Ester 2 - Kaqchiquel Bible

Ri Ester xcha'ox richin xok reina

¹ Toq xq'ax yan k'a ronojel re', y ri royowal ri rey xk'is yan qa, jari' toq xoqaqa chuk'u'x ri reina Vasti y ri rubanobal, y chuqa' ri wuj ri xtz'ibex pa ruwi' rija'.

² Jari' k'a toq xe'apon ri achi'a' aj-na'oj rik'in y xkibij chire: K'atzinel chi yekanox xtani' ri kan e jebejoj ok, y kek'amer-pe chawech rat.

³ Wakami k'a ke'ataqa' achi'a' pa ronojel tinamit ri ek'o chuxe' ri aq'atbel-tzij rat, richin yebekikanoj ri xtani', y yekik'en-pe pa tinamit Susa. Y ri xtani' ri' xkeya'ox chupan ri jay kichin ri xtani' ri ek'o chupan ri awachoch, y xkechajix roma ri asamajel Hegai ri eunuco, ri kan chajiy kichin ri xtani'. Y ja rija' ri xtik'utu chikiwech achike k'atzinel nikiben richin nikichojmirisaj-ki' richin más jebejoj ok yetzu'un.

⁴ Y ri más utz xtatz'et rat chikikojol ri xtani' ri', jari' ri xtok kan pa ruk'exel ri reina Vasti, xecha' chire. Ri rey kan janila xqa' chuwech re na'oj re', y roma ri' kan xuben achi'el ri xbix chire.

⁵ Chiri' pa Susa akuchi k'o-wi ri jay richin ri rey akuchi niq'aton-wi-tzij, k'o k'a jun achin judío rubini'an Mardoqueo, y rija' ruk'ajol ri Jaír, y ri Jaír rijatzul ri Simí, y ri Simí rijatzul ri Cis; y konojel re' e rijatzul kan ri Benjamín.

⁶ Y ri Cis jun chike ri xe'uk'uex-el pa Babilonia roma ri rey Nabucodonosor, toq xuk'uex-el ri Jeconías ri rey richin ri Judá pa Jerusalem.

⁷ Ri Mardoqueo k'o k'a jun rach'alal xten rubini'an Hadasá ri nibix chuqa' Ester chire. Y ri rutata' ri Ester jari' ri ruch'utitata' ri Mardoqueo. Y rija' xk'iytisan richin ri Ester, roma ri rute-rutata' xa xeken yan, y ja ri Mardoqueo ri k'amayon kan, y kan rumi'al rubanon chire. Y ri Ester kan jebejoj ok nitzu'un.

⁸ Toq xtalutej rutzijol ri xubij ri rey chupan ri wuj, kan e k'iy k'a xtani' ri xe'uk'uex chiri' pa Susa. Jari' chuqa' toq ri Ester xk'amer-pe pa rachoch ri rey, y xjach pa ruq'a' ri Hegai ri nichajin kichin ri xtani'.

⁹ Y ri Hegai más utz xutz'et ri Ester, chikiwech ri ch'aqa' chik xtani' ri ek'o chiri'. Roma ri' kan chi'anin xrilij jebel y xuya' ri jubulej taq aq'om chirij, y chuqa' xuya' wuqu' xtani' chire ri yesamej chiri' pa rachoch ri rey, richin nikiya-apo ronojel ri nik'atzin chire. Y xuya' chupan jun jay ri más utz rubanikil akuchi ek'o-wi ri xtani'.

¹⁰ Y ri Ester man xuq'alajirisaj ta k'a ri rutinamit ni ri aj pa rachoch, roma keri' bin-el chire roma ri Mardoqueo.

¹¹ Y ronojel k'a q'ij ri Mardoqueo niq'axlan-el keri' chuwech-apo ri ruwa-jay chire ri kachoch ri xtani', richin nretamaj achike rubanon ri Ester, wi utz beneq o ni.

¹² Ri xtani' k'o chi jun juna' ri niya'ox jubulej taq aq'om chikij richin chi ye'apon chuwech ri rey. Nik'aj juna' niya'ox chirij ri kich'akul jun aq'om rubini'an óleo richin mirra, y ri nik'aj-juna' chik nikikusaj ch'aqa' chik jubulej taq aq'om achi'el aceite rubanik. Y toq xtz'aqet ri jun juna', jari' toq xkichop chikijujunal ri xtani' yebe rik'in ri rey.

