Ex 12 - Kaqchiquel Bible

Toq ri Jehová xuya' ri solbelri'il chike ri israelita

¹ Ri Jehová xch'on k'a kik'in ri Moisés y ri Aarón chiri' pan Egipto y xubij:

² Re ik' re' kan xtok ri nabey ik' chire ri juna' ri kan iwichin rix.

³ Chuqa' tabij re jun ruchojmilal re' chike konojel ri iwinaq israelita: Chupan ri q'ij lajuj chire re ik' re', chikijujunal chike ri achi'a' tikicha' chikikojol ri kawej jun ti alaj achij karne'l richin junan nikitej kik'in ri aj pa kachoch.

⁴ Y wi xa man e k'iy ta ri ek'o chupan jun jay y roma ri' man yetikir ta nikik'is kiyon chijun ri ti chikop, kekoyoj ri kachk'uljay ri ek'o naqaj chike rije' richin chi junan yewa'. Tikajlaj k'a e janipe' rije' y tikich'ara' chikiwech y tikiya' chike chikijujunal ri janipe' ti'ij ri yetikir nikitej.

⁵ Ri ti chikop ri' k'o chi jun rujuna', achij y kan tz'aqet ri rubanik; xabachike k'a ri utz nikusaj, wi jun ti karne'l o jun ti tzuntzun.

⁶ Rix kan ke'iwilij k'a apo ri taq chikopi' ri', richin ri q'ij kajlajuj, richin re ik' re'. Toq niqaqa yan qa ri q'ij, jari' toq chi'iwonojel rix xke'ikamisaj ri taq chikopi' ri e icha'on.

⁷ Y chire ri kikik'el ri taq chikopi' ri', xtik'ul kan juba' y jari' ri xtiyala' pa taq ruxikin y pa ruwi' ri ruchi-jay ri akuchi xtitej-wi ri kich'akul ri taq chikopi' ri'.

⁸ Chupan ri aq'a' ri' xtitej sa'on ti'ij. Xtitej chuqa' kaxlan-wey ri maneq ch'amilej-q'or rik'in y k'ayilej-ichaj.

⁹ Ronojel ri ti'ij k'o chi sa'on y kan man jun rex xtitej, ni man jun roqowineq. Chuqa' nisa' ri rujolon, ri raqen y ri rupan ri chikop.

¹⁰ Y nik'is k'a ronojel y man jun niya' kan richin ruka'n q'ij ri nimaq'a'. Y wi k'o ri man nik'is ta rutijik, kan tiporoj k'a kan jumul pa q'aq'.

¹¹ Kere' k'a ibanik toq xkixwa': Kan jebel tibatz'a' ri ipan, tixima' ri ixajab chi'iwaqen, y ri ich'ame'y tichapa' pan iq'a'. Y kan xtitej k'a anineq ri k'o chi nitej. Jari' ri nimaq'ij richin ninataj ri Solbelri'il.

¹² Y chupan chuqa' ri aq'a' ri' xkiq'ax chupan chijun ri ruwach'ulew richin Egipto y kan xkenkamisaj k'a konojel ri e nabey taq al alaboni' chikikojol ri winaqi'. Y keri' chuqa' chikikojol ri kawej. Y xtinq'et k'a tzij pa kiwi' ri dios richin Egipto. Ja yin Jehová ri yibin.

¹³ Ri kik' jari' ri retal richin ri jay ri akuchi ixk'o-wi rix, y xtintz'et k'a yin ri kik' y choj k'a xkiq'ax-el pan iwi' y kan man xtok ta k'a iwik'in rix ri nima-ruk'ayewal richin kamik, toq yin xkenkamisaj ri nabey taq al alaboni' wawe' pan Egipto.

¹⁴ Y re q'ij re' kan k'o chi xtinimaq'ijuj rix, chuqa' keri' xtikiben ri iwijatzul ri xkepe chi wiq chi tanaj. Kan keri' k'a ri k'o chi niben richin jantape'.

Nimaq'ij richin ri kaxlan-wey ri maneq ch'amilej-q'or rik'in

¹⁵ Wuqu' q'ij k'a xtitej kaxlan-wey ri maneq ch'amilej-q'or rik'in. Roma ri' kan ja yan ri pa nabey k'o chi niwelesaj-el ronojel ch'amilej-q'or ri k'o pan iwachoch. Roma xabachike ri xtitijo kaxlan-wey ri k'o ch'amilej-q'or rik'in chupan ri wuqu' q'ij, kan xtelesex k'a el chi'ikojol.

¹⁶ Chupan k'a ri nabey q'ij y chupan ri ruwuq, kan xtiben k'a jun nimalej molojri'il richin niya' nuq'ij. Y chupan k'a ri ka'i' q'ij ri' kan man jun k'a ri xtisamej, xaxe k'a ri nik'atzin richin nitej ri k'o chi niben.

