Deut 7 - Kaqchiquel Bible

¹ Toq ri Jehová Dios xkixrukusaj-apo chupan ri ruwach'ulew, jari' toq kan chiwech xkerelesaj-el wuqu' tinamit ri janila e nima'q y janila kuchuq'a' chiwech rix, jare' ri tinamit: Ri hitita, ri gergeseo, ri amorreo, ri cananeo, ri ferezeo, ri heveo y ri jebuseo.

² Toq ri Jehová ri qa-Dios xerujech yan pan iq'a', man tijunamatej-iwech kik'in, ni man tijoyowaj kiwech, xa kan ke'ik'isa' k'a konojel.

³ Man tixolola-iwi' kik'in rije'; man tiya' q'ij richin yek'ule' ri imi'al kik'in ri kik'ajol rije', ni ri kimi'al rije' yek'ule' ta kik'in ri ik'ajol rix.

⁴ Roma wi keri' xtiben, rije' xtikiben chike ri iwalk'ual richin xtikiya' kan ri Dios y xtikiya' kiq'ij ch'aqa' chik dios, y keri' xtipe royowal ri Jehová chiwe y xkixruk'is chi'anin.

⁵ Ke'iwulaj ronojel ri porobel, ri wachibel, ri paban taq che' ri nikiya' ruq'ij; kan ke'iporoj k'a kan.

⁶ Roma rix kan ix jun tinamit ri kan ix ch'aron chire ri Jehová ri qa-Dios; rija' kan xixrucha' chikikojol chijun ri ruwach'ulew ri ek'o, richin keri' rix xkixok jun rutinamit ri kan k'o rejqalen chuwech rija'.

⁷ Ri Jehová xixrucha'; man roma ta janila iwejqalen chikikojol ri ruwach'ulew, roma stape' xa ja rix ri más ix ko'ol chikiwech konojel ruwach'ulew.

⁸ Ri Jehová ri qa-Dios kan yojrajo', y roma ri' xuben k'a ri rujikiban chik chike ri qati't-qamama'. Rik'in ronojel ruchuq'a' xojrukol-pe pa kiq'a' ri aj-Egipto y xojrelesaj-pe chiri' ri akuchi xqatej-wi poqon roma xojya'ox pa kowilej taq samaj.

⁹ Kan tiwetamaj k'a chi ri Jehová ri qa-Dios jari' ri qitzij Dios y kan nuben ri nubij achi'el ri rutzij ri rujikiban, y kan nujoyowaj iwech ri yixajowan richin y nitaqej ri rupixa' ri richin jantape', stape' yeq'ax janila chi sol winaqi' chuwech ri ruwach'ulew.

¹⁰ Y nuya' rutojbalil chike ri winaqi' ri ye'etzelan richin y chi'anin k'a xkeruk'is.

¹¹ Roma ri' kan titaqej k'a ri pixa' ri ninya' chiwe wakami richin chi niben.

Ri urtisanik ri nuk'en-pe ri niman-tzij

¹² Wi rix kan xtiwak'axaj ronojel ri pixa', kan xtitaqej y kan xtiben, ri Jehová ri qa-Dios kan xtuben k'a chuqa' achi'el ri rusujun chiwe rix y xtuk'ut k'a ri rajowabal ri rujikiban chike ri qati't-qamama'.

¹³ Kan xkixrajo' y kan xtuya' urtisanik pan iwi' y kan xkixruwinaqirisaj y chuqa' kan xtuya' ruq'a' pa kiwi' ri iwalk'ual y pa ruwi' ri jalajoj ruwech ixin, ri vino, ri aceite, pa kiwi' ri kal ri wákix y ri karne'l, ri xkek'oje' iwik'in chiri' chupan ri ruwach'ulew ri sujun kan chike ri qati't-qamama'.

¹⁴ Rix más urtisanik xtiberuya' pan iwi' chikiwech ch'aqa' chik tinamit; man xtibek'oje' ta jun ixoq ri man nik'oje' ta ral, y chuqa' man jun achin ri man ta nalk'ualan, y chuqa' chikikojol ri iwawej man xkek'oje' ta ri man ye'alan ta.

¹⁵ Ri Jehová kan xtrelesaj-el ronojel ruwech yabil y xtrelesaj ri nimalej ruk'ayewal, achi'el ri xuya' pa kiwi' ri aj-Egipto, xa kan xaxe pa kiwi' ri winaqi' ri ye'etzelan iwichin xtuya-wi.

¹⁶ Y rix kan xke'ik'is konojel ri e nima'q taq tinamit ri xkeruya' ri Jehová ri qa-Dios pan iq'a'; man tikuy kimak y man tiya' kiq'ij ri ki-dios, roma jari' ri xtok jun pikbel chiwe rix.

¹⁷ Rik'in juba' rix nibij-qa pan iwánima: Re winaqi' kichin re ruwach'ulew re' kan k'o-wi más kuchuq'a' chiqawech roj, ¿achike k'a xtiqaben richin chi xkeqelesaj-el?, xkixcha'.

¹⁸ Jak'a man tixibij-iwi' chikiwech, xaxe toqaqa chi'ik'u'x ri xuben ri Jehová rik'in ri rey richin Egipto y kik'in ri ruwinaq.

¹⁹ Tich'obo' rij ri nima'q taq banobel ri xitz'et, ri man jun bey itz'eton, ri xuben ri Jehová Dios ri k'o ronojel uchuq'a' rik'in toq xojrelesaj-pe ri chiri' pan Egipto. Keri' chuqa' xtiberubana' ri Jehová Dios kik'in konojel ri tinamit ri ixibin-iwi' chikiwech.

²⁰ Ri Jehová ri qa-Dios xkeberutaqa-pe q'atz'utuj pa kiwi' rije' y xkeken konojel, y stape' ri xtikewaj-ki' chiwech kan xkek'is chuqa'.

²¹ Man kixmayamo-qa chikiwech rije', roma ri Jehová ri qa-Dios kan k'o chi'ikojol rix, rija' jun Dios nim y kan k'o rukiy, y roma ri' xkebaybot chuwech.

²² Ri Jehová ri qa-Dios chi jutaqba' chi jutaqba' xkerelesaj-el ri winaqi' chiwech; roma rix xa man xkixtikir ta xke'ik'is-el pa jun bey, richin chi man yebeyakatajilan-pe chiwij ri k'uxunela' taq chikopi' ri richin pa taq juyu'.

²³ Ri Jehová ri qa-Dios kan xkeruliba' k'a apo chiwech ri winaqi' ri', xtuben chike richin tikitej poqon y xkeruk'is jumul.

²⁴ Y xkerujech ri ki-rey pan iq'a' y xkek'oje' chuxe' itzij rix, y rix xtiben chike chi ni jun chike rije' xtinatex ri rubi' chuwech re ruwach'ulew. Y man jun chike rije' xtupaba' ta ri' chiwech rix y kan xke'ik'is.

²⁵ Rix kan xke'iporoj ri ruwachibel ri ki-dios. Man tirayij ri saqipueq, ri q'anapueq ri e ya'on chikij, richin chi man tok jun pikbel chiwe rix. Man xa kixtzaq pa mak roma ri', roma keri' kan man niqa' ta chuwech ri Jehová ri qa-Dios.

²⁶ Roma ri' man jun tik'uaj pan iwachoch ri man niqa' ta chuwech ri Dios, richin chi man yixk'is. Kan tiwetzelaj k'a ronojel re', roma ri Dios rubin kan chi xa nik'is jumul.