Deut 6 - Kaqchiquel Bible

Ri nimalej pixa'

¹ Ja ronojel pixa' re' ri xuya' ri Jehová ri qa-Dios chuwe, richin xixintijoj, richin jari' ri nitaqej chupan ri ruwach'ulew ri xkixapon-wi ri kan xtok iwichin.

² Tinimaj k'a ronojel ri pixa' ri ninbij chiwe rix, chike ri iwalk'ual y ri iwiy-imam richin chi niya' ruq'ij ri Jehová ri qa-Dios, y keri' k'iy k'a juna' xkixk'ase' chuwech re ruwach'ulew.

³ Roma ri' rix nuwinaq israelita tiwak'axaj, y kan tiya' k'a pan iwánima re pixa' re' richin utz xkixbe, y keri' kan xkixwinaqir chupan ri ruwach'ulew ri akuchi nik'ase' ronojel ruwech tiko'n, achi'el rusujun ri Jehová ri qa-Dios, ri chuqa' ki-Dios ri qati't-qamama'.

⁴ Tiwak'axaj k'a rix nuwinaq: Ri Jehová ri qa-Dios kan xaxe rija' ri k'o, y man jun chik achi'el rija'.

⁵ Kan tiwajo' k'a ri Jehová ri qa-Dios rik'in ronojel iwánima y rik'in ronojel ik'u'x, chupan chijun ri ik'aslen.

⁶ Kan tiya' k'a pan iwánima ronojel ri ch'abel ri xinbij chiwe wakami;

⁷ y kan tikamuluj chike ri iwalk'ual y kan ke'itijoj k'a jantape', pa taq iwachoch, pa taq bey, toq yixkotz'e-qa y toq yixyakatej-el.

⁸ Kan tixima' chirij ri iq'a' re ruchojmilal re' y keri' chuqa' tixima-el nik'aj iwech richin jun retal.

⁹ Y kan titz'ibaj k'a chuwech ri che' richin ri ruchi' taq iwachoch.

Ri Moisés nunataj chi kan tinimex rutzij ri Dios

¹⁰ Toq ri Jehová ri qa-Dios, xtuya' ri ruwach'ulew ri rujikiban kan chike ri qati't-qamama' Abraham, ri Isaac y ri Jacob, y ri xujikiba' chi nuya' chiwe jun nimalej ruwach'ulew ri ek'o jebel taq tinamit chupan ri man rix ta ix yakayon-q'anej.

¹¹ Xujikiba' chuqa' chi ri iwachoch nojineq rik'in beyomel ri man rix ta ix samajiyon, y ek'o pozo ri man rix ta ix k'otoyon, ek'o uva y olivo ri man rix ta ix tikiyon. Toq jebel chik ix wayneq

¹² man timestaj k'a ri Jehová ri xixelesan-pe pa ruwach'ulew Egipto, ri akuchi xixxime' pa samaj.

¹³ Kan tiya' k'a ruq'ij ri Jehová ri qa-Dios y kan tisamajij xaxe rija'. Toq rix niya' itzij, tibana' kan xaxe pa rubi' rija'.

¹⁴ Man ke'itzeqelibej ch'aqa' chik dios ri nikiya' kiq'ij ri ch'aqa' chik tinamit ri ek'o-pe chi'inaqaj,

¹⁵ roma ri Jehová ri qa-Dios ri k'o iwik'in rix, kan jun Dios ri kan man jun chik achi'el rija' y kan k'o chi'ikojol. Roma ri' man tiyek royowal, roma wi xtiyek royowal, kan xkixruk'is chuwech re ruwach'ulew.

¹⁶ Y man titejtobej ri Jehová ri qa-Dios, achi'el xiben chire pa Masá.

¹⁷ Titaqej k'a y kan tibana' ronojel ri pixa' ri ruya'on chiqe ri Jehová ri qa-Dios.

¹⁸ Tibana' k'a ronojel pa ruchojmilal chuwech ri Jehová ri qa-Dios y kan utz k'a xkixbe, richin keri' kan ronojel k'a utz xtel chiwech toq xkixok-apo chupan ri ruwach'ulew ri rusujun y rujikiban chi nuya' chike ri qati't-qamama'.

¹⁹ Y keri' xkerelesaj-el chiwech ri e etzelanel iwichin achi'el ri rubin kan.

²⁰ Y toq k'o jun q'ij ri iwalk'ual xtikik'utuj chiwe chi achike nel chi tzij ronojel re pixa' re', ri xubij ri Jehová ri qa-Dios.

²¹ Rix xtibij chike: Roj xojxime' pa samaj kik'in ri aj-Egipto, jak'a ri Jehová xojrelesaj-pe chiri' rik'in ri nimalej ruchuq'a'.

²² Roj xqatz'et ronojel ri nima'q taq rubanobal ri xeruben chiri' pan Egipto, y xuben chike chi xebaybot konojel ri winaqi' y chuqa' ri rey y konojel ri aj pa rachoch.

²³ Jak'a roj xojrelesaj-pe chiri' y xojruk'en-pe chupan re ruwach'ulew ri akuchi xujikiba' kan chike ri qati't-qamama'.

²⁴ Chirij ri' ri Jehová xubij chiqe chi k'o chi niqataqej ronojel ri pixa' ri ya'on chire ri tinamit y kan niqaya' ruq'ij richin keri' utz xqojbiyin. Keri' chuqa' rija' xqojruchajij achi'el rubanon qik'in k'a re q'ij re'.

²⁵ Wi roj niqataqej rik'in ronojel qánima ronojel ri pixa' ri ya'on chiqe, rija' kan xtikikot qik'in, xkixcha' chike.