¹⁷ Kan xtinimaq'ijuj k'a ri q'ij richin ri nimaq'ij richin ri kaxlan-wey ri maneq ch'amilej-q'or rik'in, roma chupan ri q'ij ri' xixinwelesaj-pe pa ruk'ayewal ri chiri' pan Egipto. Y roma ri' kan xtichajij k'a re jun pixa' re'. Chi wiq chi tanaj kan kere' k'a xtiben beneq ruwech.

¹⁸ Chupan k'a re nabey ik' re' xtitej ri kaxlan-wey ri maneq ch'amilej-q'or rik'in, nitikeriba-el ri tiqaq'ij richin ri q'ij kajlajuj chire re ik' re', y yixtane' k'a tiqaq'ij chire ri q'ij juwineq jun.

¹⁹ Wuqu' q'ij k'a man nik'oje' ta ch'amilej-q'or pan iwachoch, roma wi jun iwinaq o jun chike ri man iwinaq ta, ri nutej ta kaxlan-wey ri k'o ch'amilej-q'or rik'in, kan xtelesex k'a el chi'ikojol.

²⁰ Y xabakuchi ta ixk'o-wi, man titej ri k'o ch'amilej-q'or rik'in. Xaxe k'a titija' ri kaxlan-wey ri maneq ch'amilej-q'or rik'in, xcha' ri Dios.

²¹ Y k'ari' ri Moisés xeroyoj konojel achi'a' ri k'o kiq'ij richin ri Israel y xubij k'a chike ri rubin-pe ri Dios chire rija'; chi kebe y tikibij chike ri kiwinaq chi chikijujunal ri jay winaqi' tikicha' chikikojol ri kawej jun alaj achij chikop y tikikamisaj richin nikinimaq'ijuj ri Solbelri'il.

²² Y xubij k'a chuqa': Ri kik' nik'ul pa jun k'ojelibel y k'ari' xtichop jun boraj q'ayis hisopo, y xtimuba' chupan ri kik'. Y rik'in ri' xtichikaj pa taq ruxikin y pa ruwi' ruchi' ri iwachoch. Xkixk'oje' k'a chiri' y kan man jun nel-pe pa jay k'a toq niseqer na.

²³ Toq ri Jehová xtiq'ax richin yerukamisaj ri aj-Egipto, kan xtutz'et k'a ri kik' chuchi' ri iwachoch y ri kamisanel kan choj k'a xtiq'ax-el y man jun xtuben ta kan chiwe.

²⁴ Kan titaqej k'a re jun ruchojmilal re', rix y ri iwijatzul. Kan xtok k'a jun pixa' iwichin rix.

²⁵ Y toq xkixok chupan ri ruwach'ulew ri xtuya' ri Jehová chiqe kan xtiben chuqa' re jun nimaq'ij re'.

²⁶ Rik'in juba' ri iwalk'ual xtikik'utuj chiwe: ¿Achike roma ninimaq'ijuj re q'ij re'?

²⁷ Wi keri', rix kan tibij chike: Re ti chikop re' jare' ri niqakamisaj richin niqaya' ruq'ij ri Jehová, roma rija' xuya' ri solbelri'il chiqe chupan ri aq'a' toq xerukamisaj ri nabey taq ak'uala' kichin ri aj-Egipto; y roj kan xojtotej kan, xcha' ri Moisés. Y jari' toq ri winaqi' xexuke' y xkiqasaj-ki' pan ulew richin xkiya' ruq'ij ri Jehová.

²⁸ Y ri achi'a' ri k'o kiq'ij richin ri Israel, xetzolin y xbekibij chike ri winaqi', ri rubin ri Jehová chike ri Moisés y ri Aarón.

Kikamik ri nabey taq ak'uala' pan Egipto

²⁹ Y pa nik'aj-aq'a' ri Jehová xerukamisaj k'a konojel ri e nabey taq al alaboni' ri aj-Egipto. Xken k'a ri nabey ruk'ajol ri rey, ri niq'aton-tzij. Chuqa' xeken konojel ri nabey taq al alaboni' kichin konojel y chuqa' kichin ri ek'o pa cárcel y ri nabey taq kal ri kawej.

³⁰ Y chupan ri aq'a' ri' xyakatej ri rey, ri aj-raqen y konojel ri winaqi' aj-Egipto. Y kan xak'axatej jun nimalej raqoj-chi'ij chupan chijun ri Egipto, roma xa kan man jun jay ri man ta k'o jun ri kamineq.

³¹ Y ri rey xuteq koyoxik ri Moisés y ri Aarón chupan ri aq'a' ri' y xubij chike: Kixbiyin. Tich'ara-el-iwi' chiqe roj. Rix y konojel ri iwinaq kixbiyin y tibesamajij ri Jehová achi'el ri iwajowan-pe.

³² Ke'ik'uaj chuqa' ri iwawej achi'el ri ibin chuwe y kixbiyin y tibana' utzil kiniwurtisaj chuqa' yin, xcha'.

³³ Y roma ri xk'uluwachitej, ri winaqi' aj-Egipto kan yeparel k'a chikij ri winaqi' israelita chi ke'el-el ri chiri', roma konojel rije' nikich'ob k'a chi xa xkeken chuqa'.

