Ex 16 - Kaqchiquel Bible

Ri Jehová nuya' kiway ri israelita

¹ Chirij re', konojel ri israelita xe'el-el chiri' pan Elim, y xe'apon pa tz'iran ruwach'ulew Sin ri k'o chukojol ri Elim y ri juyu' Sinaí. Y toq xe'apon chiri' pa Sin, jari' toq xtz'aqet jun ik' rik'in nik'aj chi ke'el-pe pan Egipto.

² Chiri' pa tz'iran ruwach'ulew ri winaqi' israelita xa yexebexot k'a chirij ri Moisés y chirij ri Aarón,

³ y nikibila' k'a chike: K'ate' ta xojrukamisaj kan ri Jehová pan Egipto, roma noqaqa chiqak'u'x toq oj tz'uyul richin yojwa' qasurin rij ri bojo'y ri k'o ti'ij chupan y kan jebel k'a yojwa'. Y jak'a re wakami xa xojak'en-pe wawe' pa tz'iran ruwach'ulew xaxe richin chi qonojel yojken roma wayjal, xecha'.

⁴ Jari' toq ri Jehová xubij chire ri Moisés: Yin kan xtinben k'a chi xtiqaqa-pe aj-chikajil-wey. Kan xtiqaqa-pe achi'el nuben ri job y ri winaqi' kan xtikimol k'a ri janipe' nikitej jun q'ij. Yin ninwajo' yentejtobej rik'in re', q'alaj ri' wi nikiben ri ninbij chike.

⁵ Jak'a chupan ri ruwaq q'ij kan tikibana' kan rutzil ri xtikitej roma chupan ri q'ij ri' kan k'o chi nibekik'ama' kan ri xtikitej chupan ri ka'i' q'ij, xcha' chire ri Moisés.

⁶ K'ari' ri Moisés y ri Aarón xkibij chike ri kiwinaq: Re xtiqaq'ij-qa re wakami, rix xtitz'et chik chi ja ri Jehová, ri xojelesan-pe pan Egipto.

⁷ Y toq xtiseqer chua'q, rix xtitz'et ri ruk'ojlen ri Jehová, roma rija' kan xixrak'axaj-pe toq xixxebexot chirij. Roj xa choj oj rusamajel rija' y chiqij roj xixxebexot-wi-pe.

⁸ Re tiqaq'ij re' ri Jehová xtuya' ti'ij chiwe richin nitej, y ri nimaq'a' xtuya' ri aj-chikajil-wey chiwe richin xtinoj jebel ipan. Ri Jehová xrak'axaj ri ch'abel ri xe'ibila' chirij, roma xa kan chirij rija' xixxebexot-wi. Xa man chiqe ta roj ri xiben-wi keri', xa kan chire ri Jehová, xcha' chike.

⁹ Y ri Moisés xubij chire ri Aarón chi tubij chike ri kiwinaq chi kepe konojel chuwech ri Jehová, roma rija' xrak'axaj ronojel ri nikixebela' chirij.

¹⁰ Y ri Aarón kan xubij k'a chike ri kiwinaq chi kepe konojel, y ketzu'un k'a apo akuchi k'o-wi ri tz'iran ruwach'ulew y jari' toq ri ruk'ojlen ri Jehová xbek'ulun-pe chupan ri sutz' ri'.

¹¹ Y ri Jehová chiri' xbech'on-pe chire ri Moisés y xubij k'a:

¹² Yin xinwak'axaj k'a ronojel ri xkixebexa' ri awinaq. Wakami k'a xtabij chike chi toq xtiqaq'ij-qa, rije' xtikitej ti'ij y toq xtiseqer xtikitej aj-chikajil-wey y man jun ri xtinum ta. Y rik'in ri' xtikitz'et k'a chi ja yin Jehová ri i-Dios, xcha'.

¹³ Y toq xqaq'ij k'a qa, kan janila k'a chi saqkorowach ri xe'apon y xkinojisaj rij ri akuchi ek'o-wi-qa ri winaqi'. Chuqa' toq xseqer-pe, kan pim-pim k'a raxq'ab ri k'o chiri'.

¹⁴ Y toq xk'is-qa ri raxq'ab ri', jari' toq ri winaqi' xkitz'et chi pa ruwi' ri ulew ri richin ri tz'iran ruwach'ulew, achi'el tew ri k'o y taq k'olok'eq kibanik.

¹⁵ Y toq rije' xkitz'et, xkibila' k'a chikiwech: ¿Achike re'?,*f6* xecha'. Roma rije' kan man jun bey k'a kitz'eton. Y k'ari' ri Moisés xubij chike: Ja ruwech wey re' ri nuchop nuya' ri Jehová chiwe, richin nitej.

¹⁶ Y jare' ri ruchojmilal ri xuya' kan ri Jehová: Chi'ijujunal timolo' k'a ri xtik'atzin chiwe richin nitej. Ox-ox libra iwichin chi'ijujunal y niwajlaj ri ix janipe' pan iwachoch, jari' ri nik'en kan richin q'ij-q'ij, xcha'.

¹⁷ Rije' kan keri' k'a xkiben; ch'aqa' roma e k'iy, xkimol kan k'iy y ri ch'aqa' chik roma xa e juba' ok, man k'iy ta xkimol kan.

