Ester 4 - Kaqchiquel Bible

Ri winaqi' judío janila yebison roma ri pixa' ri'

¹ Toq xunabej ri Mardoqueo ri xbanatej, xuretz ri rutziaq chirij, retal richin nibison y xukusaj-el jun rutziaq qiriqoj, y xuya-el chaj pa rujolon, y xuchop nibiyajilan kojol jay chiri' chupan ri tinamit, y nisik'in rik'in janila q'axo'n.

² Y keri' k'a ri rubanik xapon k'a chuchi' ri rachoch ri rey, y man xok ta apo roma man niya'ox ta q'ij richin jun wineq rukusan ri tzieq richin bis nok-apo chiri'.

³ Y toq ri rutzijol ri' xapon chupan chijun ri ruwach'ulew, jari' toq janila xebison ri winaqi' judío. Xemewayin k'a y xesik'in chi oq'ej. Xkikusala' qiriqoj taq tzieq y xekotz'e' pa chaj.

Ri ruto'onik ri Ester pa ruwi' ri ruwinaq

⁴ Y ri xtani' ri ye'ilin richin ri reina Ester y ri achi'a' eunuco ri yechajin richin xbekibij k'a chire ri achike najin chubanik ri Mardoqueo. Jari' toq ri reina Ester janila xbison, y xuteq-el tzieq chire ri Mardoqueo richin nijalon y nrelesaj kan ri qiriqoj tzieq, jak'a rija' man xrajo' ta.

⁵ K'ari' ri Ester xroyoj k'a ri Hatac, jun chike ri eunuco ri rusamajel ri rey ri nichajin richin ri Ester, y xuteq-el rik'in ri Mardoqueo richin tuk'utuj chire ri achike k'uluwachitajineq y achike roma rukusan tzieq qiriqoj.

⁶ Xel k'a el ri Hatac richin xbech'on rik'in ri Mardoqueo chiri' pa nima-ruwech bey richin molojri'il richin ri tinamit ri k'o-pe chuwech ri rachoch ri rey.

⁷ Ri Mardoqueo xuq'alajirisaj k'a ri achike ruk'uluwachin, y chuqa' chi ri Amán rusujun chik k'iy saqipueq chire ri rey richin niya'ox q'ij chire chi kekamisex konojel winaqi' judío.

⁸ Y ri Mardoqueo xujech-el ri wuj ri richin xtalux rutzijol ri jun pixa' ri', richin nibejach pa ruq'a' ri Ester. Chuqa' xuchilabej-el chire ri Ester richin tapon chuwech ri rey, richin nibech'on rik'in pa kiwi' ri ruwinaq.

⁹ Ri Hatac xtzolej y xutzijoj chire ri reina Ester ri xubij ri Mardoqueo chire.

¹⁰ Y k'ari' ri Ester xuteq chik el jun bey ri Hatac, richin nibech'on chik rik'in ri Mardoqueo, y xubij:

¹¹ K'o jun pixa' ri nubij chi xabachike wineq ri nijel-apo chuwa-jay richin niberutz'eta' ri rey, wi man oyon ta, kan k'o chi niken. Konojel ri yesamej rik'in ri rey y konojel ri winaqi' ri ek'o pa ruq'a' rija' ketaman re pixa' re'. Jak'a wi ta ri rey nutzeqej ri ru-cetro*f4* ri banon rik'in q'anapueq chuwech ri wineq ri', man niken ta. Pa ruwi' ri', yin xa kan xik'o yan jun ik' ri man iroyon ta chik richin ninbentz'eta', xcha'.

¹² Y ronojel k'a ri xubij ri Ester xbebix chire ri Mardoqueo.

¹³ Xeri' ri Mardoqueo xuteq chik rubixik chire ri Ester y xubij: Man nana-qa-awi' chi rat xkakolotej kan chuwech re jun kamik re', roma atk'o pa rachoch ri rey.

¹⁴ Wi man jun xtanojij, y man jun xtabij chupan re q'ij re', xkepe ch'aqa' chik winaqi' ri xkekolon qichin roj judío. Jak'a rat xkaken, y keri' xkek'is ri rijatzul ri atata'. ¡Rik'in juba' xa roma ri' xatok kan reina richin yojato' chupan re jun ruk'ayewal re'!, xcha-el ri Mardoqueo chire.

¹⁵ K'ari' ri Ester xuteq chik pe rubixik chire ri Mardoqueo chi

¹⁶ tibe kik'in konojel ri kiwinaq ri ek'o chiri' pa Susa, y tubij chike chi kemewayin oxi' q'ij y oxi' aq'a'. Y kan keri' chuqa' xtuben rija' y ri xtani' ri ek'o rik'in. Chirij k'a re', k'ari' xtibe richin niberutz'eta' ri rey, stape' xtuq'ej ruwi' ri pixa'. Y chuqa' ri Ester xubij: Wi xkiken, kan xkiken k'ari', xcha'.

¹⁷ K'ari' ri Mardoqueo xbe y kan xuben k'a ronojel ri xubij-el ri Ester chire.