Ester 7 - Kaqchiquel Bible

Ri Amán nitzeqebex

¹ Keri' ri rey y ri Amán xebe k'a pa nima-wa'in rik'in ri reina Ester.

² Y chupan ri ruka'n nima-wa'in ri', rokik nikiqum vino, ri rey xubij chire ri Ester: Tak'utuj k'a chuwe ri rurayibel ri awánima, y yin kan xtinya' chawe. Kan xtinya' k'a chawe stape' nak'utuj nik'aj chire ri wajawaren, xcha'.

³ K'ari' ri reina Ester xubij: Wi yin xinwil utzil awik'in, y wi rat niqa' chawech, tabana' utzil takolo' ri nuk'aslen yin y konojel ri nuwinaq,

⁴ roma yin y ri nuwinaq xa kan oj k'ayin chik richin yojbeken y xqojk'is jumul. Wi ta xojk'ayix richin yojyuqe' pa samaj chi achi'a' chi ixoqi', man ta yich'on; jak'a re wakami, xa xqojbek'is, y re' kan man ruk'amon ta k'a chi keri' nibanatej, roma xa xtuben chi xtiwuluwu' ri awajawaren rat, xcha'.

⁵ K'ari' ri rey Asuero xubij chire ri reina: ¿Achike k'a ri' y akuchi k'o-wi ri xch'obon-q'anej re jun itzel na'oj re'?, xcha'.

⁶ Y ri Ester xubij: Ri etzelanel qichin ja re itzelej Amán, xcha'. Jari' toq ri Amán kan xpe jun nimalej xibinri'il chire chikiwech ri rey y ri reina.

⁷ K'ari' ri rey xyakatej-el chire ri nima-wa'in roma kan xyakatej janila royowal, y xbe akuchi e tikil-wi kotz'i'j chiri' chuwa-jay. Jak'a ri Amán xkanej kan richin nuk'utuj utzil chire ri reina, chi man nikamisex ta, roma retaman chik chi, ja ri kamik ri royoben.

⁸ Y toq ri rey xok chik apo chiri' akuchi najin-wi ri nima-wa'in, xutz'et chi ri Amán lukul-apo pa ruwi' ri tz'uyubel nim raqen y buyul ri akuchi nuxulan-wi ri reina Ester. Jari' toq xubij ri rey: ¿Nawajo' chuqa' yak'oje-qa rik'in ri reina re wawe' pa wachoch?, xcha'. Y toq ri rey xtane-qa chubixik re ch'abel re', kan jari' toq ri samajela' richin ri rey ri ek'o chiri' xkitz'apej rupalej ri Amán, retal chi nibeken.

⁹ Y k'o k'a jun chike ri eunuco ri nilin richin ri rey, ri rubini'an Harboná; xch'on y xubij chire ri rey: Ri Amán runaban kan jun che' pa rachoch, ri jubama oxlajuj jaj rik'in jun q'a'aj jotol chikaj, richin nutzeqeba' ri Mardoqueo ri xkolon ri ak'aslen rat nu-rey, xcha'. K'ari' ri rey xubij chi ja ri Amán ri xtitzeqebex chutza'n ri che' ri'.

¹⁰ Keri', ri Amán xtzeqebex k'a chutza'n ri che' ri', pa ruk'exel ri Mardoqueo. Y rik'in k'a ri' xik'o-qa ri royowal ri rey Asuero.