Deut 22 - Kaqchiquel Bible

¹ Wi k'o ta jun chiwe rix nutz'et chi sachineq jun bóyix o jun karne'l richin jun ruwinaq, man tuben chi man retaman ta, xa kan tutzolij-el chire.

² Jak'a wi ri rajaw xa man chunaqaj ta rachoch k'o-wi y man retaman ta ruwech, tuk'uaj-el ri ti chikop pa rachoch y tik'oje' rik'in, k'a toq xtibek'utux na rik'in k'ari' nuya-el chire.

³ Y keri' chuqa' niben rik'in ri bur, o rik'in jun tzieq o xabachike ri sachineq pa bey y jun chiwe rix nilon; toq nikanox man tuben chi man rutz'eton ta.

⁴ Wi k'o ta jun nutz'et kan pa bey chi tzaqineq ri rubur o rubóyix ri rach'alal, man tuben chi man nutz'et ta kan, xa kan tuto' kan chusik'ik ri ti chikop.

⁵ Ri ixoq man tukusaj rutziaq ri achin richin nuben achi'el achin, y ri achin man tukusaj rutziaq ri ixoq richin nuben achi'el ixoq, roma ri banobel ri' kan itzel nutz'et ri Jehová ri qa-Dios.

⁶ Wi k'o ta jun nril jun ti sokaj richin jun ti aj-xik' chikop pa ruwi' jun che', o pan ulew rik'in taq saqmolo' o taq alaji' y ri te'ej jupul pa ruwi', man tuk'uaj-el ri te'ej; y xaxe utz nuk'uaj ri taq alaji' o ri taq saqmolo'.

⁷ Ri te'ej k'o chi nrisq'opej kan, richin keri' kan utz xkixbe, y k'iy juna' xkixk'ase' chuwech ri ruwach'ulew.

⁸ Toq k'o jun chiwe rix nupaba-q'anej jun rachoch y taq'aj ruwi' nuben chire, k'o chi nuben jun tz'aq chirij chi jun ri ruchi' ri ruwi' ri jay, richin keri' wi k'o ta jun nitzaq-pe y niken, ri rajaw man jun rumak.

⁹ Man titik jalajoj ruwech ija'tz pan iqejoj ri akuchi nitik-wi ri uva, roma wi jalajoj ruwech ija'tz ri nitik-qa k'o chi nich'er jun chire ri lajuj chire ronojel ri nel chuwech ri ulew ri'.

¹⁰ Man tisamajij ri ulew rik'in jun bóyix rachibilan-el jun bur.

¹¹ Toq nikem itziaq man tikusaj juba' lana y juba' betz' lino chire.

¹² Tibana' taq retz'aba'l chi kaji' ruchi' ri itziaq ri achi'el taq k'olok'eq kibanik.

Ri mak chirij ri k'ulubik

¹³ Wi jun ala' nik'ule' rik'in jun xten, y toq xk'oje' yan rik'in, xa man nrajo' ta chik,

¹⁴ rik'in juba' nich'on itzel chirij, y nubij: Yin xik'ule' rik'in re xten re' y toq xik'oje' rik'in, xinwetamaj chi xa man xten ta chik, xticha'.

¹⁵ K'ari' ri te'ej-tata'aj richin ri ixoq ri', nikik'en k'a pe ri retal chi ri kimi'al k'a xten na, y re retal re' nikijech chupan ri q'atbel-tzij chikiwech ri achi'a' ri k'o kiq'ij.

¹⁶ Y ri rutata' xtubij chike ri achi'a' ri': Yin xinjech ri numi'al chire re jun ala' re' richin xk'ule' rik'in; y wakami xa man nrajo' ta chik.

¹⁷ Y roma ri' rija' nich'on itzel chirij ri numi'al y nubij chi toq xk'oje' rik'in xa man xten ta chik. Wakami k'a titz'eta' re retal re ninya-apo chiwe chi ri numi'al k'a xten na, xticha'. Y k'ari' xtikirik'-apo ri tzieq richin retal chikiwech ri achi'a' ri k'o kiq'ij richin ri tinamit.

¹⁸ Y ri achi'a' ri' xtikichop k'a ri achin ri' y xtikiya' ri rutojbalil ri rumak;

¹⁹ y xtikiben chire chi xtuya' ka'i' libra rik'in nik'aj saqipueq, y re' xtuya' chire ri rujinan, roma xch'on itzel chirij jun xten chiri' pan Israel. Y chuqa' re achin re' kan jantape' k'a xtik'oje' ri rixjayil rik'in y man xtujech ta k'a ri' rik'in chijun ruk'aslen.

²⁰ Jak'a wi nibek'ulun-pe chi qitzij xa man xten ta chik,

²¹ k'ari' xtelesex-el chuchi' ri rachoch ri rutata' y ri achi'a' richin ri tinamit ri' xtikikamisaj chi abej, roma kan janila nim ri itzel xuben pan Israel, roma xk'oje' yan achin rik'in toq k'a k'o na pa rachoch ri rutata'. Y keri' xtelesex ri etzelal chi'ikojol rix.

²² Wi k'o ta jun achin nilitej kotz'ol rik'in jun ixoq ri k'ulan chik y k'o rachijil, kan chi e ka'i' xkekamisex; keri' xtik'is ri etzelal chikikojol ri qawinaq.

²³ Wi jun xten k'utun chik roma jun ala' y wi k'o ta chik jun achin nuk'ul pa tinamit y nik'oje' rik'in;

²⁴ jari' xke'uk'uex-el chi e ka'i' chuchi' ri tinamit akuchi xkek'aq chi abej y xkeken chi e ka'i'; ri xten roma man xuraqaqej ta ruchi' richin ta xto'ox, y ri achin roma xuqasaj ruq'ij ri xten ri xok ta rixjayil ri rachpochel; keri' xtik'is-el re etzelal re' chi'ikojol rix.

²⁵ Jak'a wi jun achin nril pa juyu' jun xten ri k'utun chik y nuben chire richin nik'oje' rik'in, xaxe k'a ri achin ri nikamisex.

²⁶ Jak'a ri xten man jun niban chire, roma rija' kan maneq rumak richin nikamisex, roma re' achi'el jun wineq ri niyakatej chirij jun rach'alal y nukamisaj,

²⁷ roma ri achin ri' xril ri xten pa juyu'. Stape' xuraqaqej ta ruchi' ri xten, man ta jun xkolon richin pa ruq'a' ri achin.

²⁸ Toq jun achin nril jun xten ri man k'utun ta roma jun ala' y nik'oje' rik'in y ye'ilitej;

²⁹ ri achin ri xk'oje' rik'in ri xten, xtuya' más juba' jun libra saqipueq chire ri rutata' ri xten. Y ri xten ri' xtok rixjayil ri achin ri' roma xuqasaj ruq'ij; y kan man xtujech ta k'a ri' rik'in chijun ruk'aslen.

³⁰ Jun achin man ruk'amon ta nik'oje' rik'in ri rixjayil ri rutata', roma wi k'o jun nibanon keri', nuqasaj ruq'ij ri rutata'.