelaj richin yepuaqix. Y jeri' ri ke'aya' richin ye'ok aj-raqen pa kiwi' tzobaj richin 1,000 winaqi', pa kiwi' e wok'al, pa kiwi' e kawineq lajuj y pa kiwi' lajujteq winaqi'.

²² Y rat taya' k'a q'ij chi ja ri achi'a' ri' ri keq'aton-tzij pa kiwi' ri ch'ojinik ri nikiben ri winaqi' ronojel q'ij. Je rije' k'a ri xkechojmirisan ri kokoj taq ch'ojinik y xaxe ri nima'q taq ch'ojinik xtikik'en-pe chawe rat. Keri' rat xtawelesaj k'iy ralal ri samaj chawij, roma rije' kan xkatkito' chuk'utuxik.

²³ Wi rat kere' xtaben y jare' ri niqa' chuwech ri Dios, rat kan xkatikir k'a xtaben chi utzil ri samaj y ri winaqi' kan rik'in k'a uxlanibel-k'u'x xketzolin pa taq kachoch, xcha' ri Jetro.

²⁴ Y ri Moisés kan xunimaj k'a rutzij ri rujinan y xuben ronojel ri xubij chire.

²⁵ Ri Moisés xerucha' k'a chikikojol ri israelita, achi'a' ri kan k'o samaj ri yetikir nikiben y xeruya' k'a richin xe'ok aj-raqen pa kiwi' 1,000 winaqi', pa kiwi' e wok'al, pa kiwi' e kawineq lajuj y pa kiwi' lajujteq winaqi'.

²⁶ Rije' kan xeq'aton k'a tzij pa kiwi' ri ch'ojinik ri nikiben ri winaqi' ronojel q'ij. Rije' k'a xechojmirisan ri kokoj taq ch'ojinik, y ri nima'q taq ch'ojinik xekik'en-pe chire ri Moisés.

²⁷ Y toq ri Jetro k'o k'a chi nitzolin-el, ri Moisés xbe richin chi xberujacha' kan, k'a nej juba' chire ri rubey. Rija' xujech k'a el ri rujinan y xbe pa ruruwach'ulew.