Ex 14 - Kaqchiquel Bible

Ri israelita nikik'owisaj ri Kaqa-Palou

¹ Y ri Jehová xch'on chik jun bey rik'in ri Moisés y xubij chire:

² Tabij chike ri awinaq chi ketzolej juba' chikij, y kek'oje-qa chunaqaj ri tinamit Pi-hahirot, ri tinamit ri k'o chukojol ri tinamit Migdol y ri nimalej Kaqa-Palou. Ri akuchi xkek'oje-wi-qa kan chunaqaj-apo ri ya', chuwech-apo ri tinamit Baal-sefón.

³ Y ri rey richin ri Egipto xtuch'ob-qa chi ix sachineq pa tz'iran ruwach'ulew y man niwil ta el ri ibey.

⁴ Y yin kan xtinkowirisaj k'a ri ránima rija' richin chi kan xtiyakatej-pe chiwij, jak'a yin xtink'ut ri nuq'ij-nuk'ojlen chuwech y chikiwech konojel ri aj-labal. Xtiketamaj k'a konojel ri aj-Egipto chi ja yin ri' ri in Jehová, xcha' ri Jehová chire ri Moisés. Y rije' kan xetzolin juba' chikij.

⁵ Y toq xya'ox k'a rutzijol chire ri rey chi ri winaqi' israelita xe'animej-el. Jari' ri rey y ri e aj-raqen xkitzolij-ki' chikij richin xkiya-el q'ij chike richin xe'el-el, y kan xkibij-qa: ¡Achike roma xqaya-el q'ij chike richin xe'el-el, wakami xa xebe ri qasamajela' chiqawech!, xecha-qa.

⁶ Y roma ri' ri rey xuchojmirisaj-el ri ru-carruaje ri nuk'uaj pa taq labal, y chuqa' xeruk'uaj-el ri aj-labal ri kan yebe-wi rik'in.

⁷ Xeruk'uaj k'a el e 600 carruaje ri janila e anineq, chikij re' xebe ri ch'aqa' chik carruaje, ri man kan ta e anineq ri ek'o chiri' pan Egipto, y chupan re carruaje re' e beneq-wi ri e aj-raqen pa kiwi' konojel.

⁸ Y ri Jehová kan xukowirisaj k'a ri ránima ri rey richin Egipto y xyakatej-el chikij richin chi yerutzolij ta pe ri israelita, jak'a rije' man jun xibinri'il chikiwech ri e beneq, roma ri Jehová kan beneq-wi kik'in.

⁹ Jak'a ri aj-Egipto e yakatajineq-el chikij ri winaqi' israelita, e kik'ualon-el ki-carruaje, ri kikiej y konojel ri aj-labal y xebekiq'i' ri israelita toq ek'o-qa chuchi' ri Kaqa-Palou, chunaqaj ri tinamit Pi-hahirot, chuwech-apo ri tinamit Baal-sefón.

¹⁰ Y toq ninaqajub yan apo ri rey e rachibilan ri e aj-labal ri e beneq rik'in, ri israelita xekitz'et k'a y jari' toq xkinabej chi e tzeqeliben-el. Y rije' xpe k'a jun nimalej xibinri'il chike y xkik'utuj kuchuq'a' chire ri Jehová.

¹¹ Y chuqa' xkibij k'a chire ri Moisés: ¿Kan maneq kami ri akuchi ta xojmuq-wi pan Egipto, richin chi xojawelesaj na pe richin chi xa wawe' pa tz'iran ruwach'ulew yojken-wi kan? ¿Achike roma kere' xaben chiqe, chi xojawelesaj-pe pan Egipto?

¹² ¿Peja chi xqabij chawe chila' pan Egipto, chi qojaya' kan qayon, chi roj niqaben na ri kisamaj ri aj-Egipto? Xa más ta utz chi xeqasamajij ta na ri aj-Egipto ke chuwech chi k'a wawe' pa tz'iran ruwach'ulew yojken wi kan, xecha'.

¹³ Y ri Moisés xubij chike: Man tixibij-iwi'. Rix kow kixk'oje', y titz'eta' ri kolotajik ri xtuben ri Jehová qik'in re wakami, roma la aj-Egipto la yeqatz'et wakami kan man jun bey chik k'a xkeqatz'et.

¹⁴ Jak'a ri Jehová xtibanon oyowal pa qak'exel roj y roj kan man jun ri k'o chi niqaben, xcha' ri Moisés.

¹⁵ Y ri Jehová xubij k'a chire ri Moisés: ¿Achike roma nak'utuj to'onik chuwe? Tabij chike ri awinaq chi tikichapa' bey.

¹⁶ Y rat tayaka' la ach'ame'y y tayuqu-apo pa ruwi' la ya'. Y tajaqa' jun ibey richin keri' kan pa chaqi'j k'a xkixq'ax-wi.

