Deut 24 - Kaqchiquel Bible

Ri pixa' chirij ri ch'arojri'il richin ri e k'ulan taq winaqi'

¹ Wi jun achin nik'ule' rik'in jun ixoq y chaq k'ate' man nrajo' ta chik, roma k'o jun ri man utz ta xutz'et chire, jari' toq nuben jun wuj richin jachojri'il y nuya-el chire ri ixoq y xtrelesaj-el pa rachoch.

² Y wi ri ixoq nik'ule' chik rik'in jun achin, kan utz tik'ule';

³ jak'a wi ri ruka'n rachijil niken o napon jun q'ij man utz ta chik nutz'et y nujech-ri' rik'in y nuya' jun wuj richin ch'arojri'il chire y nrelesaj-el pa rachoch,

⁴ ri nabey rachijil man ruk'amon ta chik nik'ule' rik'in, roma maneq chik ch'ajch'ojil rik'in ri ixoq; re kere' kan nrixowaj ri Jehová, roma ri' rix kan man tiben re etzelal re' chupan ri ruwach'ulew ri xtuya' ri Jehová ri qa-Dios chiwe richin xtiwichinaj kan.

Jalajoj ruwech pixa'

⁵ Ri jun achin ri k'a juba' tik'ule', man xtitaq ta el pa labal, ni man xtiya'ox ta chik jun samaj chire; kan xtik'oje' pa rachoch jun juna' richin keri' nuya' kikoten chire ri rixjayil ri k'a juba' tik'ule' rik'in.

⁶ Wi k'o jun wineq k'o nuqej iwik'in man tik'utuj kan ri ruka' o ri ruq'a' ruka' chire richin jun retal chi nutzolij ri ruk'as chiwe, roma re' xa kan achi'el ja ta ri ruk'aslen ri nik'utuj kan.

⁷ Wi jun wineq nilitej chi releq'an-el jun ruwinaq richin nibe'ok rusamajel o richin nuk'ayij-el, ri nibanon keri' kan xtikamisex, richin nik'is-el ri etzelal chi'ikojol rix.

⁸ Rik'in juba' nipe ta chiwij jun itzel laj yabil ri nutaluj-ri' kan titaqej k'a ronojel ri nikibij ri e sacerdote levita chiwe ri nubin yin chike.

⁹ Toqaqa k'a chi'ik'u'x ri xuben ri Jehová ri qa-Dios chire ri María, toq e peteneq pa bey toq k'a juba' qojel-pe pan Egipto.

¹⁰ Wi k'o niya' pa qajik chire jun iwachpochel utz nik'utuj jun retal richin qajbel richin, jak'a man kixok pa rachoch richin nibek'ama-pe ri nuya-pe chiwe.

¹¹ Xa kan kixk'oje' kan chuwa-jay y tiwoyobej ri achike xtuya-el rija' chiwe richin qajbel richin ri ruqajo'n ri rubanon iwik'in.

¹² Y wi ri nibanon qajo'n iwik'in xa kan man jun k'o rik'in, xaxe ri ruq'u' ri k'o rik'in y jari' ri xuya-el chiwe, man tik'oje-qa iwik'in jun aq'a' ri k'ul ri'.

¹³ K'o chi nitzolij-el chire toq niqaqa yan qa ri q'ij, richin keri' k'o nuq'uj-qa toq niwer-qa. Keri' rija' xtroyoj urtisanik pan iwi' y kan xtiben jun utzilej banobel chuwech ri Jehová ri qa-Dios.

¹⁴ Man tikamisaj pa samaj ri samajel ri nisamej chi q'ij iwik'in, ni man tiyek-qa ri xuch'ek yan, stape' iwinaq o man iwinaq ta.

¹⁵ Toq nuk'is ri q'ij, kan jari' titojo-el chire, y man tiben chi nik'is-qa ri q'ij y man niya' ta chire ri xuch'ek, roma rija' xa man jun k'o rik'in y xaxe rik'in ri' nuq'axibej-wi-ri'. Richin keri' man nisujun ta chuwech ri Jehová ri qa-Dios chiwij y man yixqaqa ta pa mak rix.

¹⁶ Ri te'ej-tata'aj man yekamisex ta roma kimak ri alk'ualaxela', y ni ta ri alk'ualaxela' man yeken ta roma ri kimak ri kite-kitata', xa kan chikijujunal k'o chi yekamisex roma ri kimak.

¹⁷ Kan tibana' pa ruchojmilal kik'in ri man e iwinaq ta y ri meba'i'. Y chuqa' man tik'utuj jun rutziaq ri malka'n richin qajbel richin ri ruk'as.

¹⁸ Man k'a timestaj chi rix chuqa' xixxime' pa samaj pan Egipto, y ri Jehová ri qa-Dios xixelesan-pe chiri'. Roma ri' ninbij chiwe richin kan titaqej ronojel re'.

¹⁹ Toq xtapon ri q'ij richin q'atoj trigo chupan ri iwulew, wi rix nimestaj kan jun q'etaj trigo, man kixtzolin chik richin nibek'ama-pe. Re' xa kan tik'oje' kan richin nikik'uaj ri man e iwinaq ta ri ek'o chi'ikojol o jun meba' o jun malka'n, richin keri' ri Jehová ri qa-Dios kan xtuya' urtisanik pa ruwi' ronojel ri xtiben.

²⁰ Y toq xtapon ri q'ij richin niyikikej ri ruche'el ri olivo man tikamuluj rubanik, ri yek'oje' kan xa kan xtok kan kichin rije'.

²¹ Keri' chuqa' toq nik'ol ri uva, man tinik'oj chukojol ri ruxaq wi k'o nik'oje' kan, kan tiya' kan kichin rije'.

²² Toqaqa k'a chi'ik'u'x chi rix chuqa' kan man jun xk'oje' iwik'in toq xixk'oje' pan Egipto; roma ri' yin nibij chiwe chi titaqej ronojel re'.