Deut 34 - Kaqchiquel Bible

Ri rukamibal ri Moisés

¹ Chirij ri' ri Moisés xel k'a el chiri' pa taq'aj richin ri Moab y xjote-el pa ruwi' jun chike ri juyu' Pisgá y xapon pa ruwi' ri juyu' Nebo, ri k'o chuwech-apo ri Jericó. Chiri' ri Jehová xuk'ut chuwech chijun ri ruwach'ulew Canaán, ri nitiker-el pa Galaad y napon k'a pa Dan.

² Y xuk'ut chijun ruwach'ulew richin ri Neftalí y ri ruwach'ulew richin ri Efraín y richin ri Manasés, chijun ruwach'ulew richin ri Judá napon k'a rik'in ri palou ri k'o pa qajbel-q'ij.

³ Chuqa' xutz'et ri ruwach'ulew ri k'o pa xokon k'a pa Sóar y ri taq'aj ri k'o chuchi' ri raqen-ya' Jordán k'a pa Jericó, ri nibix tinamit richin Palma chire.

⁴ Y ri Jehová xubij: Jare' ri ruwach'ulew ri xinsuj chike ri Abraham, ri Isaac y ri Jacob toq xinbij chi chike ri kijatzul xtinya-wi. Yin xinya' q'ij chawe richin natz'et re ruwach'ulew re', jak'a rat xa man xkatok ta chupan, xcha'.

⁵ Y keri' ri Moisés, ri rusamajel ri Jehová, xken pa ruwach'ulew Moab, kan achi'el rubin ri Jehová chire.

⁶ Y ri Jehová xumuq k'a pa jun taq'aj ri k'o-apo chuwech ri tinamit Bet-peor. Jak'a man jun etamayon akuchi xmuq-wi kan k'a re q'ij re'.

⁷ Y toq xken k'a ri Moisés k'o 120 rujuna', y kan k'a jebel na nitzu'un y kan k'a kow na toq xken.

⁸ Ri israelita xkoq'ej k'a ri Moisés juwineq lajuj q'ij pa taq'aj richin Moab.

⁹ Y chirij re' ri Josué kan xuk'ul ri espíritu richin na'oj, roma ri Moisés kan ruya'on kan ri ruq'a' pa ruwi'. Keri' ri israelita kan xkinimaj rutzij y xkitaqej ronojel ri rubin kan ri Jehová chire ri Moisés.

¹⁰ Kan man jun bey chik k'a xk'oje' jun q'alajirisey ruch'abel ri Dios chikikojol ri israelita achi'el ri Moisés ri achoq ik'in xch'on-wi ri Jehová naqaj y kan xtzijon rik'in.

¹¹ Ri Dios xuteq richin xuben ronojel ruwech nima'q taq banobel richin retal pan Egipto chuwech ri rey y ri rusamajela' y chuwech chijun ri ruwach'ulew. Y kan man jun chik k'a wineq xk'oje' achi'el ri Moisés,

¹² ni man jun nijunamex ta rik'in roma ri uchuq'a' ri xk'oje' rik'in, y ri nima'q taq banobel ri kan nak'en rukiy ri xuben chuwech chijun ruwach'ulew Israel.