¹⁷ Jak'a yin kan xtinkowirisaj más ri kánima ri aj-Egipto, richin chi kan xkixkitzeqelibej-apo. Y jari' toq yin kan xtink'ut k'a ri wuchuq'a' chuwech ri rey, chikiwech ri aj-labal, chikiwech ri e beneq pa carruaje y chikiwech ri e beneq chirij kiej.

¹⁸ Y rije' xtiketamaj chi ja yin Jehová, toq xtink'ut ri nimalej wuchuq'a' chuwech ri rey, chikiwech ri e beneq pa carruaje y chikiwech ri e beneq chirij kiej, xcha' rija'.

¹⁹ Y xbanatej k'a chi ri ángel richin ri Dios ri kan beneq-wi chikiwech, xq'ax k'a kan chikij rije'. Y kan ja chuqa' ri' toq ri sutz' pa'el chikaj ri beneq chikiwech, xq'ax kan chuqa' chikij y chiri' xbepa'e-wi.

²⁰ Y keri' ri sutz' ri', xk'oje' k'a chukojol ri akuchi ek'o-wi-qa ri aj-Egipto y ri akuchi ek'o-wi-qa ri israelita. Ri sutz' ri', jun q'equ'm k'a chike ri aj-Egipto, jak'a chike ri israelita kan jun saqil. Y chupan ri jun aq'a' ri', kan man jun ri xq'ax ta apo y man jun chuqa' ri xq'ax ta pe, roma ri sutz'.

²¹ Y ri Moisés xuyek ri ruq'a' y xuyuq-apo ri ruch'ame'y pa ruwi' ri Kaqa-Palou. Y chupan k'a ri junaq'a' ri', ri Jehová xuben chi xpe jun nimalej kaq'iq' ri pa relebel-q'ij y re' xuben chi ri ya' xch'aratej y xchaqi'j-qa ri ruxe'.

²² Jari' toq ri israelita kan pa chaqi'j xeq'ax-wi, chukojol ri ya', roma ri ya' xuch'er-ri' y kan xuben achi'el tz'aq pa kijkiq'a' y pa kajxokon.

²³ Toq keri' xkitz'et ri aj-Egipto, xe'ok-apo chuqa' chikij, chukojol ri ya'. Xe'ok-apo konojel ri aj-labal, ri achi'a' ri yech'oke' chirij kiej y ri carruaje ri e kik'ualon.

²⁴ Y xk'uluwachitej k'a, chi toq k'a jukumaj na chire ri q'ij ri', ri Jehová xerutzu-pe ri aj-labal richin Egipto y xuben chike chi xsach kik'u'x. Ri Jehová kan chupan k'a ri sutz' y ri q'aq' ri' beneq-wi.

²⁵ Y rija' kan xuben k'a chi xeqitz'iqo' ri ki-rueda ri carruaje y roma ri' man xetikir ta chik xebe anineq. Y jari' toq ri aj-Egipto xkibij: Más utz qojanimej chikiwech ri israelita, roma kan ja ri Jehová ri nibanon oyowal chiqij roj, pa kik'exel rije', xecha'.

²⁶ Jari' toq ri Jehová xubij chire ri Moisés: Tayaka' ri aq'a' pa ruwi' ri Kaqa-Palou, richin chi ri ya' ri' kerumuqu' la aj-Egipto, la achi'a' e ch'okol chirij kiej y la ki-carruaje chuqa', xcha'.

²⁷ Y jari' toq ri Moisés xuyek k'a ri ruq'a' pa ruwi' ri ya' ri' y kan jari' toq ri ya' rik'in ruchuq'a' xtzolej pa ruk'ojelibal chupan ri jun nimaq'a' ri'. Y ri aj-Egipto nikikanoj k'a achike rubanik nikiben richin ye'animej, jak'a ri ya' man xuya' ta chik q'ij chike; keri' xuben ri Jehová kik'in ri aj-Egipto pa runik'ajal ri Kaqa-Palou.

²⁸ Toq ri ya' ri' xutz'apej-ri', kan xqaqa-wi pa kiwi' ri carruaje, ri kiej y pa kiwi' ri aj-labal ri e richin ri rey ri xe'ok-apo chikij ri israelita chupan ri Kaqa-Palou y kan man jun k'a chike rije' ri xkolotej ta kan.

²⁹ Jak'a ri winaqi' israelita, pa chaqi'j xeq'ax chupan ri Kaqa-Palou y ri ya' kan achi'el k'a tz'aq ri xuben pa kijkiq'a' y pa kajxokon.

³⁰ Ri Jehová xerukol k'a ri israelita chupan ri q'ij ri' pa kiq'a' ri aj-Egipto y ri israelita xekitz'et chi ri kich'akul ri aj-Egipto e punupuxineq chuchi' ri Kaqa-Palou, e kaminaqi' chik.

³¹ Y toq ri winaqi' israelita xkitz'et ri nimalej banobel ri xuben ri Jehová kik'in ri aj-Egipto, rije' xkixibij-ki' chuwech ri Jehová y xkikuquba' k'a kik'u'x rik'in y chuqa' xkikuquba' kik'u'x rik'in ri Moisés, ri rusamajel.