Deut 20 - Kaqchiquel Bible

Pixa' pa ruwi' jun labal

¹ Toq rix xkixbe pa labal kik'in ri etzelanel iwichin, y kan xke'itz'et chi ek'o janila kikiej y ki-carruaje e richin labal y kan janila e k'iy ri aj-labal más ke chiwech rix, man tixibij-iwi' chikiwech, roma rix man iyon ta ixk'o, kan k'o ri Jehová ri qa-Dios iwik'in, ri xojelesan-pe pan Egipto.

² Toq xtichapatej ri labal, jari' toq ri sacerdote xtipa'e' chikiwech ri aj-labal,

³ y xtubij chike: Tiwak'axaj rix qawinaq; wakami xtibechapa' oyowal kik'in ri e etzelanel qichin, man timayamo-qa ri iwánima y man tixibij-iwi', y man kixbaybot chikiwech.

⁴ Roma ri Jehová ri qa-Dios ri k'o iwik'in rix, ja rija' ri xtibebanon oyowal kik'in ri e etzelanel qichin y kan xtuya' ri ch'akonik chiwe, xticha' ri sacerdote.

⁵ Y xeri' xkech'on ri samajela' richin ri tinamit y xtikibij: ¿K'o kami jun chiwe rix ri k'a juba' tupaba-q'anej jun rachoch y man jani tok-apo chupan? Wi k'o jun, titzolej kan y tibe pa rachoch, roma rik'in juba' xa xtiken kan pan oyowal y xa jun chik ri xtok kan chupan ri rachoch.

⁶ ¿K'o kami jun chiwe rix ri rutikon uva y man rutijon ta ri ruwech? Wi k'o, tibiyin kan pa rachoch, roma rik'in juba' xa xtiken kan pan oyowal y man xtutej ta chik, y xa jun chik ri xtitijo kan pa ruk'exel.

⁷ Wi k'o jun ri ruk'utun rixjayil, más utz wi man nibe ta pan oyowal, roma rik'in juba' xa xtiken kan pan oyowal y xa jun chik ri xtik'ule' rik'in ri xten ri ruk'utun kan, xkecha' rije'.

⁸ Chirij ri', chuqa' xtikibij: Wi k'o ta jun ri xa nuxibij-ri', más utz tibiyin kan pa rachoch, richin keri' man nuben ta chike ri rachibil chi nikixibij-ki', xkecha'.

⁹ Toq rije' xketane-qa chi ch'owen, jari' toq ri aj-raqen xkek'oje-el chikiwech ri aj-labal y nikichop binen.

¹⁰ Toq yixnaqajub-apo rik'in jun tinamit richin niben oyowal rik'in, ri nabey niben, tik'utuj chike richin nik'oje' uxlanibel-k'u'x chi'ikojol.

¹¹ Wi ri winaqi' richin ri tinamit ri' xtikajo' ri uxlanibel-k'u'x y nikiya' q'ij richin yixok-apo pa kitinamit; jari' ri xkesamej iwik'in y xke'ok isamajela' y kan xke'iya' pa kowilej taq samaj.

¹² Jak'a wi man nikajo' ta uxlanibel-k'u'x iwik'in, y xa kan xkixkichop chi labal, rix kan xtisutij k'a ri kitinamit y kan xtiben oyowal kik'in.

¹³ Y ri Jehová ri qa-Dios kan xkerujech pan iq'a', y rix kan xke'ikamisaj chi espada konojel ri achi'a'.

¹⁴ Y xaxe ri ixoqi', ri ak'uala' y ri kawej y ronojel ruwech ri k'o chupan ri tinamit ri', xtok iwichin y kan xtik'atzin k'a chiwe ronojel ri xtiberuya' ri Jehová ri qa-Dios chiwe ri kichin kan ri e etzelanel iwichin.

¹⁵ Keri' niben kik'in ri tinamit ri ek'o nej ri man e richin ta ri ruwach'ulew ri xtiwichinaj rix.

¹⁶ Jak'a ri winaqi' richin ri tinamit ri ek'o chupan ri ruwach'ulew ri xtuya' ri Jehová ri qa-Dios chiwe richin niwichinaj, kan ye'ikamisaj konojel y man jun nik'asba' kan.

¹⁷ Konojel k'a re winaqi' re' xa kan ke'ikamisaj kan jumul: Ri hitita, ri amorreo, ri cananeo, ri ferezeo, ri heveo y ri jebuseo, y tibana' chike achi'el ri rubin ri Jehová ri qa-Dios,

¹⁸ richin man nikik'ut chiwech ri itzel taq banobel ri xekibanala' rije', richin nikiya' ruq'ij ri ki-dios; y keri' nikiben chiwe richin yixmakun chuwech ri Jehová ri qa-Dios.

¹⁹ Wi rix nichop chi oyowal jun tinamit, y k'o chi yixk'oje' chupan k'iy q'ij richin yixtikir nik'en kan chuwi-kiq'a'; man ke'iqasaj ri che' rik'in ikej, roma nik'atzin ri kiwech chiwe richin ye'itej, xa taq che' chuqa' richin pa taq juyu' y man e achi'a' ta richin yetikir nikikol-ki' chiwech rix. xbanon

²⁰ Jak'a wi ek'o che' ri xa man nikiya' ta kiwech, utz ke'ichoyo-el y tibanala' itobal chire richin yixtikir nich'ek ri tinamit ri niq'ijuj.