Deut 17 - Kaqchiquel Bible

¹ Man tisuj richin kamelabel chire ri Jehová ri qa-Dios jun chikop richin ri iwawej ri man tz'aqet ta, roma re' kan nretzelaj ri Jehová ri qa-Dios.

² Wi chupan jun chike ri itinamit ri niya'ox chiwe, nilitej ta jun ixoq o jun achin ri man nunimaj ta rutzij ri Jehová ri qa-Dios y nuben ri itzel chuwech y nuq'ej ruwi' ri rujikibel-tzij;

³ o wi nuya' kiq'ij ri ch'aqa' chik dios y kan nixuke' chikiwech, y nuya' ruq'ij ri q'ij, ri ik', ri ch'umila' ri ek'o chikaj, ri kan rubin kan ri Jehová Dios chi man tiban keri';

⁴ toq xtapon rutzijol iwik'in, kan tiwetamaj k'a jebel rix. Wi qitzij chi xbanatej ri jun itzel banobel ri' pan Israel,

⁵ kan tuk'uex k'a chuchi' ri tinamit ri achike xbanon ri itzel banobel ri', y chiri' k'a tikamisex chi abej.

⁶ Jak'a richin nikamisex k'o chi nak'axex na kich'abel e ka'i' o e oxi' ri xetz'eton ronojel chirij ri k'o chi nikamisex. Man jun tikamisex roma xa jun ok ri nisujun chirij.

⁷ Ri yetz'eton ronojel chirij, ja rije' ri nabey ri yek'aqon ri abej chirij ri wineq ri nikisujuj. Y k'ari' xtuben ri tinamit richin keri' nik'is ronojel ri itzel ri k'o chi'ikojol rix.

⁸ Wi k'o k'a jujun banobel ri janila k'ayew nuben chiwech toq niq'et-tzij, achi'el pa ruwi' jun kamik, oyowal, sokotajik o xabachike ta ri nibanatej chupan ri tinamit, kan jari' k'a kixbiyin pa rachoch ri Jehová ri qa-Dios.

⁹ Xkixapon k'a kik'in ri sacerdote y rik'in ri to'onel, richin nibebij chike ri ruk'ayewal ri k'o chiwech. Y rije' xkebin chiwe ri ruk'amon richin niben.

¹⁰ Y rix xtiben k'a ronojel ri ruchojmilal achi'el ri xtikibij-pe rije' chiwe chiri' pa rachoch ri Jehová.

¹¹ Kan tibana' k'a ronojel ri nubij ri pixa' y ri ruchojmilal ri achi'el ri nikibij-pe rije' chiwe, y man tijech'ej kan iwi' pa iwijkiq'a' y ni ta pa iwajxokon.

¹² Jak'a wi k'o jun nupaba-ri' y man xtunimaj ta kitzij, ri wineq ri' kan xtikamisex k'a, richin keri' xtel ri itzel chukojol ri tinamit Israel.

¹³ Y toq xtikinabej ri winaqi' richin ri tinamit, kan xtikixibij-ki', y keri' man jun bey chik xtik'oje' nimirisanen chi'ikojol.

Ri ruchojmilal pa ruwi' jun rey

¹⁴ Toq xixok yan chupan ri ruwach'ulew ri xtiberuya' ri Jehová ri qa-Dios chiwe, y xixok yan kan chuwech ri iwulew y chupan ri iwachoch, jari' toq xtibij chi niwajo' jun i-rey richin nuq'et-tzij pan iwi', achi'el ri kibanon ri ch'aqa' chik ruwach'ulew ri ek'o chi'inaqaj.

¹⁵ Wi keri', kan xtikusaj k'a kan rey pan iwi' jun iwinaq ri kan ja ri Jehová ri qa-Dios xticha'on. Y man tiben rey chire jun ri man iwinaq ta.

¹⁶ Jak'a ri rey ri' kan man utz ta k'a chi yek'oje' k'iy rukiej, ni man xkeruteq ta el winaqi' pan Egipto chuk'amik kiej richin keri' yek'iyer ri rukiej rija', roma ri Jehová ri qa-Dios rubin chi man jun bey chik xqojtzolin chiri'.

¹⁷ Chuqa' man tik'oje' k'iy rixjayil richin man tisach kan ruk'u'x y numestaj kan ri Jehová y chuqa' man tik'oje' pa ruk'iyal q'anapueq y saqipueq rik'in.

¹⁸ Toq ri rey xtitz'uye' kan, jari' k'a xtubij chi titz'ibex chupan jun k'ak'a' wuj ri pixa' ri k'o pa kiq'a' ri sacerdote.

¹⁹ Re wuj re' kan jantape' xtik'oje' rik'in ri rey, y xtusik'ij ronojel q'ij chire ri ruk'aslen, richin keri' nretamaj nuya' rejqalen ri Jehová, y richin nuyek pa ránima ronojel re ch'abel ri nubij re tijonik re', y kan xtutaqej re pixa' re'.

²⁰ Richin keri' man tunimirisaj-ri' chikiwech ri ruwinaq, y man tujech'ej kan ri' chire ri pixa', ni ta pa rijkiq'a', ni pa rajxokon. Richin keri' kan xtiyaloj k'a ri ruk'aslen chupan ri ruq'atbal-tzij, rija' y ri e rijatzul.