³⁴ Y roma ri keri', konojel winaqi' israelita, ri kimubalon chik ri kik'aj y man jani kiya'on ta ch'amilej-q'or rik'in, xkiyala-el pa taq aq'e'n; xekipisla-el pa taq tzieq y xkiyala-el chuwi' taq kitele'n, richin jari' yebe.

³⁵ Y chuqa' xkiben achi'el ri ruchojmilal ri ruya'on ri Moisés chike, y xkik'utuj-el chike ri aj-Egipto ronojel ri e banon rik'in saqipueq y q'anapueq, y chuqa' jebejoj taq tzieq richin nikikusaj.

³⁶ Y ri Jehová xuben k'a chike ri aj-Egipto chi kan xkiya-el ronojel ri xkik'utuj ri israelita. Keri' kan k'iy k'a ri kibeyomel ri aj-Egipto ri xkimej-el chuwi-kiq'a'.

Ri israelita xe'el-el pan Egipto

³⁷ Ri israelita xe'el-el chupan ri tinamit Ramsés y xe'apon pa tinamit Sucot, y ri kajlabal ri xe'el-el e 600,000 achi'a' ri k'a k'o jebel kuchuq'a'. Y ri ixoqi' y ri ak'uala' man k'a xe'ajlex ta.

³⁸ Xebe chuqa' janila kiwech winaqi' chikij, xekik'uaj ronojel ri kawej, chi wákix, chi karne'l y tzuntzun chuqa'.

³⁹ Y rik'in k'a ri k'ej ri kimuban-pe y man jani kiya'on ta pe ch'amilej-q'or rik'in, toq xe'el-pe ri pan Egipto, rik'in ri' xkiben kikaxlan-way, roma xa chi'anin xe'elesex-pe y man xetikir ta chik xkiben-pe ri k'atzinel richin nikitej.

⁴⁰ Ri e rijatzul kan ri Israel xek'oje' k'a 430 juna' chiri' pan Egipto.

⁴¹ Y kan chupan k'a ri ruk'isibel q'ij richin ri 430 juna' ri', jari' toq ri tzobaj richin ri tinamit Israel, xe'el-el ri chiri'.

⁴² Y ri aq'a' ri' ri Jehová kan xk'oje' k'a kik'in, richin yeruchajij, richin xerelesaj-pe ri israelita pan Egipto. Y roma ri' ri israelita ronojel juna', nikinimaq'ijuj y yek'ase' chi jun aq'a'. Keri' k'a nikiben chi wiq chi tanaj.

Ri ruchojmilal richin natabel toq ri Jehová xuya' ri solbelri'il chike ri israelita

⁴³ Y ri Jehová xubij k'a chike ri Moisés y ri Aarón: Jare' ri chojmilal richin ri nimaq'ij ri'. Man jun wineq ri xa man iwinaq ta ri utz nutej ri ti'ij richin ri chikop ri nisuj chuwe.

⁴⁴ Jak'a ri samajel ri yuqul pa samaj, ri loq'on rik'in méro, ri kan qupin chik richin jun retal,*f4* kan utz nuben ri wa'in ri'.

⁴⁵ Y ri wineq ri xa richin jun ka'i-oxi' q'ij nik'oje-el chi'ikojol o ri wineq ri xa roma samaj k'o qa chi'ikojol, man utz ta nuben ri wa'in ri' iwik'in.

⁴⁶ Kan pa jay k'a xtitej-wi ri ti'ij ri' y kan man jun ti xil ti'ij ri utz ta chi nelesex-pe pa jay y kan man jun k'a chuqa' rubaqil xtiq'ej ta.

⁴⁷ Kan chi'iwonojel k'a rix winaqi' israelita ri k'o chi ninimaq'ijuj ri q'ij ri'.

⁴⁸ Y wi k'o ta jun achin ri xa man iwinaq ta y nrajo' ninimaq'ijun junan iwik'in, kan konojel k'a ri achi'a' ri ek'o pa rachoch k'o chi yequpix richin jun retal, richin utz ninimaq'ijun iwik'in. Y ri wineq ri' kan xtok k'a achi'el xa ta alaxineq chi'ikojol. Roma kan man jun ri xa man qupin ta richin k'o retal, ri nitikir ta ninimaq'ijun junan iwik'in.

⁴⁹ Re ruchojmilal re' kan xtik'atzin chiwe rix y chike chuqa' ri man e iwinaq ta, ri nikajo' yek'ase' chi'ikojol, xcha' ri Jehová chire ri Moisés y chire ri Aarón.

⁵⁰ Keri' xkiben konojel ri winaqi' israelita, achi'el ri xubij ri Jehová chire ri Moisés y chire ri Aarón.

⁵¹ Keri' k'a ri rubanik toq ri Jehová xerelesaj-pe pa ruwach'ulew Egipto; kan konojel k'a ri tzobaj richin ri nimalej tinamit Israel xe'el-pe.