Ex 15 - Kaqchiquel Bible

Ri israelita yebixan roma kikoten

¹ K'ari' ri Moisés y konojel ri ruwinaq xkibixaj ri rubi' ri Jehová y kere' k'a nubij ri bix ri xkibixaj: Xtiqabixaj k'a rubi' ri Jehová, roma rija' kan xq'alajin chi k'o ruq'ij-ruk'ojlen. Xuben chike ri kiej y ri e ch'okolibeyon kichin chi xemuqutej kan chupan ri palou.

² Rat k'a Jehová ri quchuq'a' y ri qabix. Ja rat ri qakolonel. Rat ri qa-Dios ri k'o chi niqaya' aq'ij. Ri at ki-Dios ri qate-qatata' y roj niqanimirisaj ri abi'.

³ Rat Jehová at nimalej aj-labal; Ja rat ri Jehová abi'.

⁴ Rat xaben chi ri carruaje y ri aj-labal xebe chuxe' ya', rat xaben chi ri aj-raqen xejiq' chupan ri Kaqa-Palou.

⁵ Ri palou ri' xerumuq k'a; xebek'oje' kan chuxe', achi'el ri abej.

⁶ Ri awijkiq'a' rat Jehová Dios, nim rik'in uchuq'a'; ri awijkiq'a' rat Jehová Dios, xeruwulaj ri e etzelanel awichin.

⁷ Rik'in ri awuchuq'a', rat nimalej Jehová Dios, xe'aqasaj ri xkipaba-ki' chawech. Rat xateq k'a pe ri aq'aq'arinen pa kiwi', y rik'in ri' xe'ak'is achi'el nuben ri q'aq' rik'in ri q'ayis.

⁸ Xa rik'in ok ri kaq'iq' ri nel pan atza'n, xumol-ri' ri ya'. Ri ya' ri janila nisilon, xuben achi'el tz'aq ri pa taq ruxikin ri ruxe-qa ri ya' kan chi'anin k'a xkowir.

⁹ Ri e etzelanel qichin, xkich'ob: Qojyakatej-el y kebeqaq'i', xecha'. Xkich'ob chi xtikich'er chikiwech ri xtikimej chiqe; xkich'ob chi nikelesaj koyowal chiqij. Xkich'ob nikelesaj ri ki-espada y yojkik'is.

¹⁰ Jak'a rat Jehová Dios xateq-pe ri nimalej kaq'iq'; y ri palou xerumuq kan rije'. Y choj xebe chuxe' ya' achi'el nuben ri chajipueq; choj xebe chuxe' ri ya', ri kan xbusku'l-qa chikij.

¹¹ ¿Achike ta k'a jun chik dios ri k'o, achi'el rat Jehová? ¿Achike ta k'a jun chik, ri kan nimalej Dios y kan Loq'olej? Ri yatikir naben rat, kan meyel y xaxe rat ri yabanon richin.

¹² Rat kan xaxe k'a xayuq ri awijkiq'a'; ri ruwach'ulew kan jari' xjaqatej y xerubeq' ri winaqi'.

¹³ Rat xayuqej rik'in joyowanik ri atinamit ri xakol; kan rik'in k'a ri awuchuq'a' xak'uaj k'a akuchi atk'o-wi rat.

¹⁴ Re' kan xtikak'axaj k'a ri winaqi' y kan xkebaybot. Kan man xtikil ta k'a achike xtikiben ri winaqi' aj-Filistea.

¹⁵ Ri e aj-raqen ri chiri' pan Edom xkelawalo' roma xibinri'il, ri man jun bey nikixibij-ki' chiri' pa Moab, k'ari' xtikixibij-ki'. Y ri aj pa Canaán kan xtikik'en rukiy.

¹⁶ Xtiqaqa nimalej xibinri'il pa kiwi', roma ri ruchuq'a' ri aq'a', Roma ri' xkememur, achi'el jun abej, ri man jun nitikir nubij. k'a toq q'axineq chik na ri atinamit rat Jehová. K'a toq q'axineq chik na re tinamit re xakol-pe.

¹⁷ Rat xke'ak'uaj y xke'atik pa ruwi' ri juyu', ri xtaya' chike. Ri chiri', ri akuchi atk'o-wi rat Jehová Dios. Ri akuchi abanon rat Jehová, chi chiri' nak'ul-wi aq'ij.

¹⁸ Xaxe rat Jehová ri atk'o pa ruwi' ronojel, keri' re wakami y richin tibe-q'ij tibe-seq.

Ri rubix ri María

¹⁹ Jari' toq ri rey aj-Egipto, ri ruwinaq, ri rukiej y ri ru-carruaje xe'ok chupan ri Kaqa-Palou. Y ri Jehová kan xerumuq kan chupan ri ya' ri' y jak'a ri israelita xeq'ax pa chaqi'j pa runik'ajal ri ya'.

²⁰ Y jak'a ri María, ri q'alajirisey ruch'abel ri Dios, ri rana' ri Aarón, xuchop jun q'ojom rubini'an pandero, richin xubixaj rubi' ri Dios. Y konojel k'a ri ixoqi' xkitzeqelibej-el y rije' kik'ualon chuqa' ki-pandero y yetzopiyaj ri yebixan.

²¹ Y ri María kere' k'a ri xubixaj: Qojbixan chire ri Jehová qonojel, roma jun jebelej ch'akoj ri xuben. Rija' xuben chike ri kiej y ri e ch'okolibeyon kichin, chi xemuqutej kan chupan ri ya'.

Toq ri israelita xe'apon akuchi k'o-wi ri k'ey ya'

²² Chirij re' ri Moisés xuben k'a chi xkichop chik el bey, y xe'el-el chuchi' ri Kaqa-Palou y xebe chupan ri bey ri nibe pa tz'iran ruwach'ulew rubini'an Sur. Xebiyin k'a oxi' q'ij chupan ri tz'iran ruwach'ulew ri' y chiri' kan man jun ya' nilitej.

²³ Y toq xe'apon k'a akuchi k'o-wi ya', kan man xetikir ta xkiqum, roma ri ya' ri' xa k'ey-k'ey; roma ri' xkibij Mará*f5* chire ri chiri'.

²⁴ Y ri winaqi' xkichop yexebexot chirij ri Moisés y nikibila' k'a: ¿Achike k'a xtiqaqum wakami?, yecha'.

²⁵ Y jari' toq ri Moisés xuk'utuj to'onik chire ri Jehová y ri Jehová xuk'ut k'a jun che' chuwech, richin chi jari' tuya' chupan ri ya'. Y ri ya' kan chi'anin k'a xutzir. Ri Jehová kan xerutejtobej k'a y chuqa' xuya' jujun chik ruchojmilal chike.

²⁶ Y xubij: Wi kan qitzij xtiwak'axaj ri nuch'abel yin Jehová ri i-Dios, y kan xkixbiyin choj chinuwech, y kan xtiben ronojel ri nubij ri pixa' y kan xtiyek pan iwánima, kan man jun k'a yabil xtinteq-pe pan iwi' achi'el ri xinteq pa kiwi' ri aj-Egipto, roma ja yin Jehová ri in aq'omanel iwichin, xcha' ri Jehová.

²⁷ Y xe'el k'a el ri chiri' y xe'apon akuchi e tikil-wi oxk'al lajuj palma, y roma ri' rubini'an Elim. Y chiri' ek'o chuqa' kablajuj ralaxbel-ya' y chiri' chikinaqaj ri ya' xek'oje-wi-qa.