Deut 4 - Kaqchiquel Bible

Ri Moisés yerupixabaj ri aj-Israel

¹ Wakami k'a rix nuwinaq, tiwak'axaj k'a ronojel ri nubij ri pixa' re nink'ut chiwech. Kan titaqej k'a, richin xtiwichinaj y richin xkixk'ase' chupan ri ruwach'ulew ri xtuya' chiwe ri Jehová, ri ki-Dios chuqa' ri qati't-qamama'.

² Man tiya' ni man tiwelesaj ruwi' ri pixa' ri ninbij chiwe, kan titaqej k'a ri nubij ri Jehová ri qa-Dios re ninya' chiwe wakami.

³ Rix xitz'et ri achike xuben ri Jehová kik'in ri qawinaq ri xkiya' ruq'ij ri Baal chiri' pa juyu' Peor; roma kan konojel ri qawinaq ri xetzeqeliben ri wachibel Baal, kan xeruk'is ri Jehová ri qa-Dios.

⁴ Jak'a chi'iwonojel rix ri kan xitzeqelibej ri Jehová ri qa-Dios, jare' k'a ix k'es na re wakami.

⁵ Yin kan nuk'utun chik chiwech rix nuwinaq ri pixa', kan achi'el ri xubij ri Jehová ri qa-Dios chuwe, richin kan nitaqej ronojel ri pixa' chupan ri ruwach'ulew ri akuchi xkixapon-wi ri kan xtiwichinaj kan.

⁶ Kan tik'oje' chi'ik'u'x y kan tibana', rik'in re' kan xtik'ut chikiwech konojel ri winaqi' chi k'o ina'oj y k'o iwetamabal. Rije' xtikak'axaj k'a ronojel re pixa' re' y xtikibij: Kan qitzij chi re winaqi' re' kan k'o-wi kina'oj y kan jebel niq'ax chikiwech ronojel, kan e jun nimalej ruwach'ulew, xkecha'.

⁷ Roma ¿k'o kami jun tzobaj winaqi' richin jun nimalej ruwach'ulew, ri k'o ta ki-dios chikinaqaj rije', achi'el rubanon ri Jehová ri qa-Dios qik'in roj, ri kan yojruto' toq k'o niqak'utuj chire?

⁸ ¿Akuchi kami nilitej-wi jun nimalej ruwach'ulew ri kan k'o pixa' ri kan e choj achi'el ri ninya' chiwe wakami?

⁹ Roma ri' tichajij k'a iwi', y tik'oje' k'a chi'ik'u'x, richin man nimestaj ta ri xe'itz'et rik'in ri runaq' taq iwech, chuqa' man tel pan iwánima ronojel q'ij chire ri ik'aslen; kan xtik'ut k'a chikiwech ri iwalk'ual y ri kalk'ual rije'.

Ri Jehová Dios xch'on-pe pa ruwi' ri juyu' Horeb

¹⁰ Toqaqa k'a chi'ik'u'x toq xqamol-apo-qi' chuwech ri Jehová ri qa-Dios, chuxe-apo ri juyu' Horeb, toq rija' xubij chuwe: Ke'amolo' k'a ri awinaq, richin chi nikak'axaj ri nuch'abel richin niketamaj nikiya' nuq'ij chijun ri kik'aslen chuwech re ruwach'ulew, y xtikik'ut chikiwech ri kalk'ual, xcha' chuwe.

¹¹ Rix kan xixjel k'a apo y xojk'oje' chiri' chuxe' ri juyu' ri'; y ri juyu' nibiron k'a pa q'aq', y ri ruxaq q'aq' kan nej k'a napon-wi-el, ri rusibil ri q'aq' ri' kan achi'el sutz' xuben, y xuq'equmarisaj ri juyu'.

¹² K'ari' ri Jehová xch'on-pe qik'in pa runik'ajal ri q'aq'; kan xqak'axaj k'a ri ruch'abel, xaxe man xqatz'et ta ri achike rubanik.

¹³ Rija' kan xuq'alajirisaj chiqe ri rujikibel-tzij ri lajuj pixa' y xubij chi man tiqamestaj niqaben; y xutz'ibaj kan chuwech ka'i' tz'alem taq abej.

¹⁴ Y ri Jehová kan xubij k'a chuwe yin chupan ri q'ij ri' chi kan nink'ut chiwech ri pixa' y ri ruchojmilal ri kan k'o chi niben chupan ri ruwach'ulew ri akuchi xkixapon-wi, ri xtiwichinaj kan.

