Dn 7 - Kaqchiquel Bible

Ri Daniel xek'utumej e kaji' chikopi' chuwech

¹ Toq k'a k'es na ri Belsasar, rey richin Babilonia, chupan k'a ri nabey juna' richin ri ruq'atbal-tzij, yin Daniel xinben k'a jun achi'el achik' rokik in kotz'ol pa nuch'at y kan k'o k'a ri xek'utumej chinuwech. Toq xuna' nuwech kan jari' xintz'ibaj ri wachik' y xinchol k'a ronojel ri xk'utumej chinuwech.

² Yin xintz'et k'a chupan ri wachik' chi xpe jun nimalej kaq'iq' pa relebel-q'ij, pa xokon, pa qajbel-q'ij y pa xaman. Y re kaq'iq' re' kan janila k'a nusiloj ruwi' ri palou.

³ Xintz'et k'a chuqa' chi ek'o e kaji' nimalej taq chikopi' ri jalajoj kibanik, ri xebek'ulun-pe pa ruwi' ri palou.

⁴ Ri rubanik ri nabey chikop kan achi'el k'a jun koj. Ek'o k'a ruxik' achi'el ri ruxik' ri kot. Yin kan nutzuliben k'a ri chikop ri' y xintz'et k'a chi ri ruxik' xa xetz'oq-el. Y xban k'a chire ri chikop ri' chi xpa'e' pan ulew pa ruwi' ri raqen achi'el nipa'e' jun wineq, y kan xban k'a chire chi ri ruch'obonik kan xok ruch'obonik wineq.

⁵ Y ri ruka'n chikop, kan achi'el k'a rubanik jun oso, ri kan nijekejot. Ri chikop ri' kan rukayen k'a oxi' baq, y xpe k'a jun ch'abel ri xubij chire: Kayakatej y tatija' ti'ij ri xa janipe' yatikir natej, xcha' chire.

⁶ Y ri rox chikop ri xintz'et kan achi'el k'a rubanik jun balma. K'o k'a kaji' rujolon y kaji' ruxik', achi'el kixik' ri aj-xik' taq chikopi', y kan xya'ox k'a janila uchuq'a' chire richin nich'akon.

⁷ Y ri rukaj chikop ri xintz'et, kan namey y kan nak'en rukiy ri rubanik. Kan k'o janila ruchuq'a' y ri rey kan e nima'q y e achi'el q'eqapueq. Ronojel k'a ri nril nutej y nuwulaj jumul y ri man nuk'is ta, kan nubech kan chi'aqen. Re chikop re' kan man junan ta k'a kik'in ri ch'aqa' chik chikopi' ri e nutz'eton-pe, y kan k'o k'a chuqa' lajuj ruk'a'.

⁸ Y rokik k'a yin ninmey ri lajuj uk'a' ri', kan xbek'ulun chik k'a pe chikikojol jun chik ti ko'ol uk'a', y k'o chi xe'elesex-el oxi' richin chi xk'oje' kan ri jun ti ko'ol. Ri ti ko'ol uk'a' ri' kan k'o k'a runaq'-ruwech achi'el ri wineq. K'o chuqa' ruchi', y yerubila' k'a janila itzel taq ch'abel.

Ri q'atbel-tzij richin ri Dios

⁹ Chirij ri' yin xintz'et k'a chi ek'o tz'uyubel richin q'atbel-tzij ri xechololex-qa. Xintz'et k'a jun chik tz'uyubel, y chiri' xtz'uye-wi ri k'aslik Dios. Ri rutziaq kan lox-lox k'a nitzu'un achi'el ri chuma-tew. Ri rusumal-ruwi' kan seq-seq, achi'el ri betz' seq. Ri rutz'uyubal richin ri ruq'atbal-tzij kan nik'a'on pa q'aq', Y chuxe-qa ri rutz'uyubal ek'o rueda, y ri ru-rueda kan keq-keq rubanon pa q'aq'.

¹⁰ Y chiri' kan nel-pe q'aq', kan achi'el k'a jun raqen-ya' ri nibusku'l. Kan pa taq 1,000 k'a ri yesamajin richin; kan man e ajlatel ta k'a ri ek'o-apo chunaqaj. Ri Dios ri tz'uyul chupan ri tz'uyubel xuchop k'a nuq'et-tzij, y xejaq k'a ri wuj ri ek'o chuwech.

¹¹ Rokik k'a yin nutzuliben ri ti uk'a', ri janila chi ch'abel nubila' richin nunimirisaj-ri'; kan jari' k'a xkamisex ri nimalej chikop ri ek'o lajuj ruk'a' y ri ruch'akul xk'ajix y xk'aq pa q'aq'.

¹² Jak'a ri e oxi' chik chikopi', kan elesan chik ri uchuq'a' ri ya'on chike, jak'a xya'ox na k'a kan juba' kik'aslen, k'a toq xtitz'aqet na ri q'aton pa kiwi'.

¹³ Yin kan k'a nutzuliben na ronojel ri xk'utumej chinuwech, y chaq k'ate' k'a xintz'et jun chik banobel. Xintz'et k'a chi chupan ri sutz' chila' chikaj, peteneq k'a jun ri xo'alex achi'el jun wineq rubanik. Y xkiben chire richin xjel-apo chuwech ri k'aslik Dios.

