Ester 5 - Kaqchiquel Bible

Toq ri Ester napon chuwech ri rey

¹ Toq xq'ax yan k'a ri oxi' q'ij, ri Ester kan xukusaj k'a el ri jebelej rutziaq, y xok k'a apo pa ruwa-jay chire ri rachoch ri rey. Y xpa'e-apo pa ruchojmilal ri ruchi' ri jay ri akuchi tz'uyul-wi richin ta chi ri Asuero nutz'et-pe.

² Y toq ri Asuero xutz'et-pe chi ri reina Ester k'o pa ruwa-jay chiri', jebel ok xutz'et-pe y xtze'en-pe rik'in, y xuya-pe ri rutza'n ri ru-cetro chire richin xnaqajub-apo rik'in. Y toq ri Ester xapon rik'in, xuchop ri rutza'n ri cetro ri'.

³ Y ri rey xuk'utuj chire: ¿Achike xaben nu-reina? ¿Achike nubij ri awánima? Yin kan xtinya' chawe ri xtak'utuj, stape' nik'aj chire ri wajawaren, xcha'.

⁴ Y ri Ester xubij: Wi yin xinwil utzil awik'in, tabana' utzil re chi'aq'a' wakami yape ta rat y ri Amán richin jun nima-wa'in ri xtinben chiwe. xcha'.

⁵ K'ari' ri rey xubij chi tibe'oyox chi'anin ri Amán, richin nibanatej ri rurayibel ri reina. Y keri' ri Asuero y ri Amán xebe pa nima-wa'in ri rubanon ri reina Ester.

⁶ Chupan k'a ri nima-wa'in ri' rokik nikiqum ri vino, ri rey xubij chire ri Ester: Tak'utuj k'a chuwe ri rurayibel ri awánima, y yin kan xtinya' chawe. Kan xtinya' chawe stape' nak'utuj nik'aj chire ri wajawaren, xcha' chire.

⁷ Y ri Ester xubij: Xaxe k'a re' ri ninwajo' nink'utuj chawe:

⁸ Wi yin xinwil utzil awik'in, tabana' utzil chi ri chua'q chi'aq'a' yixpe ta chik richin jun chik nima-wa'in ri xtinben chiwe. Y k'ari' xtinbij chawe ri ninwajo', xcha'.

Ri Amán nuch'ob nukamisaj ri Mardoqueo

⁹ Chupan k'a ri q'ij ri' xel k'a pe ri Amán y kan janila nikikot ri ránima roma ri nima-wa'in ri', jak'a toq xutz'et chik jun bey ri Mardoqueo chuchi' ri rachoch ri rey, jari' toq xyakatej chik janila royowal roma man xyakatej ta, ni man xuqasaj ta ri' chuwech.

¹⁰ Jak'a ri Amán xa man xuk'ut ta chi royowal. Y toq xapon chirachoch, xeroyoj ri rachibil y chuqa' xroyoj ri Zeres, ri rixjayil.

¹¹ Y xuchop k'a nunimirisaj-ri' chikiwech. Xuchol ronojel ri beyomel k'o rik'in, y ri janila chi ralk'ual ri ek'o. Chuqa' xutzijoj chike ri ruwaq'ijaj ri ruya'on ri rey chire, y chi xaxe rija' ri más nim ruq'ij chikikojol ri e tata'al y ri ch'aqa' chik rusamajela' ri rey.

¹² Pa ruwi' ronojel re' xubij: Kan xaxe k'a yin ri xiroyoj ri reina Ester richin yik'oje' pa nima-wa'in rik'in ri rey, y keri' chuqa' ri chua'q, kan xaxe roj ri xqojbe chik chupan ri jun chik nima-wa'in.

¹³ Jak'a stape' re kere' niban chuwe, chinuwech yin xa man jun rejqalen roma jantape' nintz'et ri Mardoqueo, ri judío, chuchi' ri rachoch ri rey, xcha'.

¹⁴ Xeri' ri Zeres y konojel ri rachibil xkibij chire: Tataqa' rubixik chi tipabex-q'anej jun che' richin nitzeqebex chikaj ri Mardoqueo, y ri che' ri' xtiban chire chi oxlajuj jaj rik'in jun q'a'aj ri rujotolen. Y chua'q nimaq'a', tak'utuj utzil chire ri rey chi titzeqebex ri Mardoqueo; richin keri' xkakikot chupan ri nima-wa'in rik'in ri rey, xecha'. Re jun na'oj re' kan xqa' chuwech ri Amán, y keri' k'a xuteq rubixik chi tiban.