Ex 11 - Kaqchiquel Bible

Toq xeken ri nabey taq al alaboni'

¹ Ri Jehová kan rubin chik chire ri Moisés: K'a k'o na jun chik nima-ruk'ayewal ri ninya' pa ruwi' ri rey y pa kiwi' konojel ri ruwinaq. Chirij k'a re', k'ari' xtuya' q'ij chiwe richin yixel-el, y kan xkixroqotaj-el re wawe'.

² Wakami tabij k'a chike konojel ri awinaq chi chikijujunal tikik'utula-el chike ri winaqi', ri e kachk'uljay, ronojel ri e banon rik'in q'anapueq y saqipueq, xcha'.

³ Ri Jehová kan xuben k'a chike ri winaqi' aj-Egipto chi xsilon kánima chuya'ik ri xk'utux chike. Y chuqa' ri Moisés kan jun nimalej achin chikiwech ri e aj-raqen, ri aj-Egipto y chikiwech chuqa' konojel ri ch'aqa' chik winaqi'.

⁴ Y toq ri Moisés k'a k'o na chiri' rik'in ri rey, xubij chire: Jare' ri nubij ri Jehová: Pa nik'aj-aq'a' xkiq'ax chupan chijun ri Egipto.

⁵ Y pa ronojel jay winaqi' richin Egipto xtiken k'a ri nabey alk'ualaxel, nitiker-pe rik'in ri nabey ak'ajol rat ri rey, ri atk'o pan atz'uyubal richin naq'et-tzij; k'a rik'in ri nabey taq kal ri ixoqi', ri e yuqul pa samaj chubanik ke'en; y ri nabey taq kal ri awej.

⁶ Xubij chuqa' chi kan xtak'axatej jun nimalej raqoj-chi'ij chupan chijun ri Egipto ri kan man jun bey k'a banatajineq keri', ni kan man jun bey chik xtibebanatej.

⁷ Re xtik'uluwachitej pan Egipto kan richin tiketamaj ri winaqi' chi ri Jehová kan k'o rukojol nuben kik'in ri winaqi' israelita y ri aj-Egipto. Roma chupan ri aq'a' ri', chikikojol ri winaqi' israelita, ni jun tz'i' man xtiba'on ta, ni ri ch'aqa' chik chikopi' man jun xtikoq'ej.

⁸ Chuqa' ri Moisés xubij: K'ari' xkepe k'a chinuwech re aj-raqen re', y xkexuke' k'a chinuwech y xtikibij chuwe: Tabana' utzil kabiyin rat y konojel ri awinaq, xkecha' chuwe. Y toq xtikiben keri', k'ari' xqojbe, xcha'. Y ri Moisés kan q'aq'arineq k'a toq xel-pe rik'in ri rey.

⁹ Ri Jehová kan rubin chik k'a chire ri Moisés, ri pa nabey: Ri rey ri richin Egipto kan man xtiniman ta chiwe y roma ri' kan xtiben k'a k'iy ruwech banobel richin retal ri chiri' pan Egipto.

¹⁰ Y ri Moisés y ri Aarón kan xkiben-wi k'iy nima'q taq banobel ri chiri' chuwech ri rey. Jak'a ri Jehová kan xukowirisaj ránima ri rey, richin chi man xuya' ta q'ij richin xe'el-el ri israelita.