Ri pixabanik richin man tiya'ox kiq'ij ch'aqa' chik dios

¹⁵ Toq ri Jehová xch'on qik'in pa runik'ajal ri q'aq' ri chiri' pan Horeb, stape' man xqatz'et ta ri achike rubanik, man rik'in ri' kan tichajij jebel iwi',

¹⁶ richin chi man yixyojtej y ye'ibanala-q'anej paban taq wachibel, ruwachibel jun achin, jun ixoq o jun chik wachibel.

¹⁷ Man ye'ibanala' ruwachibel jun chike ri chikopi' ri yebiyin chuwech re ruwach'ulew, o ruwachibel jun aj-xik' chikop,

¹⁸ o ruwachibel jun chikop ri nuqirirej-ri' pa ruwi' ri ulew, o ruwachibel jun ker o jun chikop richin ya'.

¹⁹ Y chuqa' toq yixtzu'un-q'anej chikaj y nitz'et ri q'ij, ri ik', ri ch'umila' y ronojel ri ek'o chikaj, man tipe pan iwánima richin niya' kiq'ij y kan yixok kisamajel. Roma ri Jehová Dios ruya'on ronojel re' kichin konojel ri winaqi' ri ek'o chuwech re ruwach'ulew.

²⁰ Jak'a ri Jehová xelesan-pe qichin pan Egipto akuchi xqatej-wi janila poqon, achi'el xa ta xojk'oje' pa jun horno, richin chi xojok rutinamit rija', achi'el re wakami.

²¹ Ri Jehová kan xyakatej k'a royowal chuwij yin iwoma rix, y xujikiba' rutzij chi yin man xkiq'ax ta apo juk'an chire ri raqen-ya' Jordán, ni man xkinok ta apo chupan ri utzilej ruwach'ulew ri rusujun ri Jehová Dios chiwe richin chi niwichinaj kan rix.

²² Yin xa xkiken k'a kan chupan re ruwach'ulew re' akuchi re ojk'o-wi, y man xtinq'axaj ta apo ri raqen-ya' Jordán. Jak'a rix kan xtiq'axaj-apo ri raqen-ya' y xtiwichinaj k'a ri utzilej ruwach'ulew ri'.

²³ Xaxe k'a ninchilabej chiwe chi man timestaj ri jikibel-tzij ri xuben ri Jehová ri qa-Dios qik'in roj. Man jun wachibel ri tipaba-q'anej, ni man jun chuqa' ruwachibel ri xabachike xke'ipaba-q'anej, roma ri Jehová ri qa-Dios rubin chi man tiban.

²⁴ Ri Jehová ri qa-Dios kan man niqa' ta chuwech chi k'o ta jun chik niya' ruq'ij, roma ri royowal rija' achi'el q'aq' ri nuk'is ronojel.

²⁵ Toq rix ek'o chik iwalk'ual, iwiy-imam y xixrijix yan chupan ri ruwach'ulew ri', man ke'ibanala-q'anej wachibel e paban o xabachike wachibel ri man niqa' ta chuwech ri qa-Dios richin man niyek royowal.

²⁶ Roma ri' kan chikiwech k'a ri kaj y ri ruwach'ulew ninbij, wi keri' xtiben, kan xkixken. Man k'iy ta k'a q'ij xkixk'ase' chiri' y xa kan xkixk'is k'a el.

²⁷ Ri Jehová yixberutaluj chikikojol ri winaqi' richin ri ch'aqa' chik ruwach'ulew y xa juba' ok chiwe rix ri xkek'ase' kan chikikojol ri tzobaj winaqi' ri'.

²⁸ Y chiri' k'a nibeya' kiq'ij wachibel ri e banon koma achi'a', wachibel ri e banon rik'in che', y chuqa' ri e banon rik'in abej. Ri man yetzu'un ta, ri man ye'ak'ex ta, ri man yewa' ta y chuqa' ri man yeseqon ta.

²⁹ Jak'a wi rix kan nikanoj ri Jehová ri qa-Dios rik'in ronojel ri iwánima y rik'in ronojel ik'u'x, kan xtiwil.

³⁰ Toq xkixk'oje' pa bis y toq xtipe pan iwi' ronojel re', y wi ri pa taq ruk'isibel q'ij xtitzolej-pe ik'u'x rik'in ri Jehová ri qa-Dios y kan xtiben ri nrajo' rija';

³¹ man xkixrumalij ta kan, ni man xkixruk'is ta el chuwech re ruwach'ulew, ni chuqa' man xtumestaj ta ri jikibel-tzij ri xuben kik'in ri qati't-qamama', roma rija' kan jun Dios joyowanel.

³² Tik'utuj k'a chirij ri ojer kan, kan k'a ja toq ri Dios xutz'uk-pe ri achin chuwech re ruwach'ulew. Kixbiyin k'a, k'a pa rutikeribel y k'a pa ruk'isibel chire ri ruwach'ulew richin nik'utuj wi k'o jun bey k'uluwachitajineq re nimalej banobel re'.

