Dn 12 - Kaqchiquel Bible

¹ Xtapon k'a ri ruq'ijul, y xtipe k'a ri ángel Miguel, ri chajinel richin ri atinamit. Ri q'ij ri' kan q'ij k'a richin q'axo'n, y kan man jun bey k'a banatajineq-pe keri', pa rutikeribel janipe' ek'o-pe ri winaqi', k'a toq xtapon ri q'ij ri'. Y chupan k'a ri q'ij ri' ri atinamit rat kan xkekolotej k'a chuwech ri tijoj-poqonal konojel ri tz'ibatel kibi' chupan ri wuj.

² E k'iy k'a awinaq ri e kaminaqi' chik el, ri xkek'astej chik pe; jujun xkek'astej-pe richin yek'ase' chik richin q'asen, y ch'aqa' chik xkek'astej-pe richin ruk'ixbilal y richin qasanri'il.

³ Ri winaqi' ri e etamanela' ri xkeyuqen kichin ri winaqi' ri yebanon pa ruchojmilal xtikik'ul janila ruwaq'ijaj; y ri utzilej kitzijol kan xtitalutej chuwech chijun ruwach'ulew y chikaj.

⁴ Jak'a rat Daniel, kan tatz'apej kan jebel re wuj re', k'a toq xtapon na k'a ri ruq'ijul richin ri ruk'isibel taq q'ij. Chupan ri q'ij ri' ri winaqi' kan xtikitej k'a kiq'ij richin niketamaj, y ri etamabel kan xtibe k'a pa jotol, xcha' chuwe.

⁵ Jari' toq yin Daniel, xintz'et chik k'a chi chuchi' ri raqen-ya' Tigris ek'o e ka'i' achi'a', ri jun pa'el ri juk'an chire ri raqen-ya' y ri jun chik ja ri juk'an chik ruchi' pa'el-wi.

⁶ Y ri ángel ri xch'on wik'in kan k'a pa'el na k'a chiri' pa ruwi' ri ya', y rukusan ri tzieq banon rik'in lino. Y jun k'a chike ri e ka'i' ri e pa'el chuchi' ri ya' xch'on k'a apo chire y xubij: ¿K'a janipe' nibetane' re meyel taq banobel re'?, xcha-apo.

⁷ K'ari' ri ukusayon tzieq ri banon rik'in lino, kan xutzeqej k'a chi e ka'i' ruq'a' chikaj y xuya' rutzij pa rubi' ri Dios ri jantape' k'es, chi ronojel re' kan xtibetane', k'a toq xtitz'aqet na ri oxi' juna' rik'in nik'aj, toq ri uchuq'a' ri k'o kik'in ri rutinamit ri Dios xtik'is jumul, k'ari' toq xtitane' ronojel re'.

⁸ Yin kan xinwak'axaj k'a ri xubij, jak'a xa man xq'ax ta chinuwech. Y roma ri' xink'utuj chik apo chire chi k'a janipe' xtibetane' ronojel re'.

⁹ Y rija' xubij chuwe: Rat Daniel katzolin, roma ronojel re' kan xtz'apetej yan, y k'a pa ruk'isibel taq q'ij xtiq'alajirisex ronojel re'.

¹⁰ E k'iy k'a ri xkeq'ax chupan ri tijoj-poqonal, richin xkek'ulun k'a más e choj y más e ch'ajch'oj. Jak'a ri e banoy taq etzelal kan xtikiben chik k'a más ri etzelal, y man xtiq'ax ta k'a chikiwech ri ruk'ayewal ri najin. Xa kan xaxe k'a chikiwech ri e aj-na'oj ri xtibeq'ax-wi ronojel re'.

¹¹ Xtuben k'a 1,290 q'ij chi man xtisuj ta chik ri kamelabel ri yesuj q'ij-q'ij, xa xtisuj k'a ri kamelabel ri kan nrixowaj ri Dios.

¹² Jebel ruwa-ruq'ij ri wineq ri xtitikir xtukoch' chi xtiq'ax ri 1,335 q'ij.

¹³ Jak'a rat, Daniel, xa xtapon k'a ri q'ij richin xkatuxlan-el y xkabeyakatej chik pe k'a pa ruk'isibel taq q'ij chire ri tijoj-poqonal richin nak'ul ri k'o chi nok awichin rat.