¹⁴ Kan xya'ox k'a uchuq'a', ruwaq'ijaj y ajawaren chire. Konojel k'a ri winaqi', ri e richin chijun ri tinamit, ri ruwach'ulew y ri jalajoj ruwech ri kich'abel kan k'o chi nikisamajij. Ri ruq'atbal-tzij rija' kan richin k'a q'asen, y ri rajawaren kan man jun k'a xtiwulan richin.

¹⁵ Yin, Daniel, kan janila k'a xink'en rukiy, y kan janila xinch'ob rij ronojel ri yinajin chutz'etik.

¹⁶ Y roma ri' xijel k'a apo rik'in jun chike ri ek'o-apo chiri', y xink'utuj chire pa ruwi' ronojel ri xintz'et, y rija' kan xuq'alajirisaj k'a chinuwech ronojel.

¹⁷ Xubij k'a chuwe chi ri kaji' nima'q taq chikopi' nel chi tzij e kaji' q'atoy taq tzij richin kaji' ruwach'ulew.

¹⁸ Chirij ri', ri ajawaren kan xtijach k'a pa kiq'a' ri e richin ri rutinamit ri nimalej Dios, y rije' kan xtikiq'et k'a tzij tibe-q'ij tibe-seq.

¹⁹ Y xinwajo' chik k'a xinwetamaj ri nuk'exewachuj ri rukaj chikop, ri man junan ta kik'in ri ch'aqa', ri kan namey y kan nak'en rukiy ri rubanik, ri kan e achi'el q'eqapueq ri rey y ri rixk'eq kan q'enq'oj-pueq, ri kan nutej y nuwaq'aq'ej ronojel ri nril y ri man nuk'is ta kan nubech kan chi'aqen.

²⁰ Keri' chuqa' xinwajo' ta xinwetamaj achike nuk'exewachuj ri lajuj uk'a', y ri jun chik ti ko'ol uk'a' ri xbek'ulun-pe chikikojol, ri kan k'o chi xetzaq-el e oxi' richin chi xk'oje' kan pa ruk'exel re jun ti ko'ol re' ri k'o runaq' ruwech y ruchi' y kan nich'on rik'in nimirisanen, y kan nuben chi kan ja rija' ri más nim chikiwech ri rachibil.

²¹ Y xintz'et k'a chi re jun ti uk'a' re', kan nuben oyowal kik'in ri e rutinamit ri Dios y kan yeruch'ek,

²² k'a toq xpe na ri k'aslik Dios y xuq'et k'a tzij pa kiwi' ri kan e richin rija', roma kan jari' xtz'aqet ri q'ij ri bin-pe, y keri' rije' kan xkik'ul k'a ri ajawaren.

²³ Pa ruwi' re' chuqa' xubij chuwe: Ri rukaj chikop nel chi tzij jun rukaj ajawaren chuwech re ruwach'ulew. Y re' kan man junan ta kik'in ri ch'aqa' chik ajawaren. Kan xkeruch'ek k'a rije'; xkeruq'ututej y xkeruk'ajij jumul.

²⁴ Ri lajuj uk'a' nel chi tzij chi chirij ri rukaj ajawaren, xkebeyakatej chik pe lajuj ajawaren. Chikij rije' xtibeyakatej chik pe jun, y re' kan man junan ta kik'in ri e lajuj. Y kan xkeruch'ek k'a e oxi' ajawaren chikikojol ri e lajuj.

²⁵ Ri q'atoy-tzij ri k'o pa ruwi' re jun ajawaren re' kan xtuyoq' k'a ri nimalej Dios y kan xtuben chike richin nikitej poqon richin yek'is ri rutinamit ri Dios. Kan xtrajo' k'a xtujel ri rubanik ri pixa' y ri nimaq'ij ri e tz'ibatel kan chupan. Ri rutinamit ri Dios kan xkejach k'a pa ruq'a' rija' y kan xkek'oje' k'a pa ruq'a' k'a toq xtitz'aqet na ri oxi' juna' rik'in nik'aj.

²⁶ Chirij ri' toq xtuq'et-tzij ri nimalej Dios, kan xtrelesaj k'a ri uchuq'a' chire, y xtik'is chiri' jumul.

²⁷ Ri ajawaren richin chijun ruwach'ulew, ri ruchuq'a' y ri ruwaq'ijaj kan xtijach k'a pa kiq'a' ri e richin ri rutinamit ri nimalej Dios. Re ajawaren re' kan richin k'a tibe-q'ij tibe-seq. Konojel k'a ri tinamit y ri ruwach'ulew kan xtikisamajij y xtikinimaj rutzij, xcha' chuwe.

²⁸ Wawe' k'a xtane-wi ri rusolik-rij ronojel ri xintz'et. Jak'a yin Daniel kan sachineq k'a nuk'u'x y kan nukajman yitzu'un. Man rik'in ri' kan xinyek k'a pa wánima ronojel ri xintz'et y ri xbix chuwe.