³³ Kan man jun k'a tinamit rak'axan ta ri ruch'abel ri Dios ri nich'on-pe pa runik'ajal jun nimalej q'aq', achi'el ri xqak'axaj roj; y man xojken ta.

³⁴ Kan man jun chik k'a dios ri nuben achi'el xuben ri qa-Dios roj, ri xojrucha' chikikojol ri ch'aqa' chik nimalej tzobaj winaqi' achi'el xuben qik'in roj richin xojrelesaj-pe pan Egipto, ri kan rik'in k'iy tejtobenik, rik'in nima'q taq retal, rik'in nima'q taq banobel, rik'in labal y rik'in nimalej uchuq'a'. Rik'in k'a ronojel banobel re' ri kan xe'itz'et rik'in ri runaq' taq iwech, xojrelesaj-wi-pe,

³⁵ ronojel re' xuk'ut chiqawech richin niqetamaj chi ri Jehová kan jari' ri Dios y kan man jun chik achi'el rija'.

³⁶ Ri Dios xch'on-pe qik'in chila' chikaj richin xojrupixabaj, y re wawe' chuwech re ruwach'ulew xuk'ut jun nimalej q'aq' y chupan ri' xch'on-pe qik'in.

³⁷ Rija' xerajo' ri qati't-qamama' y roma ri' xojrucha' roj y rik'in ri ruchuq'a' xojrukol pa ruq'a' ri Egipto.

³⁸ Chuqa' xerelesaj-el ri nima'q taq tzobaj winaqi' etzelanel qichin ri más kuchuq'a' chiqawech roj, richin yixbek'oje' chuwech ri kiruwach'ulew rije' achi'el ri nibanatej wakami.

³⁹ Roma ri' tiwetamaj y tik'oje' chi'ik'u'x chi ri Jehová kan ja rija' ri rajaw ri kaj y ri ruwach'ulew, y kan man jun chik achi'el rija'.

⁴⁰ Roma ri' kan titaqej k'a ri rupixa' ri ninya' chiwe wakami, richin chi utz yixk'ase' rix y ri iwijatzul; y kan xkixk'ase' k'iy juna' chuwech ri ruwach'ulew ri xtuya' chiwe ri Jehová ri qa-Dios richin jantape', xcha' ri Moisés.

Jujun tinamit ri akuchi nikito-wi-ki' ri kamisanela'

⁴¹ Ri Moisés xucha' oxi' tinamit ri ek'o pa relebel-q'ij chire ri raqen-ya' Jordán

⁴² richin chiri' niberuto-wi-ri' jun wineq ri chaq k'ate' xukamisaj kan jun wineq ri man jun etzelanik k'o chikikojol; y chupan k'a jun chike ri tinamit ri' xtuto-wi-ri' richin nikolotej.

⁴³ Richin ri rutzobaj kan ri Rubén, k'o ri tinamit Béser ri k'o pa taq'aj richin ri tz'iran ruwach'ulew. Richin ri rutzobaj kan ri Gad, k'o ri Ramot pa Galaad. Y richin ri nik'aj tzobaj richin ri Manasés k'o ri Golán pa Basán.

Ri Moisés nunataj chik jun bey ronojel ri pixa'

⁴⁴ Jare' k'a ri jalajoj ruwech pixa', ri xuya' ri Moisés chike ri ruwinaq:

⁴⁵ Ri pixa' richin ruchojmilal, ri pixa' ri ya'on chire ri tinamit, ri pixa' ri richin re q'ij re', y ri xubij ri Moisés chike ri israelita toq xe'el-pe pan Egipto.

⁴⁶ Re' xubij toq rije' k'a ek'o na chiri' pa relebel-q'ij chire ri raqen-ya' Jordán, pa taq'aj ri k'o chuwech-apo ri tinamit Bet-peor, pa ruwach'ulew kan ri rey Sihón, rey kichin ri amorreo. Rija' xk'oje' pa tinamit Hesbón, y jare' k'a xekich'ek ri Moisés y ri ruwinaq.

⁴⁷ Keri' xok k'a kan kichin ri israelita ri kiruwach'ulew kan ri rey Sihón, y ri Og, rey richin ri Basán.

⁴⁸ Re ruwach'ulew re' nitiker-el pa tinamit Aroer ri k'o chuchi' ri raqen-ya' Arnón, y napon k'a pa xaman rik'in ri juyu' Sirión ri nibix chuqa' Hermón chire;

⁴⁹ y chupan ri ruwach'ulew ri' k'o ri taq'aj Arabá ri napon k'a pa xokon chuchi' ri Tzayi-Choy y napon k'a pa relebel-q'ij chire ri juyu' Pisgá.