Deut 21 - Kaqchiquel Bible

Toq k'o jun nikamisex y man jun netaman ri achike xbanon

¹ Wi chupan ri ruwach'ulew ri xtiberuya' ri Jehová ri qa-Dios chiwe, nilitej ta jun wineq kamisan kan y rik'il kan pa juyu' y man netamex ta ri achike xkamisan kan,

² jari' toq ri achi'a' ri k'o más kiq'ij y ri to'onela', ri ek'o chunaqaj ri akuchi xilitej-wi ri kamineq k'o chi nikimol-ki'. Rije' k'o chi nikitz'et ri achike tinamit ri k'o más naqaj chire ri kamineq.

³ Y ri achi'a' ri k'o kiq'ij richin ri tinamit ri' y e kachibilan ri sacerdote, nikikanoj jun ti alaj ixoq wákix ri man jun bey samajineq rik'in che' chirij ruwi'.

⁴ K'ari' rije' nikik'uaj-qa ri ti wákix pa jun toxk'on kojol juyu' ri man jun bey samajin y qasan ta ruwech, y chunaqaj ri raqen-ya', chiri' nikiq'ej-wi ri ruqul ri ti wákix ri'.

⁵ Ri sacerdote ek'o chiri' richin nikitz'et ronojel, roma ja rije' ri e rucha'on kan ri Jehová ri qa-Dios, richin nikisamajij y richin nikiya' urtisanik pa rubi' rija' y ja ri kich'abel rije' ri nibanatej, pa ruwi' ronojel oyowal o ch'ojinik.

⁶ Y konojel k'a ri achi'a' ri k'o kiq'ij, nikich'ej kiq'a' chirij ri ti wákix ri xkiq'ej ruqul chiri' kojol juyu',

⁷ y xtikibij: Jehová; roj man jun kamik qabanon y man xqatz'et ta ri achike ri xkamisan re wineq re'.

⁸ Takuyu' k'a qamak roj ri oj atinamit ri xawelesaj-pe pa tijoj-poqonal, y man taya' chirij re tinamit re', xkecha'. Y keri' xtikuyutej re mak re', roma xkamisex jun wineq.

⁹ Roma ri' toq k'o jun ri maneq rumak niken chi'ikojol rix, kan xtiwelesaj chiwij ri mak ri niwejqalej, toq xtiben re ruchojmilal re' chuwech ri Jehová.

Ri pixa' pa kiwi' ri ixoqi' ri e chapon-pe pa labal

¹⁰ Toq xtibebana' oyowal kik'in ri e etzelanel iwichin, ri Jehová ri qa-Dios xkerujech pan iq'a', richin yek'oje' pa ximonri'il iwik'in.

¹¹ Y wi k'o jun chiwe rix nutz'et chikikojol rije' chi k'o ta jun ixoq janila jebel ok, y kan nrajo' richin nok rixjayil,

¹² k'o chi nuk'en-pe pa rachoch y xtisokex ri rusumal-ruwi' y xtiqupix ri rixk'eq.

¹³ Y tujala' ri rutziaq ri rukusan-el toq xech'akatej pa labal y tik'oje-qa pa rachoch. Y kan niya'ox q'ij chire richin nibison jun ik' koma ri rute-rutata'. K'ari' ri achin ri' utz nik'oje' rik'in richin nok-qa rixjayil.

¹⁴ Y wi k'o ta jun q'ij toq xa man utz ta chik nutz'et y man nrajo' ta chik, xtuya-el q'ij chire richin nibe, jak'a man tuk'ayij-el y ni man tuben chire achi'el jun loq'on samajel, roma xa xuqasaj yan ruq'ij.

Ruchojmilal pa ruwi' ri nabey alk'ualaxel

¹⁵ Wi k'o jun achin ri ek'o ka'i' rixjayil, ri jun janila nrajo', y ri jun man kan ta nrajo', y kik'in re chi e ka'i' ixoqi' re' xk'oje' ralk'ual. Y ri nabey ruk'ajol xalex rik'in ri rixjayil ri man kan ta nrajo'.

¹⁶ Toq napon ri q'ij richin nuch'er ri beyomel pa kiq'a' ri ralk'ual, man ruk'amon ta nuben nimalaxel chire ri ral ri ixjayilonel ri janila najowex y chire rija' nuya-wi kan más k'iy, y nuben chire ri nimalaxel chi maneq rejqalen.

¹⁷ Kan k'o chi niya'ox chire ri nabey ak'ual jun chik pa ruwi' chire ri ulew ri niya'ox chike ri ch'aqa' chik; roma ja rija' ri nabey ak'ual xk'oje' toq k'a janila ruchuq'a' k'o ri tata'aj. Kan chire rija' k'o chi niya'ox-wi roma ja rija' ri nimalaxel.

Pixabanik pa kiwi' ri alk'ualaxela' ri man e nimey ta tzij

¹⁸ Wi k'o ta jun chike ri iwalk'ual ri man nunimaj ta tzij y man niniman ta chike ri rute-rutata'; stape' nich'ay man niniman ta tzij,

¹⁹ ri te'ej-tata'aj k'o chi nikichirirej-el ri kalk'ual chikiwech ri achi'a' ri k'o kiq'ij chiri' chuchi' ri tinamit.

²⁰ Y xtikibij k'a chike: Re jun qalk'ual re' man niniman ta chiqe y kan man juba' nichojmir ri runa'oj. Chuqa' xaxe nibe pa taq nimaq'ij y janila niq'aber, xkecha'.

²¹ Jari' toq ri winaqi' richin ri tinamit nikikamisaj chi abej ri alk'ualaxel ri' y keri' nik'is-el ri etzelal ri k'o pan iruwach'ulew. Y toq xtikak'axaj k'a konojel ri qawinaq, xtikik'en rukiy.

Jalajoj ruwech pixa'

²² Y wi k'o ta jun nimakun ri kan ruk'amon richin nikamisex y nitzeqebex chuwech jun che',

²³ ri ruch'akul man tik'oje' kan chiri' chijun aq'a'. Xa kan timuq kan chupan ri q'ij ri', roma chuwech ri Dios kan itzel ruwa-ruq'ij ri nitzeqebex chuwech jun che' y nik'oje' kan jun aq'a' chiri'. Wi keri' xtiben, kan man xtitz'ilobisaj ta k'a ri ruwach'ulew ri xtuya' ri Jehová ri qa-Dios chiwe, richin niwichinaj.