Dn 3 - Kaqchiquel Bible

Ri winaqi' yexuke' chuwech jun wachibel

¹ Toq q'axineq chik ri q'ij, ri rey Nabucodonosor xuteq k'a rubanik jun wachibel ri xban rik'in q'anapueq, y xupaba' chiri' pa jun taq'aj rubini'an Dura pa ruwach'ulew Babilonia. Ri wachibel paban, xban chire chi waqxaqlajuj jaj rujotolen y jun jaj rik'in nik'aj ruwech.

² Toq xk'achoj ri paban wachibel ri', ri Nabucodonosor xuteq koyoxik ri e rusamajela', ri e aj-raqen pa kiwi' ri aj-labal, ri e q'atoy taq tzij ri ek'o pa ruwi' ri e nima'q taq tinamit, ri e yakol méro, ri pixabanela', ri to'onela' y konojel ri ek'o pa taq q'atbel-tzij chupan chijun ri ruwach'ulew Babilonia, richin nikinimaq'ijuj ri wachibel ri xuteq rubanik.

³ Konojel k'a nima'q taq winaqi' ri' xkimol-ki' richin yenimaq'ijun y xepa'e-apo chuwech ri wachibel ri xban-q'anej chiri'.

⁴ Ri aj-raqen ri pa'el chuwech ri molojri'il ri' xch'on k'a kow y xubij: Tiwak'axaj chi'iwonojel rix winaqi', y rix ri yixpe nej, ri yixch'on jalajoj ruwech ch'abel.

⁵ Kan xkebeq'ajan k'a pe ri trompeta, ri flauta y ri jalajoj kiwech q'ojom ri k'o kik'amal. Toq xtiwak'axaj chi xkeq'ajan-pe ronojel re', kan jari' k'a k'o chi yixxuke-qa chuwech re wachibel re' ri xuben-q'anej ri rey Nabucodonosor re wawe'.

⁶ Y xabachike k'a wineq ri man nrajo' ta nixuke' richin nuya' ruq'ij re wachibel re', kan chi'anin xtik'aq pa q'aq' richin nik'at, xcha'.

⁷ Roma ri' konojel ri winaqi' ri ek'o chiri' kan xaxe toq xkak'axaj chi xbeq'ajan-pe ri q'ojom, kan jari' k'a chi'anin xkiqasaj-ki' k'a pan ulew, y xkiya' ruq'ij ri wachibel paban banon rik'in q'anapueq, ri xuben ri Nabucodonosor.

⁸ Chupan ri q'ij ri' ek'o k'a jujun chike ri aj-Babilonia ri kan itzel yekitz'et ri aj-Judá, y roma ri' rik'in ch'upun-k'u'x xebekisujuj rik'in ri rey.

⁹ Y xkibij k'a chire: Rat rey kan jantape' ta k'a xkak'ase'.

¹⁰ Rat kan xaya' k'a jun pixa' ri nubij chi qonojel winaqi' toq xtiqak'axaj chi yebeq'ajan-pe ri q'ojom, kan jari' k'a qonojel xtiqaqasaj-qi' k'a pan ulew y tiqaya' ruq'ij ri wachibel.

¹¹ Y xabachike k'a ri man xtuqasaj ta ri' y man nuya' ta ruq'ij ri wachibel, kan xtik'aq pa q'aq' richin nik'at, xacha'.

¹² Y wakami ri achi'a' aj-Judá ri kibini'an Sadrac, Mesac y Abed-negó, ri e aya'on pa ruwi' re qaruwach'ulew Babilonia, kan man kinimaj ta atzij rat rey, ni kan man nikiya' ta kiq'ij ri qa-dios, ni man yexuke' ta chuwech ri wachibel, xecha'.

¹³ Toq xrak'axaj keri', ri rey kan xyakatej k'a janila royowal, y roma ri' xuteq kik'amik ri Sadrac, ri Mesac y ri Abed-negó. Y kan chi'anin k'a xek'amer-pe chuwech ri rey.

¹⁴ Y toq ek'o chik chiri', ri rey xuk'utuj k'a chike wi kan qitzij chi rije' man nikiya' ta kiq'ij ri e ru-dios y chuqa' man yexuke' ta chuwech ri wachibel.

¹⁵ Y xubij chik k'a jun bey chike, chi toq xtikak'axaj ri ruch'abel ri q'ojom kan k'o chi yexuke' chuwech ri wachibel, roma wi man xkexuke' ta, kan ja yan ri' xkek'aq pa q'aq' richin yek'at. Y kan man jun k'a dios ri xkekolon pa ruq'a' ri rey.

