Ester 3 - Kaqchiquel Bible

Ri Amán etzelanel kichin ri judío

¹ K'o k'a jun achin rubini'an Amán, ruk'ajol ri Hamedata, y rijatzul kan ri Agag. Y ri rey Asuero kan xuya' janila rejqalen ri Amán, y xuben chire chi ja rija' xok más nim pa kiwi' konojel ri e aj-raqen richin chijun ri ruwach'ulew ri k'o pa ruq'a' ri rey.

² Ri Asuero kan xubij k'a chi konojel k'o chi nikiqasaj-ki' chuwech ri Amán. Roma ri' konojel ri rusamajela' ri rey yexuke' y nikiqasaj-ki' chuwech. Jak'a ri Mardoqueo man nixuke' ta, ni man nuqasaj ta ri' chuwech ri Amán.

³ Xeri' ri rusamajela' ri rey xkik'utuj k'a chire ri Mardoqueo achike roma nuxolq'otij ri pixa' ri xuya' ri rey.

⁴ Y ronojel k'a q'ij nikinataj chire, y rija' man niniman ta, roma rubin chik chike chi rija' jun judío, y man ruk'amon ta richin nuben keri'. Roma ri' xbekisujuj chire ri Amán, richin nikitz'et wi nukoch' ri rubanobal ri Mardoqueo.

⁵ Y ri Amán xutz'et k'a chi ri Mardoqueo man nixuke' ta, ni man nuqasaj ta ri' chuwech, y kan xyakatej janila royowal.

⁶ Toq ri Amán xunabej chi ri Mardoqueo jun judío, kan jari' xuch'ob richin yeruk'is, rija' y konojel ri ruwinaq ri ek'o chuxe' ri rutzij ri rey Asuero.

Ri ruchojmilal richin yek'is ri judío

⁷ K'o k'a jun q'ij chupan ri juna' kablajuj chire ri q'atbel-tzij richin ri rey Asuero, chupan ri nabey ik', ri nibix Nisán chire, chi ri Amán xuben jun sakinik*f3* richin nutz'et ri q'ij y ri ik' ri xtiberubana' ri ruch'obon pa kiwi' ri judío. Y xq'alajin k'a chi ja ri q'ij oxlajuj chire ri ik' kablajuj ri nibix Adar chire.

⁸ Xeri' ri Amán xubij chire ri rey Asuero: Chupan ri awajawaren rat, ek'o jun tzobaj winaqi' ri e talutajineq ri man junan ta kich'obonik qik'in. Y ri pixa' ri kitzeqeliben kan jun wi chik, y man nikitaqej ta ri apixa' rat. Yin ninch'ob chi kan man ruk'amon ta chawe rat chi ri winaqi' ri' e k'es.

⁹ Wi utz nawak'axaj ri xinbij chawe, kan tataluj k'a rubixik chi kek'is konojel ri winaqi' ri'. Y yin xtinjech chike ri asamajela' ri ek'o pa ruwi' ri abeyomel, 742 quintal saqipueq richin xtukusex chupan ri aq'atbel-tzij, xcha'.

¹⁰ K'ari' ri rey xrelesaj ri retal ri q'atbel-tzij chuwi-ruq'a', y xuya' chire ri etzelanel kichin ri judío; nel chi tzij ri Amán, ri ruk'ajol ri Hamedata, ri rijatzul kan ri Agag.

¹¹ Y ri Asuero xubij chire: Ri saqipueq ri xasuj, tik'oje' kan awik'in rat. Keri' chuqa' ri winaqi' judío yenjech pan aq'a' richin tabana' kik'in ri niqa' chawech rat, xcha'.

¹² Y chupan k'a ri q'ij oxlajuj chire ri nabey ik' richin ri juna', xe'oyox konojel ri tz'ibanela' richin ri rey, richin xkitz'ibaj ronojel ri xubij ri Amán. Y re jun pixa' re' xtz'ibatej pa ronojel ch'abel, richin nitaq pa ronojel tinamit chupan chijun ruwach'ulew ri k'o pa ruq'a' ri Asuero. Y xtz'ibex-el pa rubi' ri rey; xtz'apex-el-rij ri wuj rik'in ri retal ri ruq'atbal-tzij ri k'o chuwi-ruq'a' ri rey. Y ri wuj ri' xjach k'a el chike ri nima'q taq rusamajela' ri rey, chike ri e aj-raqen pa kiwi' ri aj-labal y chike ri e tata'al kichin ri tinamit richin ri ruwach'ulew ri'.

¹³ Xetaqalox k'a el ri wuj pa ronojel tinamit ri ek'o chuxe' ri ruq'atbal-tzij ri rey. Y chupan ri wuj nubij k'a chi chupan ri q'ij oxlajuj chire ri ik' Adar, kan pa jun q'ij kek'is konojel ri winaqi' judío; chi rijita'q, chi achi'a', chi ixoqi', chi alaboni', y chi ak'uala'. Y ronojel ri kibeyomel nok kan kichin ri winaqi' ri xkekamisan.

¹⁴ Y kan k'iy k'a wuj ri keri' nubij ri xban richin xtalux rutzijol chupan chijun ri ruwach'ulew ri', richin chi konojel tikinaba-ki' toq xtapon ri q'ij ri'.

¹⁵ Y chi'anin k'a xetalux ri wuj ri' pa ronojel tinamit. Y chuqa' chiri' pa tinamit Susa, ri rey xutaluj rutzijol. Chirij ri' ri rey y ri Amán xetz'uye' richin xenimaq'ijun; jak'a ri winaqi' richin ri tinamit Susa xa xsach kik'u'x.