¹³ Y ri xten ri nel-pe pa kachoch ri xtani' richin nibe rik'in ri rey, niya'ox k'a q'ij chire richin nucha-el xabachike ri nrajo' richin nuwiq-el-ri'.

¹⁴ Y re xten re' nel-el pa kachoch ri xtani', y napon chuwech ri rey toq nokoq'a-qa, y toq niseqer-el ri ruka'n q'ij, nuk'uex-el chupan jun chik jay kichin ri ru-concubina*f2* ri rey, y man jun bey chik xtapon chuwech ri rey. Jak'a wi ri rey nuteq ruk'amik jun chike rije', k'a ri xtapon chik jun bey chuwech rija'. Y ri nichajin kichin ri ru-concubina ri rey, ja ri eunuco rubini'an Saasgaz.

¹⁵ Y xapon k'a ri q'ij chi ri Ester k'o chi napon chuwech ri rey. Rija' rumi'al kan ri Abihail, ri ruch'utitata' ri Mardoqueo. Y ri Ester xjalon y xuchojmirisaj k'a el ri' achi'el xbix chire roma ri Hegai, ri chajiy kichin ri xtani'. Y toq ruchojmirisan chik ri', konojel ri xetz'eton richin kan xkimey k'a ri rubanikil roma kan jebejoj ok.

¹⁶ Y keri' xuk'uex k'a el ri Ester rik'in ri rey Asuero chiri' pa rachoch, chupan ri ik' lajuj ri rubini'an Tébet, pa ruwuq juna' richin ri ruq'atbal-tzij ri rey.

¹⁷ Ri rey kan xbe k'a ránima chirij ri Ester, y más xrajo' chikiwech ri ch'aqa' chik xtani' ri e q'axineq-el rik'in. Keri' ri Ester xril utzil y ajowabel rik'in ri rey, más chikiwech ri ch'aqa' chik xtani'. Y roma ri' xuya' ri corona pa rujolon ri Ester richin xok reina. Y xuq'alajirisaj chi ja rija' ri nik'oje' kan pa ruk'exel ri reina Vasti.

¹⁸ Richin k'a niya'ox ruk'ojlen ri k'ak'a' reina, ri rey Asuero xuben jun nimaq'ij, y xeroyoj ri e tata'al y ri nima'q taq samajela'. Y xuyala' k'a sipanik chike roma ri rukikoten, y chuqa' chupan ri q'ij ri' xuqasaj ruwi' ri kan k'o chi nikitoj chire ri rey.

Ri Mardoqueo nukol ruk'aslen ri rey Asuero

¹⁹ Toq ri xtani' k'a yetajin na richin yeq'ax rik'in ri rey, jari' toq ri Mardoqueo nisamej k'a chiri' chuchi' ri rachoch ri rey.

²⁰ Y ri Ester kan man ruq'alajirisan ta k'a ri ruruwach'ulew, ni ri ruwinaq, roma rija' kan rutaqen-pe ronojel ri xbix chire roma ri Mardoqueo.

²¹ Y k'o k'a jun q'ij toq ri Mardoqueo k'o chiri' chuchi' ri jay richin ri rey, ek'o chuqa' chiri' e ka'i' eunuco e chajinela' richin ri ruchi-jay. Rije' kibini'an Bigtán y Teres, y rije' xyakatej k'a koyowal chirij ri rey, y roma ri' nikikanoj rubanik richin nikikamisaj.

²² Y ri Mardoqueo xq'ax chuwech re ch'obonik re', y xutzijoj k'a chire ri reina Ester, y ri reina xuq'axaj re tzij re' chire ri rey pa rubi' ri Mardoqueo.

²³ Xch'ob k'a jebel rij ri kich'obonik ri eunuco ri', y toq ri rey xunabej chi kan qitzij nikajo' nikikamisaj, kan xuteq k'a rubixik chi ketzeqebex richin yeken. Y re banobel re' xtz'ibex kan chupan ri wuj richin ri k'uluwachitajineq, achi'el xubij ri rey.