Dn 1 - Kaqchiquel Bible

¹ Toq k'a k'es na ri Joaquim, ri rey pa ruwi' ri ruwach'ulew Judá y chupan ri rox juna' chire ri ruq'atbal-tzij, jari' toq ri Nabucodonosor, rey pa ruwi' ri ruwach'ulew Babilonia e rachibilan ri aj-labal, xebeyakatej-pe chirij ri tinamit Jerusalem y xkisutij-rij.

² Y ri Dios kan xujech k'a ri Joaquim y ri e ruwinaq israelita pa ruq'a' ri Nabucodonosor; keri' chuqa' ri jalajoj ruwech samajibel ri ek'o chupan ri rachoch ri Dios. Y ronojel ri samajibel ri' ri Nabucodonosor xberuya' kan pa ruwach'ulew Babilonia, y xeruyek kan chupan ri yakonabel richin ri rachoch ri ru-dios.

³ Chirij ri' ri rey xch'on rik'in ri aj-raqen pa kiwi' ri rusamajela', ri rubini'an Aspenaz, y xubij chire chi kek'amer-pe alaboni' chikikojol ri israelita ri e rijatzul ri rey y ri e tata'al.

⁴ Rije' kan nik'atzin chi kan e tz'aqet y kan e jebel ok, y e tijon jebel rik'in ronojel etamabel y kan e nowineq, ri kan e nojineq chuqa' rik'in na'oj y kan ruk'amon richin yek'oje' pa rachoch ri rey. Y chuqa' xubij chike chi ketijox rik'in ri kich'abel ri aj-Babilonia, y tik'ut rutz'ibaxik ri ch'abel ri' chikiwech.

⁵ Y chuqa' xubij chi ri alaboni' ri' k'o chi nikitej ri q'utun achi'el nutej rija' q'ij-q'ij, y ri vino ri nuqum rija', jari' k'o chi nikiqum chuqa' rije'. Y oxi' juna' k'o chi yetijox richin chi ye'ok aj-raqen rik'in rija'.

⁶ Chikikojol k'a ri alaboni' aj-Judá xecha'ox, ri Daniel, ri Ananías, ri Misael y ri Azarías.

⁷ Jak'a ri Aspenaz xujel kibi' ri alaboni' ri', y xukanoj pa kich'abel ri aj-Babilonia. Y kere' ri kibi' ri xuya': Ri Daniel xubini'aj Beltsasar; ri Ananías, Sadrac; ri Misael, Mesac; y ri Azarías, Abed-negó.

⁸ Jak'a ri Daniel kan xubij pa ránima chi man xtutz'ilobisaj ta ri ruk'aslen rik'in ri q'utun y ri vino ri nutej ri rey. Roma ri' xuk'utuj utzil chire ri Aspenaz chi man tiban chire chi nuq'ej ruwi' rutzij ri ru-Dios.

⁹ Roma ri rutzil ri Dios, ri Daniel kan utz xtz'et roma ri Aspenaz,

¹⁰ y roma ri' ri Aspenaz xubij k'a chire ri Daniel: Yin kan k'o rukiy ri rey chinuwech, roma rija' kan xubij chuwe ri k'o chi nitej y ri niqum. Jak'a wi xa xkixrutz'et chi rix xa ix rukajman y ri juley chik alaboni' kan más utz yetzu'un chiwech rix; rik'in juba' xa roma ri' xkirukamisaj, xcha' ri Aspenaz.

¹¹ Ri Aspenaz xuya' k'a kan ri Melsar pa kiwi' ri Daniel, ri Ananías, ri Misael y ri Azarías. Jak'a ri Daniel xubij chire ri Melsar:

¹² Nink'utuj utzil chawe chi qojatejtobej lajuj q'ij. Kan xaxe k'a ichaj taya' chiqe richin niqatej y richin niqaqum, xa choj ya'.

¹³ Chirij ri lajuj q'ij xqojajunamaj k'a kik'in ri ch'aqa' chik alaboni' ri junan kiwaybal rik'in ri rey, y kan xtatz'et k'a ri rukojol ri yojtzu'un. K'ari' xtaben rat ri ruk'amon chi naben, xcha' ri Daniel chire.

¹⁴ Y ri aj-raqen kan xqa' k'a chuwech ri xbix chire y xerutejtobej k'a lajuj q'ij.

¹⁵ Y toq xtz'aqet ri lajuj q'ij, ri kaji' alaboni' ri' kan más jebel yetzu'un y kan q'alaj chi k'o kuchuq'a' chikiwech ri alaboni' ri xkitej ri q'utun ri rubin ri rey.

¹⁶ Keri' ri Melsar nrelesaj k'a el chikiwech ri q'utun y ri vino ri k'o chi nikitej ri Daniel y ri e rachibil, y xa ja ri ichaj ri xuya' chike.

¹⁷ Ri Dios kan xuya' k'a ronojel etamabel y na'oj chike ri kaji' alaboni' ri', richin niq'ax chikiwech ri tijonik ri niya'ox chike. Y chire ri Daniel xuya' na'oj richin nuq'alajirisaj achik' y ronojel ri yek'utumej chuwech jun wineq.

¹⁸ Y toq xtz'aqet k'a ri oxi' juna' ri rubin ri rey chire ri Aspenaz, jari' toq konojel ri alaboni' xe'uk'uex chuwech ri rey.

¹⁹ Y ri rey xch'on kik'in konojel ri alaboni' y xutz'et k'a chi chikikojol konojel rije' kan e maneq chik ri e achi'el ta ri kibanik ri Daniel, ri Ananías, ri Misael y ri Azarías. Roma ri' ja kaji' k'a alaboni' ri' ri xek'oje' kan aj-raqen pa kiwi' ri rusamajela' ri rey.

²⁰ Ri rey kan xubij k'a chike ri alaboni' ri' chi nikiq'alajirisaj na'oj y nojibel chire. Keri' ronojel ri xuk'utuj chike, ri kan nrajo' etamabel y nojibel kan xq'alajin k'a chuwech chi ri ketamabal rije' kan ik'owineq k'a lajuj bey chikiwech ri aj-itza' y ri aj-q'ija' ri ek'o chupan ri ajawaren.

²¹ Y ri Daniel xsamej chiri', y kan k'a k'o chiri' toq ri Ciro aj-Persia xuch'ek kan ri ruwach'ulew Babilonia.