¹⁶ Y rije' xkibij chire ri rey: Re' kan man jun ch'owen nrajo',

¹⁷ roma kan qetaman k'a chi ri Dios ri niqasamajij roj, kan nitikir yojrukol chuwech ri q'aq' ri', y chuqa' nitikir yojrukol pan aq'a' rat rey.

¹⁸ Jak'a wi yojrukol o man yojrukol ta, kan tawetamaj k'a rat rey chi kan man xtiqasamajij ta ri a-dios, y kan man xqojxuke' ta chuwech ri wachibel ri k'ari' xaben-q'anej, xecha'.

Ri e oxi' aj-Judá xekolotej chuwech ri q'aq'

¹⁹ Toq xrak'axaj ronojel re', ri rey kan xkaqer k'a ri rupalej roma ri royowal chikij ri Sadrac, Mesac y ri Abed-negó. K'ari' xubij-el chi tiya'ox wuqu' mul ri ruchuq'a' ri q'aq'.

²⁰ Y xuteq k'a koyoxik ri aj-labal ri janila kuchuq'a' richin yekixim ri Sadrac, ri Mesac y ri Abed-negó, y yekik'eq pa q'aq'.

²¹ Keri' rije' kan xexim k'a y k'a kikusan na ri tzieq richin kisamaj, y keri' xek'aq chupan ri q'aq'.

²² Xkiya' k'a janila ruchuq'a' ri q'aq' achi'el k'a ri rubixikil ri xubij ri rey. Y ri ruxaq ri q'aq' ri' xeberuq'i' ri achi'a' ri xeya'on-qa kichin ri Sadrac, ri Mesac y ri Abed-negó, y kan xerukamisaj.

²³ Y rije' e ximil k'a el, toq xek'aq-qa chupan ri q'aq'.

²⁴ Y xaxe ri' ri rey xuk'en janila rukiy, y xyakatej-el junanin, y xubij chike ri e rusamajela': ¿Man xaxe ta k'a e oxi' ri e ximil ri xeya'ox pa q'aq'?, xcha'. Y rije' xkibij chire ri rey, chi xaxe e oxi'.

²⁵ Y ri rey xubij: Wakami yin nintz'et chi e kaji' ri yebiyaj pa ruxaq q'aq', y man jun kik'uluwachin; jak'a ri rubanikil ri rukaj kan achi'el xa ta jun kalk'ual ri dios, xcha'.

²⁶ Jari' k'a toq ri Nabucodonosor xjel-apo chuchi' ri q'aq', y xubij k'a chike: Sadrac, Mesac, Abed-negó rusamajela' ri k'aslik Dios, kixel-pe chiri', kixanpe, xcha'. Y rije' kan xe'el k'a pe chupan ri q'aq'.

²⁷ Y konojel k'a ri e q'atoy taq tzij ri ek'o-apo chiri', xejel-apo kik'in rije' richin yekitz'et. Y nikimey achike roma ri q'aq' kan man jun xuben chire ri kich'akul, ni ri rusumal-kiwi' kan man jun xk'at, ni ri kitziaq man jun xok chire y ni ta ruxla' ri q'aq' man xbe ta chikij.

²⁸ K'ari' ri Nabucodonosor xch'on y xubij: Nimalej ruq'ij ri ki-Dios ri Sadrac, ri Mesac y ri Abed-negó. Roma kan xuteq k'a pe jun ru-ángel y xerukol re e rusamajela' re' ri xkikuquba' kik'u'x rik'in. Rije' kan man xkitaqej ta ri pixa' ri xinya' yin, y xa kan xkijech k'a ki' pa ruq'a' ri ki-Dios y man xkiya' ta ruq'ij jun chik dios.

²⁹ Roma ri' wakami, kan ninya' re jun pixa' re' chi xabachike k'a tinamit, ruwach'ulew o wineq ri nich'on itzel chirij ri ki-Dios ri Sadrac, ri Mesac y ri Abed-negó, kan xkek'ajix k'a y ri kachoch kan xtok k'a kan toribel q'ayis. Roma kan qitzij wi chi kan man jun chik dios nikolon achi'el ri ki-Dios rije', xcha'.

³⁰ Chirij ri' ri Nabucodonosor xunimirisaj chik más kiq'ij ri Sadrac, ri Mesac y ri Abed-negó pa ruwi' ri ruwach'ulew Babilonia.