¹⁸ Y rije' kan xketaj-wi chi oxi' libra richin jun wineq; ri e k'iy pa jay man xik'o ta ruwi' ri xkik'en kan y ri xa man e k'iy ta kan choj xeruben. Konojel xaxe k'a xkimol ri k'atzinel chike.

¹⁹ Y ri Moisés xubij chike chi man jun ri tiyako kan juba' richin ruka'n q'ij.

²⁰ Man rik'in ri' ek'o chike ri winaqi' ri man xkinimaj ta ri xubij ri Moisés, roma xa kan k'o ri xkiyek kan richin ruka'n q'ij. Y kan chi'anin k'a xjutir y xchuwir. Y ri Moisés kan xpe k'a royowal chike.

²¹ Y kan ronojel k'a nimaq'a' nikimol kan ri kiway ri janipe' nikitej jun q'ij. Y ri man nikimol ta kan, toq nimeq'e-pe ri q'ij xa niya'er k'a qa.

²² Chupan k'a ri ruwaq q'ij xkimol kan ri kiway, richin ka'i' q'ij. Waqteq k'a libra kichin chikijujunal. Y konojel ri e aj-raqen richin ri tinamit, xbekibij chire ri Moisés.

²³ Y ri Moisés xubij k'a chike: Ri Jehová kan rubin chik k'a: Chua'q, jari' ri q'ij richin uxlanen richin ri Jehová. Roma ri' kan ja re wakami tibana' kan ri ikaxlan-way y chuqa' tiroqowisaj kan ri k'o chi nitej chua'q y ronojel ri man nikusaj ta qa, utz chi niyek kan richin chua'q, xcha' ri Moisés.

²⁴ Keri' k'a xkiben ri winaqi': Xkiyek kan ri k'o chi nikitej ri jun chik q'ij, roma kan keri' xubij ri Moisés. Y kan man xchuwir ta ri kiway y man xjutir ta.

²⁵ Ri ruka'n q'ij xubij ri Moisés: Wakami titija' k'a ri iyakon kan richin re q'ij re', roma wakami q'ij richin uxlanen richin ri Jehová. Roma xa ta yixel chumolik ri wey re q'ij re', ni ta ti juba' xtiwil pa ruwi' re ulew.

²⁶ Xaxe k'a waqi' q'ij ri yixtikir k'a nimol kan iway; jak'a chupan ri ruwuq q'ij, jun q'ij richin uxlanen. Chupan k'a ri q'ij ri' kan man jun k'a xtiwil, xcha' ri Moisés.

²⁷ Man rik'in ri' k'a ek'o na jujun winaqi' ri richin ri tinamit, ri xebe chumolik kiway chupan ri ruwuq q'ij y kan man jun wi xkil-pe.

²⁸ Y jari' toq ri Jehová xubij chire ri Moisés: ¿K'a janipe' k'a yixtane' richin man nitaqej ta ri ruchojmilal y ri pixa' ri nuya'on chiwe?

²⁹ Toqaqa k'a chi'ik'u'x chi yin Jehová xinya' chiwe ri q'ij richin uxlanen, y roma ri' pa ruwaq q'ij ninya' ri iway richin ka'i' q'ij. Xa roma ri' kan kixk'oje' k'a ri akuchi ixk'o-wi y kan man jun tibe juk'an chik chupan ri ruwuq q'ij, xcha' ri Jehová.

³⁰ Y keri' ri winaqi' xe'uxlan k'a chupan ri jun ruwuq q'ij ri'.

³¹ Y ri winaqi' israelita xkibij k'a maná chire ri aj-chikajil-wey, y re' kan achi'el k'a rubanik ri ruwech culantro taq seq-seq y kan achi'el k'a ruki'il ri taq wotz'otz' ri ya'on kab kichin ri taq chikopi' rik'in.

³² Y ri Moisés xubij k'a: Tiwak'axaj k'a ri ruchojmilal ri rubin ri Jehová, chi tiqak'ama' kan oxi' libra aj-chikajil-wey y tiqayaka-apo, chike ri qijatzul ri e peteneq chiqawech-apo, richin chi rije' kan tikitzu' k'a ri wey ri xuya' ri Jehová chiqe, chiri' pa tz'iran ruwach'ulew, toq xojrelesaj-pe pan Egipto, xcha'.

³³ Y roma ri' toq ri Moisés xubij k'a chire ri Aarón: Tayaka' kan oxi' libra aj-chikajil-wey chupan jun xára y tik'oje' kan chuwech ri Jehová, richin chi niyake-apo chike ri qijatzul ri e peteneq.

³⁴ Y ri Aarón kan keri' wi xuben. Ri xára ri k'o ri aj-chikajil-wey chupan, xberuya' kan chuwech-apo ri káxa ri richin ri tununri'il, richin chi tiyake' kan chiri', achi'el xubij ri Jehová chire ri Moisés.

³⁵ Y keri' ri israelita, ja ri aj-chikajil-wey ri xkitej chi kawineq juna'. Rije' xkiya' kan rutijik ri wey ri' ja toq xe'apon pa k'ulba't richin ri ruwach'ulew Canaán.

³⁶ Ri aj-chikajil-wey ri xkiyek kan, nipajon k'a oxi' libra.