Deut 25 - Kaqchiquel Bible

¹ Toq k'o jun oyowal chikikojol e ka'i' achi'a', k'o chi ye'uk'uex chuwech ri q'atbel-tzij, richin niq'at-tzij pa kiwi'. Y ri to'onela' nikiq'alajirisaj ri achike ri aj-mak y nikiya' ri rutojbalil pa ruwi'.

² Wi ri xmakun ruk'amon richin nijich', ri to'onel nuben chire chi nijupe-qa pan ulew, y k'ari' nijich', janipe' k'a ri rumak jari' ri jich' niya'ox chire.

³ Jak'a man tiq'ax ruwi' chire kawineq jich', roma wi niya'ox más chire ri iwinaq, rija' xtuna' chi man jun rejqalen.

⁴ Man tiya' ru-bosal ri bóyix toq nuch'ey trigo.

Pixa' pa ruwi' ri achin ri nik'ule' rik'in rixnan

⁵ Wi ka'i' achi'a' kach'alal-ki' ek'o junan pa jun xoral, y wi k'o ta jun niken-el chike y maneq kan ralk'ual, ri ixoq malka'n ri' kan tik'ule' rik'in ri rechan richin man nik'is ta qa ri rijatzul ri q'asen rachijil.

⁶ Y ri nabey ralk'ual ri achin ri xtalex rik'in ri rixnan, kan achi'el ralk'ual ri rach'alal ri xken-el.

⁷ Y wi ri achin man nrajo' ta nik'ule' rik'in ri rixnan, k'ari' ri rixnan nibe rik'in ri q'atbel-tzij y xtubij chike ri achi'a' ri k'o kiq'ij, chi ri rechan man nrajo' ta nuya' rijatzul pa rubi' ri ánima rach'alal. Roma ri' man nrajo' ta richin nik'ule' rik'in rija'.

⁸ K'ari' ri achi'a' ri k'o kiq'ij richin ri tinamit ri' xtikiteq royoxik ri achin ri' y xkech'on rik'in, y wi rija' man nrajo' ta nik'ule' rik'in ri rixnan,

⁹ ri ixoq xtijel-apo rik'in ri rechan chikiwech ri achi'a' ri k'o kiq'ij. Y chikiwech rije' chiri' chuchi' ri tinamit xtrelesaj jun ruxajab chiraqen ri rechan y xtuchubaj rupalej, y xtubij: Kere' xtiban chire ri achin ri man nrajo' ta richin nik'oje' rijatzul ri ánima rach'alal chuwech ri ruwach'ulew, xticha'.

¹⁰ Kan chupan k'a ri q'ij ri' ri winaqi' xtikibij chike chi rija' y ri e aj pa rachoch xelesex kixajab.

Ch'aqa' chik pixa'

¹¹ Wi ek'o ta e ka'i' achi'a' yech'ayon-ki' y wi napon ta ri rixjayil jun chike rije' richin nukol ri rachijil pa ruq'a' ri nich'ayon richin y wi ta nuchop ri rukowil ri jun chik achin, richin man nich'ay ta chik ri rachijil.

¹² Wi keri', rix man tijoyowaj ruwech ri ixoq, xa kan titzak'ix ri ruq'a', roma xuben keri'.

¹³ Toq yixloq'on o yixk'ayin man tik'uaj ka'i' ruwech etabel iwik'in, jun ri k'a k'o nrajo' y jun ri nik'o ruwi'.

¹⁴ Keri' chuqa' pan iwachoch man tik'oje' jalajoj ruwech etabel; tz'aqet o man e tz'aqet ta.

¹⁵ Xa kan xaxe etabel ri e tz'aqet ri ye'ikusaj richin keri' kan xtiyaloj ri ik'aslen chuwech ri ruwach'ulew ri xtuya' ri Jehová ri qa-Dios chiwe.

¹⁶ Roma ri Jehová ri qa-Dios kan itzel nutz'et ri achike nibanon keri'.

Ri ruchojmilal pa kiwi' ri aj-Amalec

¹⁷ Toqaqa k'a chi'ik'u'x ri achike xkiben chiqe ri e rijatzul ri Amalec pa bey toq k'a juba' qojel-pe pan Egipto.

¹⁸ Chi rije' man xkixibij ta ki' chuwech ri Dios. Rije' xojkichop chi oyowal toq janila oj kosinaqi' chik y maneq chik quchuq'a', y ja ri ek'o kan chiqij ri xekichop nabey.

¹⁹ Roma ri' toq ri Jehová ri qa-Dios xtuya' uxlanen chiwe pa kiq'a' ri e etzelanel qichin ri ek'o chupan ri ruwach'ulew ri xtuya' chiwe richin xtiwichinaj kan, jari' toq xtiyoj jumul ri rubi' ri Amalec chuwech ri ruwach'ulew. Man k'a timestaj chi k'o chi keri' niben.