Ex 1 - Kaqchiquel Bible

Ri tijoj-poqonal kichin ri israelita pan Egipto

¹ Jere' ri kibi' ri e ruk'ajol kan ri Israel, ri achin ri nibix chuqa' Jacob chire, ri xe'ok-apo pa ruwach'ulew Egipto y chikijujunal rije' chi achijlonel, ixjayilonel y alk'ualaxel:

² Ri Rubén, ri Simeón, ri Leví, ri Judá,

³ ri Isacar, ri Zabulón, ri Benjamín,

⁴ ri Dan, ri Neftalí, ri Gad, y ri Aser.

⁵ Konojel k'a ri e rijatzul kan ri Jacob e oxk'al lajuj chi konojel y ri José kan k'o chik chiri' pan Egipto.

⁶ Toq q'axineq chik janila chi juna', ri José, ri rach'alal y konojel ri winaqi' richin ri sol ri' xa xeken k'a el.

⁷ Y ri e rijatzul kan ri Israel kan xe'alk'ualan-wi, kan janila k'a xek'iyer. Kan janila k'a xewinaqir, kan janila xk'oje' kuchuq'a' y xkinojisaj chijun ri ruwach'ulew Egipto.

⁸ Y chupan k'a ri q'ij ri' xok chik jun k'ak'a' rey, richin niq'aton-tzij pa ruwi' ri Egipto, y ri rey ri' man xretamaj ta ruwech ri José, y roma ri' xch'on kik'in ri ruwinaq y xubij chike:

⁹ Titzu', ri e rijatzul ri Israel janila xewinaqir, y más kuchuq'a' chiqawech roj.

¹⁰ Wakami k'a qojok aj-na'oj y tiqanojij k'a achike niqaben chike. Richin man tiqaya' q'ij chi yek'iyer más, man xa titz'ukutej jun labal y nikitun-ki' kik'in ri e etzelanel qichin y yeyakatej chiqij y ye'animej-el chupan re qaruwach'ulew, xcha' ri rey.

¹¹ Kan ja ri q'ij ri', ri aj-Egipto xekikanoj achi'a' richin yek'oje' pa kiwi' ri israelita richin niya'ox k'ayew taq samaj chike y xban chike chi xkipaba-q'anej ri nima'q taq tinamit kibini'an Pitón y Ramsés, richin nuyek ri ru-trigo ri rey.

¹² Jak'a toq xeya'ox más pa tijoj-poqonal, jari' toq más xewinaqir y más xkinojisaj ruwech ri tinamit. Roma ri' ri aj-Egipto kan nikixibij chik ki' chikiwech ri israelita.

¹³ Y xkiben chike ri israelita chi xekiben janila k'ayew taq samaj.

¹⁴ Kan xk'ayewatej k'a ri kik'aslen roma ri ilinri'il xya'ox pa kiwi'. Xeya'ox k'a pa banoj ch'abeq richin xkiben xan chire richin nok ladrillo y ronojel ri kow taq samaj richin pa juyu', y kan xetz'ilox k'a chubanikil ri samaj ri'.

¹⁵ Pa ruwi' ronojel ri' ri rey xch'on kik'in ri Sifrá y ri Puá, ri e k'exelo'n kichin ri ixoqi' israelita y xubij chike:

¹⁶ Toq yixbe kik'in ri ixoqi' israelita toq ye'alan, kan titz'eta' chi'anin ri achike ri nalex, wi ti ala' ri nalex, tikamisaj y wi ti xten, tik'asba' kan, xcha' chike.

¹⁷ Jak'a ri k'exelo'n ri' kan xkixibij-ki' chuwech ri Dios y man xkiben ta achi'el ri xubij ri rey chike, roma ri' rije' xa man xekikamisaj ta ri taq alaboni'.

¹⁸ Y toq ri rey xrak'axaj re', xuteq k'a koyoxik ri ixoqi' ri', y xubij chike: ¿Achike roma rix xa man e ikamisan ta ri taq alaboni'?, xcha'.

¹⁹ Ri k'exelo'n ri' xkibij chire ri rey: Ri ixoqi' israelita man e junan ta qik'in roj ri oj aj-Egipto, roma rije' kan k'o kuchuq'a' y kan xek'achoj yan toq roj yojapon kik'in, xecha'.

^20-21 Y roma ri k'exelo'n ri' kan k'o rukiy ri Dios chikiwech, ri Dios xuben chike ri e ka'i' ixoqi' ri' chi xek'oje' kal y xek'iyer chuqa'. Y ri israelita kan xek'iyer más y man xek'is ta qa y xk'oje' más kuchuq'a'.

²² Y toq ri rey xutz'et chi xa man nitikir ta yerukamisaj, jari' toq xubij chike ri ruwinaq chi toq ye'alex ri ak'uala' taq alaboni' chikikojol ri winaqi' israelita, kan ketorix-el pa raqen-ya', y wi taq xtani' ri ye'alex, kekik'asba' kan.